1Եւ այս բանք են թղթոյն զոր առաքեաց Երեմիա մարգարէ յԵրուսաղեմէ առ ծերս գերութեանն եւ առ քահանայս եւ առ սուտ մարգարէսն. Թուղթ ի Բաբելոն առ գերին՝՝ եւ առ ամենայն ժողովուրդն զորս գերեաց Նաբուքոդոնոսոր յԵրուսաղեմէ ի Բաբելոն, 2յետ տանելոյ Յեքոնեայ արքայի եւ տիկնոջն եւ ներքինեաց եւ իշխանաց Յուդայ յԵրուսաղեմէ, եւ ամենայն ազատաց եւ արուեստագիտաց եւ կալանաւորակապաց՝՝ յԵրուսաղեմէ. 3ի ձեռն Եղասեայ որդւոյ Սափանայ, եւ Գամարեայ որդւոյ Քեղկեայ, զորս առաքեաց Սեդեկիա արքայ առ Նաբուքոդոնոսոր արքայ Բաբելացւոց ի Բաբելոն, եւ ասէ.

4Այսպէս ասէ Տէր զօրութեանց՝ Աստուած Իսրայելի վասն գերութեանդ որ գերեցաւ յԵրուսաղեմէ ի Բաբելոն. 5Տունս շինեցէք եւ բնակեցէք, դրախտս տնկեցէք եւ կերայք զպտուղս նոցա, 6առէք կանայս եւ եղիցին ուստերք եւ դստերք, եւ առէք կանայս ուստերաց ձերոց եւ զդստերս ձեր տուք արանց, եւ ծնցին ուստերս եւ դստերս, եւ բազմասջիք այդր եւ մի՛ նուազեսջիք։ 7Եւ կեցջիք խաղաղութեամբ յերկրիդ՝՝ յոր գերեցի զձեզ այդր, եւ աղօթս արարէք ի վերայ դոցա՝՝ առ Տէր. զի ի դոցա խաղաղութեանն եղիցի եւ ձեզ խաղաղութիւն։ 8Զի այսպէս ասէ Տէր զօրութեանց՝ Աստուած Իսրայելի. Մի՛ հրապուրեսցեն զձեզ սուտ մարգարէքդ ձեր որ ի միջի ձերում են, եւ ըղձապատումքդ ձեր. եւ մի՛ անսայք երազոց ձերոց զոր դուք տեսանէք. 9զի սուտ մարգարէանան դոքա ձեզ յանուն իմ, եւ ես ոչ առաքեցի, ասէ Տէր։ 10Զի այսպէս ասէ Տէր. Յորժամ մերձ իցէ Բաբելոնի լնուլ եւթանասուն ամ, այց արարից ձեզ. եւ հաստատեցից ի վերայ ձեր զբանս իմ զբարիս, դարձուցանել զձեզ ի տեղիս յայս։ 11Զի ես գիտեմ զխորհուրդս զոր խորհիմ եւ խորհեցայց՝՝ ի վերայ ձեր, ասէ Տէր, խորհուրդ խաղաղութեան եւ ոչ չարութեան, տաց ձեզ յետ այդորիկ՝՝ յոյս. 12եւ կարդասջիք առ իս, եւ երթիջիք եւ յաղօթս կացջիք առ իս, եւ ես լուայց ձեզ։ 13Եւ խնդրեսջիք զիս եւ գտջիք. զի խնդրիցէք զիս յամենայն սրտէ ձերմէ. 14եւ երեւեցայց ձեզ, ասէ Տէր, եւ դարձուցից զգերութիւն ձեր, եւ ժողովեցից զձեզ յամենայն ազգաց եւ յամենայն տեղեաց ուր ցրուեցի զձեզ անդր, ասէ Տէր. եւ դարձուցից զձեզ ի տեղիդ ուստի գերեցի զձեզ այտի. 15զի ասացէք թէ՝ Կացոյց Տէր ի մեզ մարգարէս ի Բաբելոն։

