1Եւ յորժամ եկաց Եզրաս յաղօթս հանդերձ խոստովանութեամբքս այսոքիւք եւ ողբովք մեծամեծօք՝ անկեալ էր ի վերայ երեսաց երկրի առաջի Տեառն՝՝. ժողովեցան առ նա ամենայն որ էին յԵրուսաղէմ՝՝ ժողովուրդ բազում, արք եւ կանայք, երիտասարդք եւ կուսանք, եւ ողբայր ժողովուրդն, եւ համբարձին զձայնս լալոյ իւրեանց։ 2Եւ պատասխանի ետ Յեքոնիա որդի Եղեայ որդւոյն՝՝ Եղամայ, եւ ասէ ցԵզրա. Մեք մեղաք առ Տէր Աստուած մեր, եւ արարաք զկանայս յայլազգեաց երկրիս այսորիկ. եւ այժմ են անօրէնութիւնք այսօր ի մէջ Իսրայելի՝՝։ 3Եւ արդ ուխտեսցուք ուխտս առաջի Տեառն Աստուծոյ մերոյ հանել զամենայն կանայս այլազգիս եւ զզաւակս որ ի նոցանէ. եւ արդ որպէս կամիս արի եւ կեցո զսոսա օրինօքն Տեառն Աստուծոյ եւ որպէս պատուիրանք հրամայեն. 4արի եւ լուիցուք ի բերանոյ քումմէ՝՝. եւ մեք ընդ քեզ. զօրացիր եւ արա որպէս եւ հրամայեալ է ի Տեառնէ Աստուծոյ՝՝։

5Եւ յարուցեալ Եզրայ երդմնեցոյց զիշխանս ցեղից քահանայից եւ Ղեւտացւոց եւ զամենայն Իսրայէլ առնել ըստ այսմ օրինակի երդման։ 6Եւ յարուցեալ Եզրայ յերեսաց տանն Աստուծոյ, երթեալ ի տուն գանձին առ Յոհանան որդի Եղիսուբայ՝ հաց ոչ եկեր եւ ջուր ոչ արբ, եւ ողբացեալ ի վերայ անօրէնութեանն եւ մեծամեծաց մեղաց բազմութեանն՝՝։ 7Եւ քարոզ կարդային ի Հրէաստանի եւ յԵրուսաղէմ. 8ամենայն ոք՝ որ ոչ եկեսցէ յԵրուսաղէմ մինչեւ յերիս աւուրս յիշխանաց եւ ի ծերոցն՝՝, եղիցի նզովեալ ամենայն ստացուածք նորա, եւ ինքն ի բաց եղիցի յեկեղեցւոյ ժողովրդոցն Իսրայելի՝՝։ 9Եւ ժողովեցան ամենայն արք Յուդայ եւ Բենիամինի յԵրուսաղէմ յերիս աւուրս, յիններորդ ամսեանն որ օր քսան էր ամսոյն. եւ նստան ամենայն ժողովուրդն ի հրապարակի տանն Տեառն. եւ էին զարհուրեալք ի բանից նորա եւ ի ցրտութենէ ձմերայնոյն։ 10Եւ յարուցեալ Եզրայ՝՝ ասէ ցնոսա. Դուք էք որ՝՝ մեղայք, եւ արարէք կանայս զդստերս այլազգեաց, եւ յաւելիք զմեղս եւ զանօրէնութիւնս ի վերայ Իսրայելի։ 11Եւ արդ տուք զօրհնութիւն Տեառն Աստուծոյ հարցն ձերոց, եւ արարէք զհաճոյսն առաջի նորա. եւ զատեալ որոշեցայք յամենայն հեթանոսաց երկրի եւ ի կանանց այլազգեաց զորս արարէք։

