1Եւ այս են իշխանք հայրապետացն որ ելանէին ընդ իս ի թագաւորութեանն Արտաշիսի թագաւորի Բաբելացւոց. 2յորդւոցն Փենեէսի՝ Գերսոն, յորդւոցն Իթամարայ՝ Դանիէլ, յորդւոցն Դաւթայ՝ Ատտուս, 3յորդւոցն Սեքենայ՝ յորդւոցն Փարոսայ՝ Զաքարիա, եւ ընդ նմա արք հարեւր յիսուն. 4յորդւոցն Փաաթմովաբ՝ Եղիանա որդի Զարայ, եւ ընդ նմա երկերիւր արանց. 5յորդւոցն Զատուելի՝ Սեքենիա՝՝ որդի Ազիելի, եւ ընդ նմա երեք հարեւր արանց. 6յորդւոցն Ադինայ՝ Աբեդ որդի Յովնաթանայ, եւ ընդ նմա յիսուն արանց. 7յորդւոցն Եղամի՝ Իսաիաս որդի Աթալեայ, եւ ընդ նմա եւթանասուն արանց. 8յորդւոցն Սափատեայ՝ Զաբադիա որդի Միքայելի, եւ ընդ նմա եւթանասուն արանց. 9յորդւոցն Յովաբայ՝ Աբդիա որդի Յեքիելի, եւ ընդ նմա երկերիւր եւ ութեւտասն արանց. 10յորդւոցն Բաանայ՝ Սեղիմութ որդի Յովսեփու՝՝, եւ ընդ նմա հարեւր վաթսուն արանց. 11յորդւոցն Բաբէի՝ Զաքարիաս որդի Բաբի, եւ ընդ նմա քսան եւ ութ արանց. 12յորդւոցն Ադոնիկամայ եւ Ազգադայ եւ Յովնան որդի Սակատանայ՝՝, եւ ընդ նմա հարեւր եւ տասն արանց. 13յորդւոցն Ադոնիկամ՝ Էսքարի. եւ այս են անուանք նոցա, Եղիփաղաթ, Յէիէլ եւ Սամա, եւ ընդ նմա վաթսուն արանց. 14յորդւոցն Բագուի՝ Ութայի եւ Զաբութ, եւ ընդ նմա եւթանասուն արանց։

15Եւ ժողովեցի զնոսա առ եզր գետոյն որ գայ յԵւի, եւ առեալ անդ օթեւանս աւուրս երիս. եւ ի բազմութեան ժողովրդեանն՝ յորդւոց քահանայիցն եւ յորդւոցն Ղեւեայ ոչ գտի զոք։ 16Եւ առաքեցի առ Եղիազար եւ առ Արիէլ եւ առ Սեմեա, եւ զԱռնաամ եւ զԱրիբ եւ զԵղնաթան եւ զՆաթան եւ զԶաքարիա եւ զՄէսողաամ եւ զՅովարիբ եւ զՅեղմաթամ։ 17Եւ իմացուցեալ ածին զնոսա առաջի իշխանացն որ էին ի տեղւոջ գանձաւորացն՝՝. եւ եդի բանս ի բերանս նոցա խօսել ընդ եղբարս իւրեանց. Նաթանիմ, որ էր ի տեղի գանձաւորացն զորս ածին առ մեզ, որք երգէին ի տան Աստուծոյ մերոյ։ 18Եւ եկին՝՝ առ մեզ, քանզի էր ձեռն Տեառն ի բարութիւն ընդ մեզ, յորդւոցն Ղեւեայ որդւոյ Իսրայելի. եւ զառաջինն եկին առ մեզ որդիք նորա եւ եղբարք նորա ութեւտասն. 19եւ Ասեբիա եւ Յեսեա որդի Մերարեայ, եւ եղբարք նորա եւ որդիք նորա՝ արք քսան. 20եւ ի Նաթանայ՝՝ զոր ետ Դաւիթ եւ իշխանքն ի ծառայութիւն Ղեւտացւոցն եւ ի Նաթանայիմ՝՝ երկերիւր եւ քսան. ամենեքեան ժողովեցան ըստ անուան իւրեանց։