16Զի այսպէս ասէ Տէր ցթագաւորդ որ նստի յաթոռ Դաւթի, եւ ցամենայն ժողովուրդդ որ բնակեալ է ի քաղաքիդ յայդմիկ, եղբարք ձեր որ ոչ ելին ընդ ձեզ ի գերութիւն. 17Այսպէս ասէ Տէր զօրութեանց. Ահաւասիկ ես առաքեմ ի նոսա սով եւ սուր եւ մահ, եւ արարից զդոսա իբրեւ զթուզ ժանտ սուարիմ որ ոչ ուտիցի ի ժանտութենէ իւրմէ։ 18Եւ հալածեցից զնոսա սրով եւ սովով եւ մահուամբ, եւ տաց զնոսա ի շարժումն ամենայն թագաւորութեանց երկրի, ի նզովս եւ յապականութիւն եւ ի շչիւն եւ ի նախատինս ի մէջ ամենայն ազգաց ուր ցրուեցից զնոսա անդր. 19փոխանակ զի ոչ լուան բանից իմոց, ասէ Տէր. զի առաքեցի առ նոսա զծառայս իմ զմարգարէս կանխեալս եւ առաքեալ, եւ ոչ լուարուք, ասէ Տէր։ 20Եւ դուք լուարուք զբան Տեառն, ամենայն գերիդ, զոր առաքեցի յԵրուսաղեմէ ի Բաբելոն։ 21Այսպէս ասէ Տէր զօրութեանց՝ Աստուած Իսրայելի, ի վերայ Աքիաբայ որդւոյ Ուղկեայ, եւ ի վերայ Սեդեկեայ որդւոյ Մաասայ՝ որ մարգարէացան ձեզ յանուն իմ զուր. Ահաւասիկ ես տաց զնոսա ի ձեռս Նաբուքոդոնոսորայ արքային Բաբելացւոց, եւ սատակեսցէ զնոսա առաջի աչաց ձերոց։ 22Եւ առցեն ի նոցանէն անէծս ի մէջ ամենայն գերութեանն Յուդայ որ է ի Բաբելոն, եւ ասասցեն. Արասցէ զքեզ Տէր՝ որպէս արար Սեդեկեայ եւ Աքիաբայ, զորս տապակեաց արքայն Բաբելացւոց ի հուր։ 23Վասն զի գործեցին զանօրէնութիւնս յԻսրայելի, եւ շնային ընդ կանայս քաղաքայնոց իւրեանց. եւ խօսէին պատգամս յանուն իմ սուտ, զոր ոչ հրամայեցի նոցա. եւ ես ինձէն իրագէտ եւ վկայ եմ, ասէ Տէր։

24Եւ ցՍամեա Եղիմացի ասասցես. 25Այսպէս ասէ Տէր զօրութեանց՝ Աստուած Իսրայելի. Փոխանակ զի առաքեցեր դու յանուն իմ թուղթս առ ամենայն ժողովուրդն յԵրուսաղէմ, եւ ես ոչ առաքեցի զքեզ յանուն իմ,՝՝ եւ առ Սոփոնիա որդի Մաասայ քահանայ եւ առ ամենայն քահանայսն ասել. 26Թէ Տէր ետ զքեզ քահանայ փոխանակ Յովիդայեայ քահանայի, լինել վերակացու ի տան Տեառն ամենայն մարդոյ որ մարգարէանայ, եւ ի վերայ ամենայնի որ պատմէ ըղձութիւն. եւ տացես զնոսա յարգելան ի վերնադրանն՝՝. 27եւ արդ ընդէ՞ր ոչ արարեր պատուհաս Երեմիայի Անաթովթացւոյ՝ որ մարգարէանայ ձեզ. 28զի առաքեաց առ մեզ ի Բաբելոն եւ ասէ, թէ՝ Հեռի է ժամանակն. շինեցէք տունս եւ բնակեցէք, տնկեցէք դրախտս եւ կերայք զպտուղս նոցա։ 29Եւ ընթերցաւ Սոփոնիա քահանայ զթուղթն յականջս Երեմիայի մարգարէի։ 30Եւ եղեւ բան Տեառն առ Երեմիա, եւ ասէ. 31Առաքեա առ ամենայն գերին եւ ասասցես. Այսպէս ասէ Տէր ի վերայ Սամեայ Եղիմացւոյ. Փոխանակ զի մարգարէացաւ ձեզ Սամեա, եւ ես ոչ առաքեցի զնա, եւ յուսացոյց զձեզ ի նանրութիւն, 32վասն այսորիկ այսպէս ասէ Տէր. Ահաւասիկ ես արարից հանդէս ի վերայ Սամեայ Եղիմացւոյ եւ ի վերայ ազգի դորա. եւ ոչ եղիցի դորա մարդ ոք՝ որ նստիցի ի միջի ձերում տեսանել զբարութիւն զոր ես արարից ձեզ, ասէ Տէր. զի խոտորումն խօսեցաւ ի Տեառնէ։