12Եւ պատասխանի ետուն ամենայն եկեղեցին եւ ասեն. Մեծ է բանս այս զոր ասես դու ի վերայ մեր. 13վասն զի՝՝ ժողովուրդ բազումք եմք, եւ ժամանակս ձմեռն է. եւ ոչ կարեմք կալ արտաքոյ, եւ գործդ ոչ է զմի օր կամ զերկու, վասն զի սաստիկ մեղաք յիրս յայս։ 14Կացցեն իշխանք յամենայն տեղիս եւ ի քաղաքս, եւ՝՝ որոց իցէ արարեալ կանայս յայլազգեաց՝ եկեսցեն ի ժամանակին զոր ծերքն եւ հայրապետքն կարգեսցեն ի քաղաքս քաղաքս, եւ դատեալ քաւեսցեն զմեղս զայս ի մէնջ, եւ դարձուսցեն զբարկութիւն՝՝ Աստուծոյ ի մէնջ որ վասն բանիս այսորիկ։ 16Եւ արարին՝՝ այսպէս որ ելեալ էին ի գերութենէն. եւ ընտրեաց Եզրաս արս իշխանս ի հայրապետաց տանն իւրոյ՝ զարս անուանիս. եւ շրջեցան՝՝ յամսամտի տասներորդ ամսոյն՝ եւ վճարեցին. 17եւ որոշեցին զամենայն արս՝՝ որք ունէին զկանայս յայլազգեացն մինչեւ ի մուտ ամսոյն առաջնոյ։

18Եւ գտան յորդւոց քահանայիցն որք ունէին զկանայս յայլազգեացն, յորդւոցն Յեսովայ Յովսեդեկեանց եւ եղբօր նորա Մանասէի եւ Եղիազարու, Յարիբ եւ Գադալիա. 19եւ սկսան՝՝ հանել զկանայս այլազգեացն յինքեանց, եւ մատուցին իւրաքանչիւր խոյս վասն թողութեան մեղացն անգիտութեան։ 20Եւ յորդւոցն Երամ՝՝ Մասիաս, Եղիա, Սամայիա եւ Յեքիէլ եւ Ոզիա. 22եւ յորդւոցն Փասուր՝ Եղիանաս, Մասիէլ, Միսայէլ, Նաթանայէլ, Յովզաբաթ եւ Եղասա. 23եւ յորդւոցն Ղեւտացւոց՝ Յեւզաբաթ, Սամութ, Կովղիա՝ այս է Կովղիտոս, եւ Ափեթիաս եւ Յուդաս եւ Եղիազար. 24եւ ի սաղմոսերգացն՝ Եղիսափ, եւ ի դռնապանացն՝ Կողէմ, Էտէղէս եւ Ուրի։ 25Եւ յԻսրայելէ, յորդւոցն Փորոսայ՝ Հռամայիա, Յազիա, Մեղքիա, Էակիմ, Եղիազար, Ասաբիա, Նիբանիա. 26եւ յորդւոցն Եղամ՝ Մատթանիա, Զաքարիա, Յաւէլ, Աբդիա, Երիմովթ եւ Եղիա. 27եւ յորդւոցն Զաթուայ՝ Եղիոնէ, Եղիսաբ, Մատթանա, Յարմոթ, Զաբադ, Ազիա. 28եւ յորդւոցն Բաբէի՝ Յոհանան, Անանիա եւ Զաբու եւ Աթաղի. 29եւ յորդւոցն Բանի՝ Մոսողամ, Մաղաք, Ադայիաս, Յասուբ, Սաաղ եւ Հռեմովթ։ 30Եւ յորդւոցն Փաաթմովաբ՝ Ադնէ, Քաղէլ, Բանեա, Մասեա, Մատթա, Բեսեէլ, Բանուի, Մանասէ. 31եւ յորդւոցն Երամ՝ Եղիեզի, Եսիա, Մեղքիա, Սամերաս, Սիմէոն, Բենիամին, Մաղուք, Սամարիա. 32Եւ յորդւոցն Ասէմ՝ Մատթանիա, 33Մատաթիա, Զարաթ, Եղիփաղէտ, Յերեմի, Մանասէ, Սամէի. 34եւ յորդւոցն Բանի՝ Մովադիա, Ամրամ, Ուէլ, 35Բանեա, Բադայիա, Քեղիա, 36Ուանիա, Մարիմովթ, Եղիասիբ, 37Մաթանիա, Մաթանա. 38եւ արարին որդիքն Բանի եւ որդիքն՝՝ Սեմէի, 39Սեղեմիաս, Նաթան, Ադայիաս, 40Մաքնա, Գայադու, Սէսէ, Արու, 41Եզրիէլ, Սաղամիաս, Սամարիաս, 42Սեղում, Ամարիաս, Յովսէփ. 43յորդւոցն Աբուրէ՝ Յէուէլ, Մատաթիաս, Զաբաթ, Զեբիննաս, Յադայի, Յադէ, Յովեդ, Բանեա։ 44Այսք էին ամենեքեան որ ունէին զկանայս յայլազգեացն, եւ ծնան ի նոցանէ ուստերք եւ դստերք։