1Եւ էր ամենայն երկիր լեզու մի, եւ բարբառ մի ամենեցուն։ 2Եւ եղեւ ի խաղալն նոցա յարեւելից՝ գտին դաշտ մի յերկրին Սենաար, եւ բնակեցան անդ։ 3Եւ ասեն այր ցընկեր իւր. Եկայք արկցուք աղիւս եւ թրծեսցուք զայն հրով։ Եւ եղեւ նոցա աղիւսն ի տեղի քարի, եւ կուպր ի տեղի շաղախոյ։ 4Եւ ասեն. Եկայք շինեսցուք մեզ քաղաք եւ աշտարակ, որոյ լինիցի գլուխն մինչեւ յերկինս. եւ արասցուք մեզ անուն յառաջ քան զսփռել՝՝ ի վերայ երեսաց ամենայն երկրի։ 5Եւ էջ Տէր տեսանել զքաղաքն եւ զաշտարակն զոր շինէին որդիք մարդկան։ 6Եւ ասէ Տէր. Ահա ազգ մի եւ լեզու մի ամենեցուն, եւ զայդ սկսան գործել. եւ արդ ոչինչ պակասէ ի նոցանէ, զամենայն զոր ինչ յօժարեսցին գործել։ 7Եկայք իջցուք եւ խառնակեսցուք անդ զլեզուս նոցա, զի մի՛ լսիցեն իւրաքանչիւր բարբառոյ ընկերի իւրոյ։ 8Եւ սփռեաց զնոսա Տէր Աստուած անտի ընդ երեսս ամենայն երկրի, եւ դադարեցին ի շինելոյ զքաղաքն եւ զաշտարակն՝՝։ 9Վասն այնորիկ կոչեցաւ անուն նորա Խառնակութիւն. զի անդ խառնակեաց Տէր Աստուած զլեզուս ամենայն երկրի, եւ անտի ցրուեաց զնոսա Տէր Աստուած ընդ երեսս ամենայն երկրի։

10Եւ այս են ծնունդք Սեմայ. Սէմ որդի հարիւրեմեան էր յորժամ ծնաւ զԱրփաքսադ յերկրորդում ամի յետ ջրհեղեղին։ 11Եւ եկեաց Սեմ յետ ծնանելոյ նորա զԱրփաքսադ՝ ամս հինգ հարեւր, եւ ծնաւ ուստերս եւ դստերս, եւ մեռաւ՝՝։ 12Եւ Արփաքսադ եկեաց ամս հարեւր երեսուն եւ հինգ, եւ ծնաւ զՍաղա։ 13Եւ եկեաց Արփաքսադ յետ ծնանելոյ նորա զՍաղա՝ ամս երեք հարեւր եւ երեսուն՝՝, եւ ծնաւ ուստերս եւ դստերս, եւ մեռաւ՝՝։ 14Եւ եկեաց Սաղա ամս հարեւր եւ՝՝ երեսուն, եւ ծնաւ զԵբեր։ 15Եւ եկեաց Սաղա յետ ծնանելոյ նորա զԵբեր՝ ամս երեք հարեւր եւ երեսուն՝՝, եւ ծնաւ ուստերս եւ դստերս, եւ մեռաւ՝՝։ 16Եւ եկեաց Եբեր ամս հարեւր երեսուն եւ չորս, եւ ծնաւ զՓաղէկ։ 17Եւ եկեաց Եբեր յետ ծնանելոյ նորա զՓաղէկ ամս երկերիւր եւ եւթանասուն՝՝, եւ ծնաւ ուստերս եւ դստերս, եւ մեռաւ՝՝։ 18Եւ եկեաց Փաղէկ ամս հարեւր եւ երեսուն եւ չորս՝՝, եւ ծնաւ զՌագաւ։ 19Եւ եկեաց Փաղէկ յետ ծնանելոյ նորա զՌագաւ՝ ամս երկերիւր եւ ինն, եւ ծնաւ ուստերս եւ դստերս, եւ մեռաւ՝՝։ 20Եւ եկեաց Ռագաւ ամս հարեւր երեսուն եւ երկու, եւ ծնաւ զՍերուգ։ 21Եւ եկեաց Ռագաւ յետ ծնանելոյ նորա զՍերուգ՝ ամս երկերիւր եւ եւթն. եւ ծնաւ ուստերս եւ դստերս, եւ մեռաւ՝՝։ 22Եւ եկեաց Սերուգ ամս հարեւր եւ՝՝ երեսուն, եւ ծնաւ զՆաքովր։ 23Եւ եկեաց Սերուգ յետ ծնանելոյ նորա զՆաքովր՝ ամս երկերիւր, եւ ծնաւ ուստերս եւ դստերս, եւ մեռաւ՝՝։ 24Եւ եկեաց Նաքովր ամս եւթանասուն եւ ինն, եւ ծնաւ զԹարա։ 25Եւ եկեաց Նաքովր յետ ծնանելոյ նորա զԹարա՝ ամս հարեւր քսան եւ երկու՝՝, եւ ծնաւ ուստերս եւ դստերս, եւ մեռաւ՝՝։ 26Եւ եկեաց Թարա ամս եւթանասուն, եւ ծնաւ զԱբրամ եւ զՆաքովր եւ զԱռան։

27Այս են ծնունդք Թարայի. Թարա ծնաւ զԱբրամ եւ զՆաքովր եւ զԱռան. եւ Առան ծնաւ զՂովտ։ 28Եւ մեռաւ Առան առաջի Թարայի հօր իւրոյ, յերկրին յորում ծնաւ, յաշխարհին Քաղդեացւոց։ 29Եւ առին Աբրամ եւ Նաքովր իւրեանց կանայս. անուն կնոջն Աբրամու՝ Սարա, եւ անուն կնոջն Նաքովրայ՝ Մեղքայ, դուստր Առանայ, հօր Մեղքայ, եւ հօր Յեսքայ։ 30Եւ էր Սարա ամուլ եւ ոչ ծնանէր։ 31Եւ առ Թարա զԱբրամ զորդի իւր, եւ զՆաքովր զորդի իւր՝՝, եւ զՂովտ՝ զորդի Առանայ որդւոյ իւրոյ, եւ զՍարա զնու իւր, զկին Աբրամու որդւոյ իւրոյ, եւ եհան զնոսա յաշխարհէն Քաղդեացւոց՝ երթալ յերկիրն Քանանացւոց. եւ եկին մինչեւ ցԽառան, եւ բնակեցին անդ։ 32Եւ եղեն ամենայն աւուրք Թարայի ի Խառան՝ ամք երկերիւր եւ հինգ, եւ մեռաւ Թարա ի Խառան։