1Տեսիլ Եգիպտացւոց։

Ահաւասիկ Տէր նստեալ ի վերայ թեթեւ ամպոյ՝ եկեսցէ յԵգիպտոս, եւ շարժեսցին ձեռագործք Եգիպտացւոց յերեսաց նորա, եւ սիրտք նոցա լքցին ի նոսա։

2Եւ յարիցեն Եգիպտացիքն՝՝ ի վերայ Եգիպտացւոցն, եւ տայցեն պատերազմ այր ընդ եղբօր եւ այր ընդ ընկերի, քաղաք ընդ քաղաքի եւ օրէնք ընդ օրէնս՝՝։ 3Եւ խռովեսցին ոգիք Եգիպտացւոցն յանձինս իւրեանց, եւ զխորհուրդ նոցա ցրեցից. եւ հարցանիցեն զդիսն իւրեանց եւ զպատկերս իւրեանց, եւ զգետնակոչս եւ զվհուկս։ 4Եւ մատնեցից զԵգիպտացիս ի ձեռս արանց տերանց խստասրտաց, եւ թագաւորք խիստք տիրեսցեն՝՝ նոցա, այսպէս ասէ Տէր Սաբաւովթ։ 5Եւ արբցեն Եգիպտացիքն զջրշեղջսն ծովափնեայս, քանզի՝՝ գետն նուազեսցէ եւ ցամաքեսցի։ 6Եւ պակասեսցեն գետքն եւ ջրադարձք գետոյն, եւ ցամաքեսցին ամենայն ժողովք ջուրցն, եւ յամենայն մարգագետինս եւ յամենայն ամուրս եղեգան եւ պրտուոյ եւ ի լօռամարգս։՝՝ 7Ամենայն կանաչ որ շուրջ զգետովն իցէ, եւ ամենայն արտավարք որ ընդ գետոյն ջրով՝ վարեալ իցեն՝ խորշակահար ցամաքեսցին։ 8Եւ տրտմեսցին ձկնորսքն, եւ յոգոց հանիցեն ամենայն կարթընկէցք գետոյն, եւ ցանցորդքն եւ ուռկանաւորքն՝՝ սուգ առցեն։ 9Ամաչեսցեն եւ կտաւագործքն բարակամանք, եւ որ գործեն զբեհեզն։ 10Եւ եղիցին ճարտարքն ամենայն լի տրտմութեամբ, եւ ամենայն տարազագործք նոցա տրտմեսցին, եւ ցաւեսցին սիրտք իւրեանց։ 11Եւ յիմարեսցին՝՝ իշխանքն Տայանու, իմաստունք խորհրդականք թագաւորին, եւ յիմարեսցին խորհուրդք նոցա. զիա՞րդ ասիցէք ցարքայն՝՝ թէ՝ Որդիք իմաստնոց եմք մեք, եւ որդիք թագաւորաց որ ի սկզբանէն էին։ 12Արդ ո՞ւր են իմաստունքն քո. պատմեսցեն քեզ եւ ասասցեն՝ զի՛նչ խորհուրդ խորհեցաւ Տէր զօրութեանց ի վերայ Եգիպտոսի։

13Յիմարեցան իշխանք Տայանու, եւ բարձրացան իշխանքն Մեմփացւոց, եւ մոլորեցուսցեն զԵգիպտացիսն ըստ ազգաց ազգաց իւրեանց՝՝։ 14Քանզի Տէր խառնեաց նոցա ոգի մոլորութեան, եւ մոլորեցուցին զԵգիպտոս յամենայն գործս իւրեանց, որպէս մոլորիցի արբեալ որ փսխիցէն։ 15Եւ մի՛ եւս եղիցի Եգիպտացւոցն գործ՝ մի՛ յետս եւ մի՛ յառաջ, մի՛ ի սկզբանն եւ մի՛ ի կատարածի՝՝։ 16Յաւուր յայնմիկ եղիցին Եգիպտացիք իբրեւ զկանայս՝ դողացեալք եւ զարհուրեալք յերեսաց ձեռին Տեառն զօրութեանց՝ զոր արկցէ ինքնին ի վերայ նոցա։ 17Եւ եղիցի երկիրն Հրէաստանի ի խրտուիլ Եգիպտացւոցն. եւ ամենայն որ անուանեսցէ զանուն երկրին առ նոսա, զարհուրեսցին վասն խորհրդին զոր խորհեցաւ Տէր զօրութեանց ի վերայ նորա։ 18Յաւուր յայնմիկ եղիցին հինգ քաղաք յերկրին Եգիպտացւոց՝ որ խօսիցին զՔանանացւոց լեզուն, եւ երդնուցուն յանուն Տեառն զօրութեանց. քաղաք Ասեդեկ կոչեսցի մի քաղաք՝՝։ 19Յաւուր յայնմիկ եղիցի սեղան Տեառն յերկրին Եգիպտացւոց, եւ արձան կանգնեալ Տեառն ի սահմանս նորա. 20եւ եղիցի ի նշան յաւիտենից Տեառն՝՝ յերկրին Եգիպտացւոց. զի աղաղակեսցեն առ Տէր վասն նեղութեան իւրեանց, եւ առաքեսցէ նոցա Տէր այր մի որ փրկեսցէ զնոսա, եւ դատաստանաւ՝՝ փրկեսցէ զնոսա։ 21Եւ ծանիցի Տէր Եգիպտացւոցն, եւ ծանիցեն Եգիպտացիքն զՏէր յաւուր յայնմիկ. եւ մատուսցեն զոհս եւ պատարագս, եւ դիցեն ուխտս Տեառն՝ եւ կատարեսցեն։ 22Եւ հարցէ Տէր զԵգիպտացիսն մեծամեծ հարուածովք, եւ բժշկելով բժշկեսցէ զնոսա. եւ դարձցին առ Տէր, եւ լուիցէ նոցա եւ բժշկեսցէ զնոսա։ 23Յաւուր յայնմիկ եղիցի ճանապարհ Եգիպտացւոցն առ Ասորեստանեայսն, եւ մտցեն Ասորեստանեայքն յԵգիպտոս, եւ Եգիպտացիքն երթիցեն առ Ասորեստանեայսն, եւ ծառայեսցեն Եգիպտացիքն Ասորեստանեայցն։ 24Յաւուր յայնմիկ եղիցի Իսրայէլ երրորդ ի մէջ Եգիպտացւոցն եւ ի մէջ Ասորեստանեայցն, օրհնեալ յերկրին. 25զոր օրհնեաց Տէր զօրութեանց, եւ ասէ. Օրհնեալ եղիցի ժողովուրդ իմ որ յԵգիպտոս եւ որ յԱսորեստանեայսն՝՝, եւ ժառանգութիւն իմ Իսրայէլ։