1Միթէ ապառա՞ժ աւերակ իցէ լեառն դստեր Սիոնի։ 2Եւ եղիցիս իբրեւ հաւու թռուցելոյ ձագ մնացեալ, դուստր Մովաբացւոց։ 3Բայց ապա եւ դու, Առնովն, աւելի ինչ խորհեաց առնել յարկս սգոյն նոցա. հանապազ ի միջօրէի իբրեւ ընդ խաւար փախիցեն։ 4Զարհուրեցան, եւ ոչ վարեսցիս. զի պանդխտեսցին առ քեզ փախստականքն Մովաբու. եւ եղիցին ձեզ ապաւէն յերեսաց հալածչի. զի բարձաւ ընկեր մարտին քո, եւ իշխանն կորեաւ որ կոխէր զերկիր։՝՝ 5Եւ ուղղեսցի ողորմութեամբ աթոռ, եւ նստցի ի վերայ նորա ճշմարտութեամբ ի յարկսն Դաւթի. դատեսցի եւ խնդրեսցէ զիրաւունս, եւ փութասցի առնել զարդարութիւն։

6Լուաք զամբարտաւանութիւնն Մովաբու, զի հպարտացեալ էր յոյժ. հպարտութիւն նորա եւ ոխակալութիւն, եւ ամբարտաւանութիւնն քո բարձցի ի քէն։ 7Ոչ այնպէս որպէս դիւթութիւնն քո, եւ ոչ այնպէս որպէս ողբանն ի Մովաբ. զի ի Մովաբ ողբասցեն ամենեքեան զայնոսիկ՝ որ բնակեալն են ի Դեսեթ. մրմնջեսցես՝ եւ ոչ պատկառեսցես։ 8Դաշտքն Եսեբոնայ սուգ առցեն, եւ այգիքն Սեբիմայ որ կլանէին զազգս. կոխեցէք զայգիս նորա մինչեւ Յազեր՝ եւ մի՛ հասջիք. մոլորեցայք յանապատի. առաքեալք նորա լքան, քանզի անցին ընդ ծովն։ 9Վասն այսորիկ լացից իբրեւ զլալիւնն Յազերայ զայգիս Սեբիմայ, զծառատունկն քո կոտորեաց Եսեբոն եւ Եղէիղա. զի զհունձս քո եւ զկութս քո կոխեցից, եւ ամենեքեան կործանեսցին։՝՝ 10Եւ բարձցի ուրախութիւն եւ ցնծութիւն յայգեաց, եւ յայգեստանի քում ուրախութիւն մի՛ լիցի՝՝. եւ մի՛ կոխեսցեն գինի ի հնծանս քո քանզի պակասեաց՝՝։ 11Վասն այսորիկ որովայն իմ ի վերայ Մովաբու իբրեւ զքնար հնչեսցէ, եւ զփոր իմ իբրեւ զպարիսպ նորոգեցեր։ 12Եւ եղիցի քեզ այն յամօթ. զի աշխատեցաւ Մովաբ ի մեհեանս իւր, եւ մտցէ ուխտաւոր ի ձեռագործս իւր, եւ մի՛ կարասցեն փրկել զնոսա։՝՝

13Այս բան է զոր խօսեցաւ Տէր երբեմն ի վերայ Մովաբու. 14եւ այժմ դարձեալ խօսեցաւ եւ ասէ. Յերիս ամս ըստ ամաց վարձկանի անարգեսցին փառքն Մովաբու յամենայն ի բազում մեծութեան իւրում, եւ մնասցէ սակաւաւոր եւ ոչ պատուական։