1Վա՜յ ոյք իջանեն յԵգիպտոս վասն օգնականութեան. որ ի հեծեալս՝՝ եւ ի կառս յուսացեալ իցեն՝ թէ բազումք են, եւ բազմութիւն երիվարաց՝՝ յոյժ. եւ ոչ էին յուսացեալ ի Սուրբն Իսրայելի, եւ զԱստուած ոչ խնդրեցին։ 2Եւ նա իմաստուն էր՝ եւ ածէր ի վերայ նոցա չարիս. եւ բան նորա ոչ անարգեսցի՝՝. եւ յարիցէ ի վերայ տանց մարդոց չարաց, եւ ի վերայ սնոտի յուսոյն նոցա. 3յայր Եգիպտացի՝ եւ ոչ յԱստուած, ի մարմինս երիվարաց՝ եւ ոչ գոյր օգնականութիւն՝՝. այլ Տէր արկցէ ի վերայ նոցա զձեռն իւր, եւ տաժանեսցին օգնականքն, եւ կործանեսցին օգնեալքն ի նոցանէն. եւ առ հասարակ ամենեքեան սատակեսցին։ 4Զի այսպէս ասաց ցիս Տէր, թէ՝ Զոր օրինակ գոչեսցէ առեւծ եւ կորիւն առիւծու յո՛րս յոր հասանիցէ, կոչեսցէ ի վերայ եւ լցցէ զլերինս բարբառով իւրով, եւ ի պարտութիւն մատնեսցին, եւ ի սաստկութենէ սրտմտութեան նորա հալեսցին՝՝, այնպէս իջցէ Տէր զօրութեանց ի լեառն Սիոն, եւ ի վերայ լերանց՝՝ դորա։ 5Իբրեւ զթռչունս թռուցեալս, այնպէս հովանի լիցի Տէր զօրութեանց ի վերայ Երուսաղեմի. ի թիկունս իջցէ, օգնեսցէ եւ փրկեսցէ եւ կեցուսցէ։

6Դարձարուք ոյք խորհիք խորհուրդս խորինս եւ զանօրէնս՝՝, որդիք Իսրայելի։ 7Զի յաւուր յայնմիկ բարձցեն մարդիկ զձեռագործս իւրեանց՝՝ զարծաթեղէնս եւ զոսկեղէնս՝ զոր արարին ձեռք նոցա ի մեղս։ 8Եւ անկցի Ասորեստանեայն, ոչ սրով առն, եւ ոչ սուր մարդոյ կերիցէ զնա. եւ ի փախուստ դարձցի՝ ոչ յերեսաց սուսերի, եւ երիտասարդք նորա ի պարտութիւն մատնեսցին։ 9Եւ եղիցին վիմարգելք իբրեւ զորմարգելս. եւ ի պարտութիւն մատնեսցին, եւ որ փախիցէն՝ ըմբռնեսցի։ Այսպէս ասէ Տէր. Երանի որ ունիցի զաւակ ի Սիոն, եւ ընտանեակք իցեն նորա յԵրուսաղէմ։՝՝