1Եւ յարեաւ յետ Աբիմելեքայ փրկել զԻսրայէլ Թովղա որդի Փուայ, որդի հօրեղբօր նորա՝՝, այր յԻսաքարայ. եւ նա բնակէր ի Սամարիա, ի լերինն Եփրեմայ։ 2Եւ դատեաց զԻսրայէլ ամս քսան եւ երիս, եւ մեռաւ եւ թաղեցաւ ի Սամարիա։

3Եւ յարեաւ յետ նորա Յայիր Գաղաադացի, եւ դատեաց զԻսրայէլ ամս քսան եւ երկուս։ 4Եւ եղեն նորա որդիք երեսուն եւ երկու՝՝, որ հեծանէին յերեսուն եւ երկու՝՝ յովանակս. եւ երեսուն եւ երկու՝՝ քաղաքք նոցա. եւ կոչեաց զնոսա աւանս Յայիրայ մինչեւ ցայսօր, որ են ի Գաաղադ։ 5Եւ մեռաւ Յայիր եւ թաղեցաւ ի Կամովն։

6Եւ յաւելին որդիքն Իսրայելի առնել չար առաջի Տեառն, եւ պաշտեցին զԲահաղիմսն եւ զԱստարովթն, եւ զաստուածս Ասորւոց եւ զաստուածս Սիդոնայ եւ զաստուածս Մովաբայ եւ զաստուածս որդւոցն Ամոնայ եւ զաստուածս այլազգեացն. եւ թողին զՏէր եւ ոչ ծառայեցին նմա։ 7Եւ սրտմտեցաւ բարկութեամբ Տէր Իսրայելի, եւ մատնեաց զնոսա ի ձեռս այլազգեացն, եւ ի ձեռս որդւոցն Ամոնայ։ 8Եւ խախտեցին եւ խորտակեցին զորդիսն Իսրայելի ի ժամանակին յայնմիկ ամս ութուտասն, զամենայն Իսրայելացիս յայնկոյս Յորդանանու, յերկրի Ամովրհացւոցն ի Գաղաադ։ 9Եւ անցին որդիքն Ամոնայ ընդ Յորդանան տալ պատերազմ ընդ Յուդայ եւ ընդ Բենիամին, եւ ընդ տանն Եփրեմայ. եւ նեղեցան որդիքն Իսրայելի յոյժ։

10Եւ աղաղակեցին որդիքն Իսրայելի առ Տէր եւ ասեն. Մեղաք քեզ, զի թողաք զԱստուածդ մեր եւ պաշտեցաք զԲահաղիմսն։ 11Եւ ասէ Տէր ցորդիսն Իսրայելի. Ո՞չ ապաքէն Եգիպտացիք եւ Ամովրհացիք եւ որդիք Ամոնայ եւ Մովաբ՝՝ եւ այլազգիք 12եւ Սիդոնացիք եւ Ամաղէկ եւ Քանան նեղեցին զձեզ, եւ աղաղակեցէք առ իս եւ փրկեցի զձեզ ի ձեռաց նոցա։ 13Եւ դուք թողէք զիս եւ ծառայեցէք աստուածոց օտարաց. վասն այնորիկ ոչ յաւելից փրկել զձեզ։ 14Երթայք աղաղակեցէք առ աստուածսն զոր ընտրեցէք ձեզ, եւ նոքա փրկեսցեն զձեզ ի ժամանակի նեղութեանց ձերոց։ 15Եւ ասեն որդիքն Իսրայելի ցՏէր. Մեղաք, արա դու ընդ մեզ զամենայն որ ինչ հաճոյ թուի առաջի քո. բայց, Տէր, միայն ապրեցո զմեզ յաւուր յայսմիկ։ 16Եւ մերժեցին զաստուածսն օտարոտիս ի միջոյ իւրեանց, եւ պաշտեցին զՏէր միայն. եւ ոչ հաշտեցաւ ընդ ժողովրդեանն. եւ յոգիս ապաստան եղեւ յաշխատութենէ՝՝ Իսրայելի։

17Եւ ելին որդիքն Ամոնայ եւ բանակեցան ի Գաղաադ. եւ ելին որդիքն Իսրայելի եւ բանակեցան ի դիտանոցին։ 18Եւ ասեն իշխանք ժողովրդեանն Գաղաադու այր ցընկեր իւր. Այր որ սկիզբն առնիցէ պատերազմել ընդ որդիսն Ամոնայ, եղիցի գլուխ ամենայն բնակչացս Գաղաադու։