1Ահաւասիկ Տէր, Տէր զօրութեանց բարձցէ ի Հրէաստանէ եւ յԵրուսաղեմէ զայր հզօր եւ զկին զօրաւոր՝՝, զզօրութիւն հացի եւ զզօրութիւն ջրոյ, 2զհսկայն եւ զզօրաւորն եւ՝՝ զայր պատերազմօղ, եւ զդատաւոր եւ զմարգարէ եւ զքննիչ եւ զծեր, 3եւ զյիսնապետ, եւ զսքանչելին խորհրդական՝՝, եւ զիմաստուն ճարտարապետ, եւ զհանճարեղն զունկնդիր։ 4Եւ կացուցից ի վերայ նոցա մանկունս իշխանս, եւ խաբեբայք տիրեսցեն նոցա։ 5Եւ անկցի ժողովուրդն՝ այր ընդ այր, եւ այր ընդ ընկերի իւրում, ընդհարցի մանուկն ընդ ծերոյն եւ անարգն ընդ պատուականին։ 6Զի բուռն հարկանիցէ այր զեղբօրէ իւրմէ կամ զընտանւոյ հօր իւրոյ, եւ ասիցէ. Հանդերձք գոն քո, լեր մեր իշխան, եւ կերակուր մեր ընդ քեզ՝՝ լիցի։ 7Տացէ պատասխանի յաւուր յայնմիկ եւ ասասցէ. Ոչ եղէց իշխան, զի ոչ գոյ ի տան իմում հաց եւ ոչ հանդերձ, եւ ոչ եղէց իշխան ժողովրդեանս այսմիկ։ 8Զի լքաւ Երուսաղէմ, եւ Հրէաստան կործանեցաւ. եւ լեզուք նոցա անօրէնութեամբք ի Տեառնէ ապստամբեցին։ 9Վասն որոյ խոնարհեցան փառք նոցա, եւ ամօթ երեսաց նոցա ծածկեաց զնոսա,՝՝ եւ զմեղս իւրեանց իբրեւ զՍոդոմացւոցն պատմեցին եւ յայտ արարին. վա՜յ անձանց նոցա՝ զի խորհեցան խորհուրդ չար առանձինն, 10եւ ասեն. Կապեսցուք զարդարն՝ զի դժպհի եղեւ մեզ. այսուհետեւ՝՝ զարդիւնս գործոց իւրեանց կերիցեն։ 11Վա՜յ անօրինին, չարիք ըստ գործոց ձեռաց իւրոց անցցեն ընդ նա։ 12Ժողովուրդ իմ, հարկահանք ձեր ճռաքաղ առնեն զձեզ, եւ պահանջօղք՝՝ տիրեն ձեզ. ժողովուրդ իմ, որ երանենդ ձեզ՝ խաբեն զձեզ, եւ զշաւիղս ոտից ձերոց խռովեցուցանեն։

13Այլ արդ հասցէ Տէր ի դատաստան, եւ կացուսցէ յատենի զժողովուրդ իւր.՝՝ 14ինքնին Տէր ի դատ եկեսցէ ընդ ծերս ժողովրդեան իւրոյ եւ ընդ իշխանս նոցա. դուք զի՞ հրկէզ արարէք զայգի իմ, եւ յափշտակութիւն տնանկին է ի տունս ձեր։ 15Դուք զի՞ զրկէք զժողովուրդ իմ, եւ զերեսս տնանկաց լի առնէք ամօթով, ասէ Տէր՝ Տէր զօրութեանց։

16Այսպէս ասէ Տէր. Փոխանակ զի հպարտացան դստերք Սիոնի, եւ գնացին ի բարձր պարանոց. յօնօք ակնարկէին, եւ ի գնացս իւրեանց քարշէին զստորոտս իւրեանց, եւ ոտիւքն կաքաւէին, 17եւ խոնարհեցուսցէ Աստուած զիշխանս դստեր Սիոնի, եւ մերկասցէ Տէր զզարդ նոցա։՝՝ 18Յաւուր յայնմիկ հանցէ Տէր զփառս հանդերձից նոցա եւ զպատմուճանս նոցա, 19եւ զհիւսս եւ զծամակալս եւ զպսակակալս եւ զմահիկս, 20եւ զզարդ երեսաց նոցա եւ զպաճուճանս զարդու փառաց նոցա, եւ զքօղէս եւ զապարանջանս եւ զմեհեւանդս եւ զգինդս, 21եւ զմատանիս եւ զկշտապանակս նոցա, զդիպակս եւ զճեղանակս. 22զեզրածիրանին եւ զմիջնածիրանին, զառտնին արկանելի եւ զերեւելի լակոնացին, 23զբեհեզն եւ զերկնագոյն եւ զկարմիր շղաշատեռն եւ զճամկաւորն, եւ զոսկեճամուկն եւ զոսկէտտուն։ 24Եւ եղիցի փոխանակ հոտոցն անուշից՝ փոշի, եւ փոխանակ կամարացն՝ չուան գօտի, եւ փոխանակ ոսկի զարդու գլխոյն՝ կնտութիւն՝ վասն գործոց քոց, եւ փոխանակ ոսկեհուռ դիպակին՝ քուրձ զգեցցիս։ 25Եւ որդիդ քո գեղեցիկ զոր սիրես՝ սրով մեռցի, եւ իշխանք ձեր սրով անկցին. 26եւ թշուառասցին եւ սուգ զգեցցին սապատք զարդուց ձերոց, եւ մնասջիր միայն եւ յերկիր կործանեսջիր՝՝։