21Եւ քարոզեցաք անդ պահս առ եզր գետոյն Առիս, եւ մատուցաք անդ աղօթս առաջի Տեառն Աստուծոյ մերոյ, խնդրել ի նմանէ ճանապարհ ուղղութեան մեզ եւ որդւոց մերոց եւ ամենայնի որ ընդ մեզ. 22վասն զի ամաչեցաք խնդրել ի թագաւորէն հեծեալս՝ ապրեցուցանել զմեզ ի թշնամեացն մերոց ի ճանապարհին. վասն զի ասացաք ցթագաւորն այսպէս, եթէ՝ Ձեռն Տեառն մերոյ օգնէ ամենեցուն որ խնդրեն զնա ի բարութիւն. եւ զօրութիւն նորա եւ բարկութիւն նորա ի վերայ ամենեցուն ոյք թողուն զնա։ 23Եւ պահեցաք եւ խնդրեցաք յԱստուծոյ մերոյ վասն այսր ամենայնի, եւ լուաւ Տէր։

24Եւ առաքեցաք՝՝ յիշխանացն քահանայից երկոտասան, զՍարաբիա եւ զԱսաբիա, եւ ընդ նոսա յեղբարց նոցա տասն, 25եւ կշռեցաք եւ տուաք ցնոսա զարծաթ եւ զոսկի եւ զսպաս առաջաւորութեան տանն Աստուծոյ մերոյ, զոր բարձրացոյց զմեզ՝՝ թագաւորն եւ խորհրդակիցք նորա եւ իշխանք նորա եւ ամենայն Իսրայէլ որ միանգամ էին անդ. 26եւ կշռեալ ետու ցնոսա արծաթ տաղանդս՝ վեց հարեւր յիսուն, եւ կահ արծաթոյ՝ հարեւր, եւ ոսկւոյ՝ տաղանդս հարեւր, 27եւ այլ կահ ոսկւոյ՝ քսան եւ երեք. եւ կահ պղնձոյ սուրբ եւ մաքուր ոսկեզօծ՝՝։ 28Եւ ասացի ցնոսա. Եւ դուք սրբեալք Տեառն Աստուծոյ էք, եւ ամենայն կահ սուրբ է Տեառն, եւ ոսկեղէնք եւ արծաթեղէնք ընտրեալք Տեառն Աստուծոյ հարցն մերոց. 29արթուն կացէք եւ պահեցէք՝ մինչեւ կշռեսջիք զդոսա առաջի իշխանաց քահանայիցն եւ Ղեւտացւոցն, եւ իշխանաց հայրապետացն Իսրայելի որ են յԵրուսաղէմ ի խորանս տան Տեառն։ 30Եւ առեալ քահանայիցն եւ Ղեւտացւոցն՝՝ զհամար ոսկւոյ եւ արծաթոյ եւ զկահս ի տանել յԵրուսաղէմ ի տուն Աստուծոյ մերոյ։

31Եւ յարուցեալ չուեցաք ի գետոյն Էոս որ օր երկոտասան էր ամսոյն առաջնոյ, եւ եկեալ հասաք՝՝ յԵրուսաղէմ. եւ ձեռն Տեառն Աստուծոյ մերոյ էր ընդ մեզ, եւ փրկեաց զմեզ ի ձեռաց թշնամեաց մերոց, եւ ի պատերազմողաց զճանապարհայն. 32եւ եկաք յԵրուսաղէմ եւ հանգեաք անդ աւուրս երիս։ 33Եւ յաւուրն չորրորդի կշռեալ տուաք զարծաթ եւ զոսկի եւ զկահ ի տուն Տեառն Աստուծոյ մերոյ, ի ձեռս Մարեմովթ որդի Ոնիայ՝՝ քահանայի, եւ որ էր ընդ նմա Եղիազար որդի Փենեէսի, եւ Յովզաբաթ որդի Յեսուայ, եւ Նովադիա որդի Բանեայ, եւ այլ՝՝ Ղեւտացիք. 34եւ էր թուով եւ համարով ամենայն, եւ գրեցաւ ամենայն կշիռ համարոյն բովանդակ ի ժամանակին յայնմիկ։

35Որք եկեալ էին ի գերութենէն որդիք պանդխտութեան, մատուցին ողջակէզս Տեառն Աստուծոյ Իսրայելի, զուարակս երկոտասան վասն ամենայն Իսրայելի, խոյս իննսուն եւ վեց, գառինս եւթանասուն եւ եւթն, ամիկս վասն մեղաց երկոտասան. զայս ամենայն ողջակէզս մատուցին Տեառն Աստուծոյ։ 36Եւ ետուն զգիր կարասւոյն, զոր հրամայեալ էր թագաւորին ցիշխանս կողմանց գետոյն Եփրատու. եւ փառաւորեցին զժողովուրդն եւ զտաճարն Աստուծոյ՝՝։