1Եւ գնաց Աբիմելէք որդի Յերոբաաղայ ի Սիկիմ առ եղբարս մօր իւրոյ, եւ խօսեցաւ ընդ նոսա եւ ընդ ամենայն ազգատոհմի տան հօր մօր իւրոյ եւ ասէ. 2Խօսեցարուք յականջս ամենայն արանց Սիկիմացւոց. Ո՞ր լաւ իցէ ձեզ, իշխել ձեզ եւթանասո՞ւն արանց ամենայն որդւոցն Յերոբաաղայ, եթէ տիրել ձեզ առն միոջ. եւ յիշեցէք զի ոսկր ձեր եւ մարմին ձեր եմ ես։ 3Եւ խօսեցան զնմանէ եղբարք մօր նորա յականջս ամենայն արանց Սիկիմացւոց զամենայն բանս զայսոսիկ. եւ միտեցաւ սիրտ նոցա զկնի Աբիմելեքայ, զի ասացին թէ՝ Եղբայր մեր է։ 4Եւ ետուն նմա եւթանասուն արծաթոյ ի տանէ Բահաղու Բերիթայ ուխտին, եւ վարձեցաւ նոքօք Աբիմելէք արս սրիկայս եւ զարհուրեցուցիչս, եւ գնացին զհետ նորա։ 5Եւ եմուտ ի տուն հօր իւրոյ յԵփրա, եւ կոտորեաց զեղբարս իւր զորդիսն Յերոբաաղայ արս եւթանասուն, ի վերայ վիմի միոյ. եւ մնաց Յովաթամ որդի Յերոբաաղայ կրտսեր, քանզի թաքեաւ։ 6Եւ ժողովեցան ամենայն արք Սիկիմացւոց եւ ամենայն տունն Մաաղոնայ, եւ չոգան թագաւորեցուցին զԱբիմելէք ի թագաւոր՝ առ կաղնեաւ կռուոյն որ ի Սիկիմա։

7Եւ ազդ եղեւ Յովաթամայ, ել գնաց եւ եկաց ի վերայ գլխոյ լերինն ի Գարիզին. ամբարձ զձայն իւր եւ ելաց, եւ ասէ ցնոսա. Լուարուք ինձ, արք Սիկիմացւոց, եւ լուիցէ ձեզ Աստուած։ 8Գնալով գնացին ծառք օծանել իւրեանց թագաւոր, եւ ասեն ցձիթենին. Թագաւորեա ի վերայ մեր։ 9Եւ ասէ ցնոսա ձիթենին. Թողից զպարարտութիւն իմ յորոյ փառաւորեաց զիս Աստուած եւ մարդիկ՝՝, եւ երթայցեմ իշխե՞լ ծառոց։ 10Եւ ասեն ծառքն ցթզենին. Եկ թագաւորեա ի վերայ մեր։ 11Եւ ասէ ցնոսա թզենին. Թողեալ զքաղցրութիւն իմ եւ զբերս բարութեան իմոյ, եւ երթայցեմ իշխա՞ն լինել փայտից։ 12Եւ ասեն ծառքն ցորթ. Եկ թագաւորեա ի վերայ մեր։ 13Եւ ասէ ցնոսա որթ. Թողեալ զգինի իմ եւ զուրախութիւն Աստուծոյ եւ մարդկան, եւ երթայցեմ իշխա՞ն լինել փայտից։ 14Եւ ասեն ծառքն ցդժնիկ. Եկ թագաւորեա ի վերայ մեր։ 15Եւ ասէ դժնիկ ցծառս. Թէ արդարեւ օծանիցէք զիս թագաւորել ի վերայ ձեր, եկայք ծածկեցարուք ընդ հովանեաւ իմով, եթէ ոչ, ելանիցէ հուր ի դժնկէ աստի, եւ կերիցէ զեղեւնափայտս Լիբանանու։ 16Եւ արդ եթէ ճշմարտութեամբ եւ բովանդակութեամբ արարէք եւ թագաւորեցուցէք զԱբիմելէք, եւ թէ որպէս՝՝ արարէք Յերոբաաղ եւ ընդ տուն նորա, եւ եթէ ըստ հատուցման ձեռին նորա արարէք նմա, 17որպէս ետ պատերազմ հայր իմ փոխանակ ձեր, եւ ընկէց զանձն իւր յառաջ, եւ ապրեցոյց զձեզ ի ձեռաց Մադիամու, 18եւ դուք յարեայք ի վերայ տան հօր իմոյ այսօր, եւ կոտորեցէք զորդիս նորա, արս եւթանասուն ի վերայ վիմի միոյ, եւ թագաւորեցուցէք զԱբիմելէք զորդի աղախնոյ նորա ի վերայ արանց Սիկիմացւոց, զի եղբայր ձեր է. 19եթէ ճշմարտութեամբ եւ բովանդակութեամբ արարէք ընդ Յերոբաաղայ եւ ընդ տան նորա յաւուրս յայսմիկ, օրհնեսջիք դուք եւ՝՝ ուրախ լիջիք յԱբիմելէք, եւ ուրախ լիցի եւ նա ի ձեզ. 20ապա թէ ոչ, ելցէ հուր յԱբիմելեքայ եւ կերիցէ զարս Սիկիմացւոց, եւ զտունն Մաաղոնայ. ապա թէ ոչ,՝՝ ելցէ հուր յարանց Սիկիմացւոց եւ ի տանէն Մաաղոնայ եւ կերիցէ զԱբիմելէք։ 21Եւ փախեաւ Յովաթամ եւ զերծաւ, եւ գնաց ընդ ճանապարհն ի Բերա, եւ բնակեաց անդ յերեսաց Աբիմելեքայ եղբօր իւրոյ։

