1Այգի տաշտաւոր պտղալից Իսրայէլ՝՝. ըստ բազմութեան պտղոց իւրոց յաճախեաց սեղանս. ըստ պարարտութեան երկրի իւրեանց կանգնեցին արձանս։ 2Բաժանեցին զսիրտս իւրեանց, արդ ապականեսցին. նա կործանեսցէ զսեղանս նոցա, թշուառասցին արձանք նոցա։՝՝ 3Քանզի այժմ ասասցեն. Ոչ գոյ մեր թագաւոր, զի ի Տեառնէ ոչ երկեաք. այլ թագաւոր մեզ զի՞ առնիցէ։ 4Եթէ բանս խօսեսցի, պատճառք ստութեան են. ուխտեսցէ ուխտ. եւ բուսցին իբրեւ զսէզ իրաւունք ի կորդ ագարակի. որթուն տանն Ովնայ։ 5Եւ եղիցին պանդուխտք՝՝ բնակիչք Շամրնի. զի սուգ առ ժողովուրդ նորա ի վերայ նորա. եւ որպէս դառնացուցին զնա, ոտնհար լիցին՝՝ ի վերայ փառաց նորա. զի գերեցան ի նմանէ։ 6Եւ զնա յԱսորեստանեայս կապեալս տարցին պատարագ արքային Յարիմայ. կաշառօք ընկալցի զԵփրեմ.՝՝ ամաչեսցէ Իսրայէլ ի խորհուրդս իւր։ 7Մերժեաց Շամրին զթագաւոր իւր՝ իբրեւ զխռիւ յերեսաց՝՝ ջրոյ։ 8Եւ բարձցին մեհեանքն Ովնայ՝ մեղքն Իսրայելի. փուշ եւ տատասկ բուսցի ի սեղանս նոցա. եւ ասասցեն լերանց թէ՝ Անկերուք ի վերայ մեր, եւ ցբլուրս թէ՝ Ծածկեցէք զմեզ։

9Յորմէհետէ բարձունք են՝ մեղաւ՝՝ Իսրայէլ. անդ առին զտեղի, եւ մի՛ հասցէ նոցա ի բարձունս. պատերազմ եկն ի վերայ որդւոցն անօրէնութեանց՝ 10խրատել՝՝ զնոսա, եւ ժողովեսցին ի վերայ նոցա ազգք՝ խրատել զնոսա՝՝ ի վերայ երկուց անիրաւութեանց նոցա։ 11Եփրեմ երինջ կիրթ՝ սիրել զհակառակութիւն. բայց ես հասից ի վերայ գեղոյ պարանոցի նորա. ելից ի վերայ Եփրեմայ, եւ անփոյթ արարից զՅուդայէ. եւ զօրասցի ի վերայ նորա՝՝ Յակոբ։

12Սերմանեցէք ձեզ յարդարութիւն, եւ հնձեցէք պտուղ կենաց. լուսաւոր արարէք ձեզ զլոյս գիտութեան. խնդրեցէք զՏէր՝ մինչեւ եկեսցեն ձեզ արդիւնք արդարութեան։ 13Զմէ՞ խլխլեցէք զամպարշտութիւն, եւ զանօրէնութիւնս նորա գրգեցէք՝՝, եւ կերայք պտուղ ստութեան. զի յուսացար ի կառս քո, ի բազմութիւն զօրութեան քո։ 14Եւ յարիցէ կորուստ ի վերայ ժողովրդեան՝՝ քո, եւ ամենայն պարսպաւորք քո կործանեսցին. իբրեւ իշխան Սաղմանա ի տանէն Յերոբովաղայ յաւուր պատերազմին, զմայր առ որդիս հարին, 15նոյնպէս արասցեն ձեզ, տունդ Իսրայելի, յերեսաց չարեաց ձերոց. ընկեցան ընդ առաւօտս, ընկեցաւ՝՝ թագաւորն Իսրայելի։