1Բանն որ եղեւ ի վերայ Երեմիայի ի Տեառնէ՝ յետ արձակելոյն զնա Նաբուզարդանայ դահճապետի ի Ռամա. քանզի առին զնա կապեալ ձեռակապօք ի միջոյ ամենայն գերութեանն Երուսաղեմի եւ Յուդայ, զոր խաղացուցին ի Բաբելոն։ 2Առ զնա դահճապետն, եւ ասէ ցնա. Տէր Աստուած քո բարբառեցաւ զչարիսդ զայդ ի վերայ տեղւոյս այսորիկ. 3եւ ած եւ արար Տէր որպէս եւ խօսեցաւ. զի մեղայք Տեառն եւ ոչ լուայք ձայնի նորա, եւ եղեւ ընդ ձեզ բանդ այդ։ 4Եւ արդ ահա այժմ լուծի զքեզ այսօր ի ձեռակապացդ որ էին ի ձեռս քո. եթէ բարւոք թուի առաջի քո գալ ընդ իս ի Բաբելոն՝ եկ, եւ ածից ի վերայ քո ակն. եւ եթէ չար թուի յաչս քո գալ ընդ իս ի Բաբելոն, դադարեա աստէն. ահա ամենայն երկիրս առաջի քո է ի բարիս, ուր հաճոյ է քեզ երթալ՝ անդր երթիցես։ 5Եւ մինչդեռ աստ եմ, երթ յով եւ կամիս. եւ՝՝ դարձիր առ Գոդողիա որդի Աքիկամայ որդւոյ Սափանայ, զոր կացոյց արքայն Բաբելացւոց ի վերայ երկրիդ Հրէաստանի, եւ բնակեսցես ընդ նմա ի մէջ ժողովրդեանն. ապա թէ ոչ, ըստ ամենայն հաճութեան աչաց քոց երթալոյ՝ երթիցես. եւ ետ նմա դահճապետն նպարակս եւ պարգեւս, եւ արձակեաց։ 6Եւ եկն Երեմիա առ Գոդողիա որդի Աքիկամայ ի Մասփա, եւ նստաւ անդ ի մէջ ժողովրդեան երկրին մնացելոյ։ 7Եւ լուան ամենայն զօրավարք զօրաց որ էին ի բացի՝ ինքեանք եւ զօրք իւրեանց, թէ կացոյց արքայն Բաբելացւոց զԳոդողիա որդի Աքիկամայ ի վերայ երկրին, եւ յանձն արար նմա զարս եւ զկանայս եւ ժողովուրդ բազում՝՝ եւ յաղքատաց ժողովրդեան երկրին զորս ոչ խաղացոյց ի Բաբելոն։ 8Եկին առ Գոդողիա ի Մասփայ, Իսմայէլ որդի Նաթանայ եւ Յովնան եւ Յովնաթան որդիք Կարէի, եւ Սարեա որդի Թանաթեմայ, եւ որդիք Ովփերի որդւոյ Նետոփատայ, եւ Յեզոնիա որդի Մաքաթայ, ինքեանք եւ արք որ ընդ նոսա։ 9Եւ երդուաւ նոցա Գոդողիա որդի Աքիկամայ որդւոյ Սափանայ, եւ արանցն որ ընդ նոսա, եւ ասէ. Մի՛ երկնչիք յերեսաց ծառայիցն՝՝ Քաղդէացւոց, այլ բնակեցէք յերկրիս, եւ հարկեցարուք արքային Բաբելացւոց, եւ բարի եղիցի ձեզ։ 10Եւ ես ահաւասիկ նստիմ ի Մասփա, կալ ընդդէմ Քաղդէացւոցն որ ելանիցեն ի վերայ մեր. եւ դուք ժողովեցէք զգինի եւ զմիրգ, եւ ժողովեցէք եւղ յամանս ձեր. եւ բնակեցէք ի քաղաքս ձեր զորս կալայք քաջութեամբ։ 11Եւ ամենայն Հրեայք որ էին յերկրին Մովաբացւոց, եւ ի մէջ որդւոցն Ամոնայ, եւ որք յԵդովմ, եւ որք յամենայն երկրի, լուան եթէ թող արքայն Բաբելացւոց մնացորդս ի Հրէաստանի, եւ կացոյց նոցա վերակացու զԳոդողիա որդի Աքիկամայ որդւոյ Սափանայ, 12դարձան անդրէն ամենայն Հրեայք յամենայն տեղեաց ուր ցրուեցան անդր, եւ եկին յերկիրն Յուդայ առ Գոդողիա ի Մասփա, եւ ժողովեցին գինի եւ միրգ բազում յոյժ։

13Եւ Յովնան որդի Կարէի եւ ամենայն զօրավարք զօրացն որ էին ի բացի՝ եկին առ Գոդողիա ի Մասփա, 14եւ ասեն ցնա. Զայն գիտիցե՞ս զի Բաաղիս թագաւոր որդւոցն Ամոնայ արձակեաց առ Իսմայէլ՝՝ որդի Նաթանայ սպանանել զքեզ։ Եւ ոչ հաւատաց նոցա Գոդողիա որդի Աքիկամայ։ 15Եւ Յովնան որդի Կարէի՝ ասէ գաղտ ցԳոդողիա ի Մասփա. Երթայց սպանից զԻսմայէլ որդի Նաթանայ, եւ մի՛ ոք գիտասցէ. գուցէ երբեք սպանանիցէ զքեզ, եւ ցրուեսցին Հրեայք որ ժողովեալ են առ քեզ, եւ կորնչիցին մնացորդք Յուդայ։ 16Եւ ասէ Գոդողիա որդի Աքիկամայ ցՅովնան որդի Կարէի. Մի՛ արասցես ըստ բանիդ այդորիկ, զի սուտ խօսեցար դու զԻսմայելէ։