22Եւ իշխեաց Աբիմելէք ի վերայ Իսրայելի ամս երիս։ 23Եւ առաքեաց Աստուած ոգի չար ի մէջ Աբիմելեքայ եւ ի մէջ արանց Սիկիմացւոց, եւ արհամարհեցին արք Սիկիմացւոց զտունն Աբիմելեքայ՝՝ 24ածել ի վերայ նորա զանիրաւութիւն եւթանասնից որդւոցն Յերոբաաղայ, եւ հասուցանել զարիւն նոցա ի վերայ Աբիմելեքայ եղբօրն իւրեանց որ կոտորեաց զնոսա, եւ ի վերայ արանց Սիկիմացւոց՝ զի զօրացուցին զձեռս նորա կոտորել զեղբարս իւր։ 25Եւ գործեցին նմա դարան արք Սիկիմացւոց ի վերայ գլխոց լերանց, եւ յափշտակէին զամենեսին որ անցանէին առ նոքօք ընդ ճանապարհն. եւ ազդ եղեւ Աբիմելեքայ։ 26Եւ եկն Գաաղ որդի Աբեդդայ եւ եղբարք նորա. եւ անցին ի Սիկիմ, եւ վստահ եղեն ի նա արք Սիկիմացւոց. 27եւ ելին յանդաստանսն եւ կթեցին զայգիս իւրեանց, եւ հարին հնձանս, եւ արարին պարանցիկս, եւ մտին ի տուն աստուածոյն իւրեանց. եւ կերան եւ արբին եւ անիծին զԱբիմելէք։ 28Եւ ասէ Գաաղ որդի Աբեդդայ. Ո՞ է Աբիմելէք, եւ ո՞ է որդին Սիքեմայ՝՝ զի ծառայեմք նմա. ո՞չ նա է որդի Յերոբաաղայ, եւ Զեբուղ ծառայ իւր՝՝ ոստիկան նորա, հանդերձ արամբք՝՝ Եմովրայ հօր Սիքեմայ. եւ զի՞ է զի ծառայիցեմք նմա։ 29Եւ ո՜ տայր զժողովուրդս զայս ի ձեռս իմ, եւ փոխէի զԱբիմելէք. եւ ասէի ցԱբիմելէք. Բազմացո զզօրս քո եւ ել ինձ։

30Եւ լուաւ Զեբուղ իշխան քաղաքին զբանս Գաաղայ որդւոյ Աբեդդայ, եւ սրտմտեցաւ բարկութեամբ. 31եւ առաքեաց առ Աբիմելէք հրեշտակս պատարագօք եւ ասէ. Ահաւասիկ Գաաղ որդի Աբեդդայ եւ եղբարք նորա եկին ի Սիկիմ, եւ պաշարեն զքաղաքս ի վերայ քո։ 32Արդ արի զցայգ դու եւ զօրդ քո որ ընդ քեզ է, եւ դարանամուտ լեր յանդաստանին. 33եւ եղիցի ընդ առաւօտսն ի ծագել արեգականն՝ կանխեսցես եւ հասցես զքաղաքաւս. եւ ահա սա եւ զօրս որ ընդ սմա է ելանէ առ քեզ. եւ արասցես ընդ սա որպէս ինչ գտցէ ձեռն քո։

