1Իծոց նոցա իբրեւ զերկիր, եւ՝՝ իբրեւ զարծուի ի վերայ տանն Տեառն, փոխանակ զի անցին զուխտիւ իմով, եւ յօրէնս իմ ամպարշտեցան։ 2Առ իս աղաղակեսցեն. Աստուած, ծանեաք զքեզ։ 3Զի Իսրայէլ դարձաւ ի բարեաց. հալածեցին զթշնամի։ 4Անձամբ թագաւորեցին, եւ ոչ ինեւ. տիրեցին, եւ ոչ ցուցին ինձ. զարծաթ իւրեանց եւ զոսկի արարին իւրեանց կուռս, զի սատակեսցին։

5Խորտակեա զորթն՝՝ քո, Շամրին. բարկացաւ սրտմտութիւն իմ ի վերայ նոցա. մինչեւ յե՞րբ ոչ կարասցեն սրբել յԻսրայելի։ 6Եւ՝՝ զայն հիւսն գործեաց, եւ ոչ Աստուած. քանզի մոլորեցուցիչ է՝՝ որթն քո, Շամրին։ 7Զի խորշակահար սերմանեցին, եւ կործանումն նոցա ընկալցի զայն՝՝. որայ նոցա ոչ արասցէ զօրութիւն խիւսոյ. թէ եւ առնիցէ՝ զայն օտարք կերիցեն։ 8Ընկղմեցաւ Իսրայէլ. արդ այժմ եղեւ ի մէջ ազգաց իբրեւ զանօթ անպիտան։ 9Զի գնացին առ Ասորեստանեայս. զուարթացաւ առանձինն Եփրեմ, սիրեաց զկաշառս։ 10Վասն այնորիկ մատնեսցին ի մէջ ազգաց. բայց այժմ ընկալայց զնոսա, եւ դադարեսցեն փոքր մի յօծանելոյ թագաւորս եւ իշխանս։ 11Զի յաճախեաց Եփրեմ սեղանս. եւ եղեն նմա ի մեղս սեղանքն սիրեցեալք։ 12Գրեցից ի վերայ նոցա բազմութիւն, եւ կրօնք նորա յօտարոտիս համարեցան։ 13Սեղանքն սիրեցեալք. զի թէպէտ եւ զոհեսցեն զոհս եւ ուտիցեն զմիսն, Տէր ոչ ընկալցի զայն՝՝. արդ յիշեսցէ զանիրաւութիւնս նոցա, եւ զանօրէնութեանց նոցա վրէժ խնդրեսցէ. նոքա յԵգիպտոս դարձան եւ ի մէջ Ասորեստանեայց պղծութիւնս կերիցեն՝՝։ 14Զի մոռացաւ Իսրայէլ զԱրարիչ իւր, եւ շինեցին մեհեանս, եւ յաճախեաց Յուդա քաղաքս պարսպաւորս. եւ առաքեցից հուր ի քաղաքս նորա, եւ կերիցէ զհիմունս նոցա՝՝։