1Պատգամ Տիւրոսի։ Ողբացէք, նաւք Կարքեդոնացւոց, զի կորեան եւ ոչ եւս գայցեն յերկրէն Կիտացւոց. վարեցան ի գերութեան։

2Ո՞ւմ նմանեցան բնակիչք կղզւոյդ այդորիկ. վաճառականք Փիւնիկեցւոց որ անցանեն ընդ ծով, ընդ ջուրս բազումս. 3զաւակ գնողիցն իբրեւ զարդիւնս ամարայնոյ ամփոփելոյ վաճառականք ազգացն՝՝։ 4Յամօթ լեր, Սիդոն, ասէ ծով, եւ զօրութիւն ծովու ասասցէ. Ոչ երկնեցի, եւ ոչ ծնայ, եւ ոչ սնուցի երիտասարդս, եւ ոչ բարձրացուցի կուսանս։ 5Իսկ յորժամ լուր լիցի յերկիրն Եգիպտոսի, ցաւք կալցին զնոսա վասն Տիւրոսի։ 6Երթայք ի Կարքեդոն. ողբացէք, բնակիչք կղզւոյդ այդորիկ։ 7Ո՞չ այդ իսկ էր ամբարտաւանութիւն ձեր ի սկզբանէ, մինչ չեւ մատնեալ էր նորա՝՝. եւ վարեսցի նա յոտից իւրոց ի պանդխտութիւն հեռաւոր։ 8Իսկ ո՞ խորհեցաւ զայս ի վերայ Տիւրոսի. միթէ ի վա՞յր ինչ ոք էր՝ կամ տկա՞ր ոք. նա՝՝ վաճառականք նորա փառաւորք Քանանացւոց, եւ առգնօղք նորա իշխանք երկրի։ 9Տէր զօրութեանց խորհեցաւ քակել զամենայն ամբարտաւանութիւն փառաւորաց, եւ անարգել զամենայն պատուական ի վերայ երեսաց երկրի։ 10Գործեա զերկիր քո, զի այսուհետեւ ոչ եւս գան նաւք ի Կարքեդոնայ. 11եւ ձեռն քո ոչ եւս զօրասցի ի վերայ ծովու, որ զայրացուցանէիր զթագաւորս. Տէր զօրութեանց հրամայեաց վասն Քանանու՝ կորուսանել զզօրութիւն նորա։ 12Եւ ասասցեն եթէ՝ Այսուհետեւ մի՛ եւս յաւելուցուք թշնամանել եւ զրկել զկոյս դուստր Սիոնի. այլ յոտն կաց՝ եւ անց ընդ ծով. եւ թէպէտ եւ դիմեսցես ի Կիտիս, եւ ոչ անդ լիցի քեզ հանգիստ։ 13Եւ եթէ յերկիրն Քաղդէացւոց, սակայն եւ այն աւերեալ է յԱսորեստանեայց, եւ անդ դուլ եւ դադար քեզ ոչ գտանիցի։ Արկ զհիմն նորա Սիհիմ, կանգնեաց զմահարձանս նորա, եւ յարոյց զաշտարակս նորա. արդ անկաւ կործանեցաւ պարիսպ նորա։՝՝ 14Ողբացէք, նաւք Կարքեդոնացւոց, զի կորեաւ ամրութիւն ձեր։ 15Եւ եղիցի յաւուր յայնմիկ, լքեալ լիցի Տիւրոս ամս եւթանասուն՝ իբրեւ զժամանակ թագաւորի միոյ, եւ իբրեւ զժամանակ կենաց մարդոյ միոյ՝՝. եւ յետ ամացն եւթանասնից եղիցի Տիւրոս իբրեւ երգ պոռնկի միոջ։ 16Ա՛ռ քնար, յածեաց, կոծեաց լքեալ քաղաք պոռնկութեան՝՝, քաջ հար. յաճախեա երգել՝ զի քո յիշատակ մնասցէ։ 17Եւ եղիցի յետ ամացն եւթանասնից, այց արասցէ Տէր Տիւրոսի. եւ միւսանգամ անդրէն ի նոյն յառաջին կարգսն հաստատեսցի. եւ եղիցի ի նմա վաճառ ամենայն թագաւորաց՝՝ տիեզերաց ընդ ամենայն երեսս երկրի։ 18Եւ եղիցի վարձ վաճառի նորա Տեառն նուիրեալ. ոչ անձանց ինչ ժողովեսցեն՝՝, այլ բնակելոցն առաջի Տեառն եղիցին ամենայն վաճառք նորա, ուտել, ըմպել եւ ուրախ լինել ի նշան յիշատակաց առաջի Տեառն՝՝։