1Եւ եղեւ յետ վախճանելոյն Յեսուայ՝ հարցանէին որդիքն Իսրայելի զՏէր եւ ասէին. Ո՞ ելցէ մեզ առ Քանանացին առաջնորդ՝ պատերազմել ընդ նմա։ 2Եւ ասէ Տէր. Յուդա ելցէ. զի ետու զերկիրն ի ձեռս նորա։ 3Եւ ասէ Յուդա ցՇմաւոն ցեղբայր իւր. Ել ընդ իս ի վիճակիս իմում, եւ տացուք պատերազմ ընդ Քանանացիսն. եւ եկից եւ ես ընդ քեզ ի քում վիճակին։ Եւ գնաց ընդ նմա Շմաւոն։ 4Եւ ել Յուդա, եւ ետ Տէր զՔանանացին եւ զՓերեզացին ի ձեռս նորա. եւ եհար՝՝ զնոսա ի Բեզեկ տասն հազար արանց։ 5Եւ գտին զԱդոնիբեզեկ ի Բեզեկ, եւ ետուն պատերազմ ընդ նմա. եւ հարին զՔանանացին եւ զՓերեզացին։ 6Եւ փախեաւ Ադոնիբեզեկ. եւ պնդեցան զհետ նորա, եւ հասին նմա, եւ կտրեցին զծայրս ձեռաց նորա եւ զծայրս՝՝ ոտից նորա։ 7Եւ ասէ Ադոնիբեզեկ. Եւթանասուն թագաւորք ծայրակտուրք ձեռօք եւ ոտիւք էին, որ քաղէին զփշրանս ի ներքոյ սեղանոյ իմոյ. արդ որպէս արարի, նոյնպէս հատոյց ինձ Աստուած։ Եւ ածին զնա յԵրուսաղէմ, եւ անդ մեռաւ։

8Եւ պատերազմէին որդիքն Յուդայ ընդ Երուսաղեմի, եւ առին զնա, եւ հարին զնա սրով սուսերի, եւ զքաղաքն այրեցին հրով։

9Եւ յետ այնորիկ իջին որդիքն Յուդայ պատերազմել ընդ Քանանացւոյն բնակելոյ ի լեռնակողման եւ ի հարաւ եւ ի դաշտավայրս։ 10Եւ գնաց Յուդա ի վերայ Քանանացւոյն բնակելոյ ի Քեբրոն. եւ ել Քեբրոն ընդդէմ.՝՝ եւ էր անուն Քեբրոնի յառաջ՝ Կարիաթարբոկ Սեփեր. եւ հարին զՍեսի եւ զԱքիման եւ զԹոլմի։ զծնունդսն Ենակայ։՝՝ 11Եւ ելին անտի ի վերայ բնակչացն Դաբիրայ. եւ անուն Դաբիրայ էր յառաջագոյն Քաղաք Նամակաց։ 12Եւ ասէ Քաղէբ. Որ ոք հարցէ զքաղաք Նամակաց եւ առցէ զնա, տաց նմա զԱքսա զդուստր իմ կնութեան։ 13Եւ ա՛ռ զնա Գոդոնիէլ որդի Կենեզի եղբայր Քաղեբայ՝ կրտսեր քան զնա. եւ ետ նմա Քաղէբ զԱքսա զդուստր իւր կնութեան։ 14Եւ եղեւ ի գնալն նորա, յորդորեաց զնա Գոդոնիէլ խնդրել ի հօրէ իւրմէ ագարակ. եւ տրտնջեաց եւ աղաղակեաց յիշոյ անտի, եւ ասէ. Յերկիր հարաւոյ ետուր զիս՝՝։ Եւ ասէ ցնա Քաղէբ. Զի՞ է քեզ։ 15Եւ ասէ ցնա Աքսա. Տուր ինձ օրհնութիւն, զի յերկիր հարաւոյ ետուր զիս, եւ տացես ինձ զբօսանս ջրոց։ Եւ ետ նմա Քաղէբ ըստ սրտի նորա՝՝ զբօսանս բարձանց, եւ զբօսանս հովտաց։

16Եւ որդիքն Յոբաբայ Կինեցւոյ աներոյն Մովսիսի ելին ի քաղաքէն Արմաւենեաց առ որդիսն Յուդայ ի յանապատն Յուդայ, որ է ի հարաւոյ Յուդայ, առ զառիվայրին՝՝ Արադայ, եւ գնացին բնակեցան ընդ ժողովրդեանն։ 17Եւ գնաց Յուդայ ընդ Շմաւոնի եղբօր իւրոյ, եւ հարին զՔանանացին բնակեալ ի Սեփաթ, եւ նզովեցին զնա եւ սատակեցին զնա՝՝. եւ կոչեցին զանուն քաղաքին Սատակումն։ 18Եւ ոչ ժառանգեաց Յուդա զԳազա եւ զսահմանս նորա, եւ զԱսկաղոն եւ զսահմանս նորա, եւ զԱկկարոն եւ զսահմանս նորա, եւ զԱզովտոս եւ զանդաստանս նորա։՝՝ 19Եւ էր Տէր ընդ Յուդայ, եւ ժառանգեաց զլեառնն, զի ոչ կարացին ժառանգել զբնակիչս հովտացն. զի Ռեքաբ զատոյց զնոսա. եւ՝՝ կառք երկաթիք էին նոցա։ 20Եւ ետուն Քաղեբայ զՔեբրոն որպէս եւ խօսեցաւ Մովսէս. եւ ժառանգեաց անտի զերիս քաղաքս որդւոցն Ենակայ,՝՝ եւ եբարձ անտի զերեսին որդիսն Ենակայ։

