1Յայնժամ ասէ ցիս՝՝ Տէր. Երթ ստացիր քեզ կուժ մի ստեղծեալ ի կաւոյ, եւ ածցես ի ծերոց ժողովրդեանն եւ ի ծերոց քահանայիցն. 2եւ ելցես ի գերեզմանս որդւոցն նոցա, որ է առաջի մտից դրանն Քարսիդեայ, եւ ընթերցցիս՝՝ անդ զամենայն զբանս զոր խօսեցայց ընդ քեզ. 3եւ ասասցես ցնոսա. Լուարուք զպատգամ Տեառն, թագաւորք Յուդայ եւ արք Հրէաստանի եւ՝՝ բնակիչք Երուսաղեմի. այսպէս ասէ Տէր զօրութեանց Աստուած Իսրայելի. Ահաւադիկ ես ածից ի վերայ տեղւոյդ այդորիկ չարիս. որպէս զի ամենայնի որ լսիցէ՝ հնչեսցեն ականջք իւր. 4փոխանակ զի թողին զիս, եւ օտարացուցին զտեղիս զայս յինէն. եւ արկանէին ի սմա խունկս աստուածոց օտարաց, զորս ոչ գիտէին ինքեանք եւ հարք իւրեանց, եւ թագաւորքն Յուդայ. եւ լցին զտեղիս զայս արեամբ անմեղաց. 5եւ շինեցին բագինս Բահաղու, այրել զորդիս իւրեանց հրով, ողջակէզս Բահաղու. զոր ոչ պատուիրեցի եւ ոչ խօսեցայ, եւ ոչ ածի զմտաւ ի սրտի իմում։ 6Վասն այդորիկ ահա աւուրք գան, ասէ Տէր, եւ ոչ եւս կոչեսցի անուն տեղւոյդ այդորիկ Գլորումն եւ գերեզման՝՝ որդւոյն Ենովմայ, այլ Ձոր կոտորածի։ 7Եւ խափանեցից զխորհուրդն Յուդայ եւ զխորհուրդն Երուսաղեմի ի տեղւոջն յայնմիկ. եւ արկից զնոսա տապաստ սրով առաջի թշնամեաց իւրեանց, եւ ի ձեռս խնդրողաց անձանց նոցա. եւ տաց զդիակունս նոցա ի կերակուր թռչնոց երկնից եւ գազանաց երկրի։ 8Եւ կարգեցից զքաղաքն զայն յապականութիւն եւ ի շչիւն. ամենայն որ անցանէ ընդ նա՝ տրտմեսցի, եւ շչեսցէ ի վերայ ամենայն հարուածոց նորա։ 9Եւ կերիցեն զմարմինս ուստերաց եւ զմարմինս դստերաց իւրեանց, եւ իւրաքանչիւր զմարմին ընկերի իւրոյ՝ ի նեղութեան եւ ի պաշարման զոր պաշարեսցեն զնոսա թշնամիք իւրեանց եւ որք խնդրէին զանձինս նոցա։

10Եւ խորտակեսցես զկուժն առաջի արանցն որ ելանիցեն ընդ քեզ. 11եւ ասասցես ցնոսա. Այսպէս ասէ ցիս Տէր զօրութեանց. Այդպէս խորտակեցից զժողովուրդդ զայդ եւ զքաղաքդ, որպէս խորտակի աման խեցեղէն, որ ոչ կարիցէ միւսանգամ բժշկել. եւ ի Տափեթ թաղեսցին առ ի չգոյէ տեղի թաղելոյ։ 12Այսպէս արարից տեղւոյդ այդմիկ, ասէ Տէր, եւ բնակչացդ որ ի դմա. տալ զքաղաքդ զայդ ի գլորումն. 13եւ եղիցին տունք Երուսաղեմի եւ տունք թագաւորացն Յուդայ իբրեւ զտեղի սպանելոց, վասն պղծութեանց զոր արարին յամենայն տունս՝՝ յորս արկանէին խունկս ի վերայ տանեաց իւրեանց՝ ամենայն զօրութեանց երկնից, եւ նուիրէին նուէրս աստուածոց օտարաց։ 14Եւ եկն Երեմիա ի գլորմանէն Տափեթայ, ուր առաքեաց զնա Տէր անդ մարգարէանալ. եւ եկաց ի սրահի տանն Տեառն, եւ ասէ ցամենայն ժողովուրդն. 15Այսպէս ասէ Տէր զօրութեանց, Աստուած Իսրայելի. Ահաւասիկ ես ածեմ ի վերայ քաղաքիդ այդորիկ եւ ի վերայ ամենայն քաղաքաց դորա եւ աւանաց զամենայն չարիս զոր խօսեցայ ի վերայ դորա, զի խստացուցին զպարանոցս իւրեանց չլսել բանից իմոց։