34Եւ յարեաւ Աբիմելէք եւ ամենայն զօրն որ ընդ նմա զցայգ, եւ մտին ի դարանս զՍիկիմաւ չորք առաջք։ 35Եւ եղեւ ընդ առաւօտն՝՝ ել Գաաղ որդի Աբեդդայ եւ եկաց ի մուտս դրան քաղաքին. եւ յարեաւ Աբիմելէք եւ ամենայն զօրն որ ընդ նմա ի դարանացն։ 36Եւ ետես Գաաղ որդի Աբեդդայ զզօրն, եւ ասէ ցԶեբուղ. Ահաւանիկ զօր իջանէ ի գլխոյ լերանցն. եւ ասէ ցնա Զեբուղ. Զստուեր լերանցն տեսանես դու իբրեւ զմարդիկ։ 37Եւ յաւել եւս խօսել Գաաղ եւ ասէ. Ահաւասիկ զօր իջանէ ընդ ծովակողմն՝՝ առ պորտով երկրին, եւ առաջ մի ել ընդ ճանապարհ կաղնւոյն դիտանոցաց։ 38Եւ ասէ ցնա Զեբուղ. Արդ ո՞ւր է բերան քո որ ասէր, թէ՝ Ո՞վ է Աբիմելէք, զի ծառայեսցուք նմա. ո՞չ աւանիկ այն զօր է զոր դուն աղարտէիր. արդ ել եւ տուր ընդ նմա պատերազմ։ 39Եւ ել Գաաղ առաջի արանցն Սիկիմացւոց, եւ մարտեաւ ընդ Աբիմելեքայ։ 40Եւ հալածեաց զնա Աբիմելէք. եւ փախեաւ յերեսաց նորա, եւ անկան վիրաւորք բազումք մինչեւ ցդրունս քաղաքին։ 41Եւ նստաւ Աբիմելէք յԱրիմ, եւ եհան Զեբուղ զԳաաղ եւ զեղբարս նորա զի մի՛ բնակեսցեն ի Սիկիմ։ 42Եւ եղեւ ի վաղիւ անդր եւ ել ժողովուրդն ի դաշտն, եւ ազդ եղեւ Աբիմելեքայ. 43եւ առ զզօրն եւ բաժանեաց յերիս առաջս, եւ եմուտ նովաւ ի դարան. եւ ետես, եւ ահա զօր ելանէր ի քաղաքէ անտի. եւ յարեաւ ի վերայ նոցա եւ եհար զնոսա։ 44Եւ Աբիմելէք եւ գունդքն որ ընդ նմա՝ ճակատեցան եւ կացին առ դրան քաղաքին. եւ երկու գունդքն սփռեցան ի վերայ ամենեցուն որ յանդաստանսն էին, եւ հարին զնոսա։ 45Եւ Աբիմելէք պատերազմէր ընդ քաղաքին զօրն զայն ողջոյն, եւ առին զքաղաքն, եւ զժողովուրդն որ ի նմա կոտորեցին, եւ զքաղաքն կործանեցին եւ աղարտ վարեցին։

46Եւ լուան ամենայն արք աշտարակին Սիկիմացւոց, եւ եկին յամրոց տանն Բեթէլ Բերիթայ։ 47Եւ ազդ եղեւ Աբիմելեքայ եթէ ժողովեցան ամենայն արք աշտարակին Սիկիմացւոց։ 48Եւ ել Աբիմելէք ի լեառնն Սելմոն, ինքն եւ ամենայն զօրն որ ընդ նմա, եւ ա՛ռ Աբիմելէք տապար ի ձեռն իւր եւ կոտորեաց բեռն մի փայտի, եւ առ զայն եւ եդ զայն ի վերայ ուսոց իւրոց, եւ ասէ ցզօրն իւր. Զինչ տեսանիցէք յիս զոր առնիցեմ, արասջիք եւ դուք վաղվաղակի իբրեւ զիս։ 49Կոտորեցին եւ նոքա իւրաքանչիւր ոք ամենեքին բեռն մի փայտ, եւ բարձին եւ գնացին զհետ Աբիմելեքայ. եւ եդին ի վերայ ամրոցին՝՝, եւ այրեցին ի վերայ նոցա զամրոցն հրով. եւ մեռան ամենայն արք աշտարակին Սիկիմացւոց իբրեւ հազար մի՝ ընդ այր եւ ընդ կին։

50Եւ չոգաւ Աբիմելէք ի Թեբէս, եւ նստաւ շուրջ զնովաւ, եւ առ զնա։ 51Եւ աշտարակ մի էր հզօր ի մէջ քաղաքին, եւ փախեան անդր ամենայն արք եւ կանայք եւ ամենայն գլխաւորք քաղաքին, եւ փակեցին ընդդէմ իւրեանց, եւ ելին ի տանիս աշտարակին։ 52Եւ եկն Աբիմելէք մինչեւ ցաշտարակն, եւ մարտեաւ ընդ նմա, եւ մերձեցաւ Աբիմելէք ի դուրս աշտարակին. 53եւ ընկէց կին մի բեկոր երկանի ի վերայ գլխոյ նորա, եւ մանրեաց զգագաթն Աբիմելեքայ։ 54Եւ աղաղակեաց վաղվաղակի առ պատանեակն կապարճակիր իւր եւ ասէ ցնա. Մերկեա զսուր քո եւ սպան զիս. գուցէ ասիցեն թէ կին սպան զնա։ Եւ խոցեաց զնա պատանին իւր, եւ մեռաւ Աբիմելէք։ 55Եւ ետես այր Իսրայելացի թէ մեռաւ Աբիմելէք, գնացին այր իւրաքանչիւր ի տեղի իւր։

56Եւ դարձոյց Աստուած զչարիսն Աբիմելեքայ ի գլուխ իւր զոր արար հօր իւրում կոտորելով զեւթանասուն եղբարսն իւր։ 57Եւ զամենայն չարիսն արանց Սիկիմացւոց դարձոյց Աստուած ի գլուխս նոցա, եւ եկին ի վերայ նոցա անէծքն Յովաթամայ որդւոյ Յերոբաաղայ։