21Եւ զՅեբուսացին զբնակեալն յԵրուսաղէմ ոչ ժառանգեցին որդիքն Բենիամինի. եւ բնակեաց Յեբուսացին ընդ որդիսն Բենիամինի յԵրուսաղէմ մինչեւ ցայսօր։

22Եւ ելին որդիքն Յովսեփու եւ ինքեանք ի Բեթէլ, եւ Տէր ընդ նոսա։ 23Եւ բանակեցան տունն Իսրայելի ի Բեթէլ՝՝. եւ անուն քաղաքին էր յառաջ Լուզա։ 24Եւ տեսին պահապանքն զայր մի ելեալ ի քաղաքէ անտի. կալան զնա եւ ասեն՝՝. Ցոյց մեզ զմուտ քաղաքիդ, եւ արասցուք ընդ քեզ ողորմութիւն։ 25Եւ եցոյց նոցա զմուտ քաղաքին. եւ հարին զքաղաքն սրով սուսերի. եւ զայրն եւ զազգատոհմն իւր արձակեցին։ 26Եւ գնաց այրն յերկիրն ի Քետիմ, եւ շինեաց անդ քաղաք, եւ կոչեաց զանուն նորա Լուզա. եւ այն է անուն նորա մինչեւ ցայսօր։ 27Եւ ոչ ժառանգեաց Մանասէ զԲեթսան որ է Սկիւթուպօլիս՝՝, եւ ոչ զդստերս նորա եւ ոչ զանդաստանս նորա՝՝, եւ ոչ զԹանաք եւ զդստերս նորա, եւ ոչ զբնակիչսն Դովրայ եւ ոչ զշուրջ բնակեալսն զնովաւ՝՝ եւ ոչ զդստերս նորա. եւ ոչ զբնակիչս Բաղակայ եւ ոչ զշուրջ բնակեալսն զնովաւ եւ ոչ զդստերս նորա.՝՝ եւ ոչ զբնակիչս Յեբղամայ եւ ոչ զշուրջ բնակեալսն զնովաւ եւ՝՝ ոչ զդստերս նորա. եւ սկսաւ՝՝ Քանանացին բնակել յերկրին յայնմիկ։ 28Եւ եղեւ իբրեւ զօրացաւ Իսրայէլ՝ եդ զՔանանացին ընդ հարկաւ, եւ բառնալով ոչ եբարձ զնա։

29Եւ Եփրեմ ոչ եբարձ զՔանանացին զբնակեալն ի Գազեր. եւ բնակեաց Քանանացին ի մէջ նորա ի Գազեր, եւ եղեւ նմա հարկատու։՝՝

30Եւ Զաբուղոն ոչ եբարձ զբնակիչսն Կեդրոնի եւ զբնակիչսն Ամանայ. եւ բնակեաց Քանանացին ի մէջ նորա, եւ եղեւ նմա հարկատու։

31Եւ Ասեր ոչ եբարձ զբնակիչսն Ակքովայ, եւ եղեւ նմա հարկատու. եւ զբնակիչսն Դովրայ,՝՝ եւ զբնակիչսն Սիդոնի, եւ զբնակիչսն Աքլափայ, եւ զԱքազիփ եւ զԵլփա եւ զԱփեկ եւ զՌովբ. 32եւ բնակեաց Ասեր ի մէջ Քանանացւոյն բնակելոյն յերկրին. քանզի ոչ կարացին բառնալ զնա։

33Եւ Նեփթաղիմ ոչ եբարձ զբնակիչսն Բեթսամիւսայ եւ ոչ զբնակիչսն Բեթանաթայ. եւ բնակեաց Նեփթաղիմ ի մէջ Քանանացւոյն բնակելոյ յերկրին. եւ բնակիչքն Բեթսամիւսայ եւ Բեթանաթայ եղեն նմա հարկատուք։

34Եւ նեղեաց Ամովրհացին զորդիսն Դանայ ի լերինն, զի ոչ տայր նոցա թոյլ իջանել ի հովիտսն։ 35Եւ սկսաւ Ամովրհացին բնակել ի լերինն Մուրտաստանի, ուր արջք եւ աղուէսք ի Մուրտաստանսն՝՝ եւ ի Սաղապին. եւ ծանրացաւ ձեռն Յովսեփայ ի վերայ Ամովրհացւոյն, եւ եղեն նոցա հարկատուս. 36զի սահման Ամովրհացւոյն Եդովմայեցին էր ի վերայ զառիվայրին Ակրաբիմայ ի Վիմէն եւ ի վեր։