1Եւ եղեւ յամին յայնմիկ ի սկզբան թագաւորութեանն Սեդեկեայ արքայի Յուդայ, յամին չորրորդի՝ յամսեանն հինգերորդի, ասէ ցիս Անանիա որդի Ազովրայ սուտ մարգարէ ի Գաբաւոնէ, ի տան Տեառն առաջի քահանայիցն եւ ամենայն ժողովրդեանն. 2Այսպէս ասէ Տէր զօրութեանց Աստուած Իսրայելի. Խորտակեսցի լուծ՝՝ արքային Բաբելացւոց. 3յետ այլ եւս երկուց ամաց՝՝ աւուրց, եւ ես դարձուցից ի տեղիդ յայդ զամենայն սպաս տանն Տեառն, զոր միանգամ ա՛ռ Նաբուքոդոնոսոր արքայ Բաբելացւոց ի տեղւոջէդ յայդմանէ, եւ տարաւ ի Բաբելոն. 4եւ զՅեքոնիա որդի Յովակիմայ արքայի Յուդայ, եւ զամենայն գերութիւն Հրէաստանի որք մտին ի Բաբելոն, դարձուցից ես ի տեղիս յայս, ասէ Տէր, եւ զՅեքոնիա եւ զգերութիւնն Յուդայ.՝՝ զի խորտակեցից զլուծ արքային Բաբելացւոց։

5Եւ ասէ Երեմիա մարգարէ ցԱնանիա սուտ մարգարէ՝ առաջի քահանայիցն եւ առաջի ամենայն ժողովրդեանն որ կային ի տան Տեառն. 6Արդարեւ այդպէս արասցէ Տէր, հաստատեսցէ զբան քո զոր մարգարէացար, դարձուցանել զսպաս տանդ այդորիկ՝՝ եւ զամենայն գերին ի Բաբելոնէ ի տեղիս յայս։ 7Բայց լուարուք զպատգամս Տեառն՝՝ զոր ես ասեմ յականջս ձեր եւ յականջս ամենայն ժողովրդեանդ։ 8Մարգարէք որ եղեն յառաջ քան զիս եւ զքեզ՝ յաւիտենից, եւ մարգարէացան ի վերայ բազում աշխարհաց եւ մեծամեծ թագաւորութեանց, ի պատերազմ եւ ի չարիս եւ ի մահ. 9մարգարէ որ մարգարէանայ խաղաղութիւն, եւ լիցի բան մարգարէին, ծանիցեն զմարգարէն զոր առաքեաց նոցա Տէր հաւատարմութեամբ։

10Եւ ա՛ռ Անանիա մարգարէ առաջի ամենայն ժողովրդեանն զանուրսն ի պարանոցէ Երեմեայ մարգարէի եւ խորտակեաց։ 11Եւ ասէ Անանիա առաջի ամենայն ժողովրդեանն. Այսպէս ասէ Տէր. Այդպէս խորտակեցից զլուծ Նաբուքոդոնոսորայ արքայի Բաբելացւոց յետ երկուց ամաց՝՝ աւուրց ի պարանոցէ ամենայն ազգաց։ Եւ գնաց Երեմիա մարգարէ զճանապարհս իւր։

12Եւ եղեւ բան Տեառն առ Երեմիա յետ խորտակելոյն Անանեայ մարգարէի զանուրսն ի պարանոցէ Երեմեայ մարգարէի, եւ ասէ. 13Երթ խօսեաց ընդ Անանեայ եւ ասասցես. Այսպէս ասէ Տէր. Անուրս փայտեղէնս խորտակեցեր, եւ արարից ընդ այնր անուրս երկաթիս։ 14Զի այսպէս ասէ Տէր զօրութեանց Աստուած Իսրայելի. Լուծ երկաթի եդի ի վերայ պարանոցի ամենայն ազգացդ այդոցիկ՝ հարկել Նաբուքոդոնոսորայ արքային Բաբելացւոց, եւ ծառայեսցեն նմա. նաեւ զգազանս անապատի ետու նմա։

15Եւ ասէ Երեմիա մարգարէ ցԱնանիա մարգարէ. Արդ՝ լուր, Անանիա, ոչ առաքեաց զքեզ Տէր, եւ դու ի զուր յուսացուցեր զժողովուրդդ զայդ ի նանրութիւնս։ 16Վասն այդորիկ այսպէս ասէ Տէր. Ահա ես արձակեցից զքեզ յերեսաց երկրիդ, եւ ի սմին տարւոջ մեռջիր դու, զի խոտորումն խօսեցար ի Տեառնէ։ 17Եւ մեռաւ Անանիա մարգարէ յամին յայնմիկ, յամսեանն եւթներորդի։