1Եւ եղեւ բան Տեառն առ իս եւ ասէ. 2Եւ դու, որդի մարդոյ, ասասցես. Այսպէս ասէ Ադոնայի Տէր երկրիդ Իսրայելացւոց. Վախճան հասեալ է, հասեալ է վախճան ի վերայ չորեցունց կողմանց երկրիդ։ 3Ահաւադիկ հասեալ է ի վերայ քո վախճան, եւ առաքեցից ես զսրտմտութիւն իմ, եւ դատեցայց զքեզ ըստ ճանապարհաց քոց, եւ հատուցից քեզ ըստ ամենայն գարշելեացն քոց։ 4Եւ ոչ խնայեսցէ ակն իմ ի քեզ եւ ոչ ողորմեցայց. զի ըստ գնացից քոց հատուցից քեզ, եւ գարշելիքն քո ի միջի քում եղիցին, եւ ծանիցես թէ ես եմ Տէր։

5Քանզի այսպէս ասէ Տէր Տէր. Չարիք մի, ահաւասիկ չարիք մի հասեալ են։ 6Եհաս վախճան. զարթեաւ ի վերայ քո, ահաւադիկ հասեալ է։ 7Զմբաղ՝՝ ի վերայ քո, որ բնակեալդ ես յերկրիդ. հասեալ է ժամանակ, մերձեցաւ օր, եւ ոչ աղմկաւ եւ ոչ երկամբք՝՝։ 8Այլ այժմ ի մօտոյ հեղից զբարկութիւն իմ ի վերայ քո, եւ կատարեցից ի քեզ զսրտմտութիւն իմ. եւ դատեցայց զքեզ ըստ ճանապարհաց քոց, եւ տաց ի վերայ քո զամենայն պղծութիւնս պաշտամանց քոց՝՝։ 9Եւ մի՛ խնայեսցէ ակն իմ ի քեզ եւ ոչ եւս ողորմեցայց. զի ըստ ճանապարհաց քոց հատուցից քեզ, եւ գարշելիքդ քո ի միջի քում եղիցին. եւ ծանիցես թէ ես եմ Տէր որ հարկանեմ զքեզ։ 10Ահաւասիկ օր Տեառն, ահա հասեալ է վախճան. եկն զմբաղն՝՝, ծաղկեցաւ գաւազանն. յարեաւ ամբարտաւանութիւնն։ 11Եւ խորտակեսցես զհաստատութիւն անօրինին, ոչ աղմկաւ եւ ոչ փութով. ոչ են ի միտս իւրեանց՝՝, եւ ոչ գեղեցկութիւն ի նոսա։ 12Հասեալ է ժամանակ, ահա եկն օր. ստացօղն մի՛ խնդասցէ, եւ որ վաճառէն՝ մի՛ ողբասցի. զի բարկութիւն է յամենայն բազմութեան նորա։ 13Զի որ ստանայն՝ ի վաճառական՝՝ անդր այլ մի՛ դարձցի, եւ ոչ եւս է կեալ ի կենդանութեան նոցա՝՝. զի տեսիլս ի վերայ ամենայն բազմութեան նորա ոչ դարձցի, եւ մարդ յաչս կենաց իւրոց մի՛ հաստատեսցի։

14Փող հարէք եւ ընտրեցէք՝՝ զամենայն. եւ ոչ ոք իցէ որ երթայցէ ի պատերազմ, զի բարկութիւն ի վերայ բազմութեան նորա։ 15Պատերազմ սրոյ արտաքուստ, եւ սով եւ մահ ի ներքուստ. եւ որ ի բացի իցեն՝ սրով վախճանեսցին, եւ որ ի քաղաքի իցեն՝ սովով եւ մահուամբ վախճանեսցին։ 16Եւ ապրեսցին որք ապրելոց իցեն ի նոցանէ, եւ եղիցին ի վերայ լերանց իբրեւ զաղաւնիս անձանձրոյթ մնչել. զամենեսեան կոտորեցից՝ զիւրաքանչիւր՝՝ ոք յանօրէնութեան իւրում։ 17Ամենայն ձեռք լքցին, եւ ամենայն երանք գարշասցին խոնաւութեամբ՝՝։ 18Սփածցին քուրձս, եւ ծածկեսցեն զնոսա ցնորք. յամենայն երեսս ամօթ, եւ յամենայն գլուխս կնդութիւն։ 19Արծաթ նոցա անկեալ կայցէ ի հրապարակս, եւ ոսկի նոցա արհամարհեսցի. արծաթ նոցա եւ ոսկի նոցա ոչ կարասցէ փրկել զնոսա յաւուր բարկութեան Տեառն. եւ անձինք նոցա մի՛ յագեսցին, եւ որովայնք նոցա մի՛ լցցին. զի տանջանք եղեն՝՝ անիրաւութեան նոցա։ 20Զընտիր ընտիր զարդուցն եդին ի հպարտութիւն, եւ պատկերս գարշելեաց պաշտամանցն իւրեանց արարին ի նոցանէ. վասն այնորիկ տաց զայն նոցա ի պղծութիւն. 21եւ մատնեցից ի ձեռս օտարաց յափշտակել զնոսա, եւ ժանտագործաց երկրի յաւար, եւ պղծեսցեն զնոսա։ 22Եւ դարձուցից զերեսս իմ ի նոցանէ, եւ պղծեսցեն զայցելութիւնս իմ, եւ մտցեն ի նոսա անխտիր. եւ պղծեսցեն զնոսա՝՝։

23Եւ արասցեն խառնակութիւն՝՝. զի լցաւ երկիր ի դատաստանաց արեանց նոցա, եւ քաղաքք լի եղեն՝՝ անօրէնութեամբք։ 24Եւ ածից զչարս ազգաց եւ ժառանգեսցեն զտունս նոցա, եւ կործանեցից զամբարտաւանութիւն բռնութեանց նոցա, եւ պղծեսցին սրբութիւնք նոցա։ 25Եկեսցէ քաւութիւն, եւ խնդրեսցեն զխաղաղութիւն, եւ ոչ գտանիցի։ 26Վայ ի վայի վերայ եղիցի, եւ գոյժ ի գուժի. խնդրեսցին տեսիլք ի մարգարէից, եւ օրէնք դիւրիչք ի քահանայէ, եւ խորհուրդք ի ծերոց, եւ ոչ գտանիցին։՝՝ 27Թագաւորն սգասցի, եւ իշխանն զգեցցի զապականութիւն, եւ ձեռք ժողովրդեան երկրին լքցին. ըստ ճանապարհաց նոցա արարից նոցա, եւ ըստ դատաստանաց նոցա առից վրէժ ի նոցանէն, եւ ծանիցեն թէ ես եմ Տէր։