1Եւ եղեւ յետ աւուրց, յաւուրս հնձոց ցորենոյ, այց արար Սամփսոն կնոջ իւրում, ածեալ ուլ մի յայծեաց, եւ ասէ. Մտից առ կին իմ ի սենեակ։ Եւ ոչ եթող զնա հայրն նորա մտանել առ նա։ 2Եւ ասէ հայրն նորա. Ասելով ասացի թէ ատեցեր զնա, եւ ետու զնա ընկերի քում, ո՞չ աւանիկ քոյր նորա կրտսեր լաւագոյն է քան զնա, եղիցի սա քեզ փոխանակ նորա։ 3Եւ ասէ Սամփսոն. Անպարտ եմ ես միանգամայն յայլազգեացդ, եթէ արարից ես ընդ դոսա չարութիւն։ 4Եւ գնաց Սամփսոն, եւ կալաւ երեք հարեւր աղուէս. եւ ա՛ռ ջահս եւ կապեաց զնոսա ընդ միմեանս ձետ ընդ ձետ, եւ եդ զջահսն ի մէջ երկուց ձետոցն, եւ կապեաց ի միջոցին զջահսն. 5եւ ելոյց հուր ի ջահսն, եւ արձակեաց յոճ այլազգեացն. եւ այրեաց զօրանն, եւ զյառաջագոյն հնձեալսն՝՝ ի բարդից մինչեւ ցկանգնաւորն, եւ մինչեւ ցայգիս եւ ցձիթենիս։ 6Եւ ասեն այլազգիքն. Ո՞ արար զայս։ Եւ ասեն. Սամփսոն փեսայ Թամնացւոյն. զի եհան զկին նորա եւ ետ ընկերի նորա։ Եւ ելին այլազգիքն եւ այրեցին զտուն հօր նորա, եւ՝՝ զկինն եւ զհայր նորա հրով։ 7Եւ ասէ ցնոսա Սամփսոն. Եթէ դոյն չափ եւս առնիցէք, սակայն ոչ հաճեցայց. այլ զվրէժ իմ իւրաքանչիւր ումեքէ ի ձէնջ խնդրեցից՝՝։ 8Եւ եհար զնոսա ի սրօնից մինչեւ ցերանս հարուածս մեծամեծս. եւ էջ բնակեցաւ առ հեղեղատաւն յայրին՝՝ Ետեմայ։

9Եւ ելին այլազգիքն, եւ բանակեցան զՅուդայիւ, եւ անկան զԵլքեաւ՝՝։ 10Եւ ասէ ցնոսա այր Յուդայ. Ընդէ՞ր ելէք ի վերայ իմ։ Եւ ասեն այլազգիքն. Կապել զՍամփսոն ելաք, եւ առնել ընդ նա զոր օրինակ արար ընդ մեզ։ 11Եւ իջին երեք հազարք արանց Յուդայ ի ծագ վիմին Ետեմեայ, եւ ասեն ցՍամփսոն. Ո՞չ գիտես զի իշխեն մեզ այլազգիքն, եւ ընդէ՞ր արարեր զայն ընդ մեզ։ Եւ ասէ ցնոսա Սամփսոն. Որպէս արարին ընդ իս, նոյնպէս արարի ընդ նոսա։ 12Եւ ասեն ցնա. Կապել զքեզ իջաք, եւ մատնել ի ձեռս այլազգեացն։ Եւ ասէ ցնոսա Սամփսոն. Երդուարուք ինձ դուք չսպանանել զիս եւ տուք զիս ցնոսա. եւ դուք մի՛ երբեք պատահիցէք ինձ՝՝։ 13Եւ երդուան նմա եւ ասեն. Ոչ, այլ կապելով կապեսցուք զքեզ, եւ տացուք ի ձեռս նոցա. բայց մահու ոչ սպանցուք զքեզ։ Եւ կապեցին զնա երիւք կարովք նորովք, եւ հանին զնա ի վիմէն։

14Եւ եկն մինչեւ ցԾնօտն. եւ այլազգիքն աղաղակեցին եւ ընթացան ընդդէմ նորա. եւ յաջողեցաւ ի վերայ նորա Հոգի Տեառն, եւ եղեն կարքն ի բազուկս նորա իբրեւ զխծուծ յորժամ ի հուր հոտոտիցի, եւ հալեցան կապանքն ի բազկաց նորա։ 15Եւ եգիտ ծնօտ մի իշոյ ընկեցեալ, ձգեաց զձեռն իւր եւ ա՛ռ զնա, եւ եհար նովաւ հազար այր։ 16Եւ ասէ Սամփսոն. Ծնօտիւ իշոյ ջնջելով ջնջեցից զնոսա, զի՝՝ ծնօտիւ իշոյ կոտորեցի հազար այր։ 17Եւ եղեւ իբրեւ կատարեաց զխօսելն, ընկէց զծնօտն ի ձեռանէ իւրմէ. եւ կոչեաց զտեղին Կոտորած ծնօտի։

18Եւ ծարաւեցաւ յոյժ, եւ աղաղակեաց առ Տէր եւ ասէ. Դու յաջողեցեր ձեռամբ ծառայի քո զփրկութիւնս զայս մեծ. եւ արդ մեռանիցի՞մք ի ծարաւոյ, եւ անկանիցի՞մ ի ձեռս անթլփատից։ 19Եւ եբաց Տէր զծակ ծնօտին՝՝, եւ ել ի նմանէ ջուր, եւ արբ. եւ դարձաւ ոգի իւր առ ինքն եւ զովացաւ. վասն այնորիկ կոչեաց զանուն նորա Աղբեւր անուանեալ ծնօտի՝ մինչեւ ցայսօր։ 20Եւ դատեաց զԻսրայէլ յաւուրս այլազգեացն ամս քսան։