1Եւ եղեւ յամսեանն եւթներորդի եկն Իսմայէլ որդի Նաթանայ, որդւոյ Եղիսամայ յազգէ թագաւորին, եւ ծառայք թագաւորին, եւ տասն այր ընդ նմա առ Գոդողիա որդի Աքիկամայ ի Մասփա, եւ կերան հաց ի միասին ի Մասփա։ 2Եւ յարեաւ Իսմայէլ որդի Նաթանայ, եւ տասնեքին արքն որ ընդ նմա, եւ եհար զԳոդողիա որդի Աքիկամայ որդւոյ Սափանայ սրով, եւ սպան զնա, զոր կացուցեալ էր արքային Բաբելացւոց ի վերայ երկրին. 3եւ զամենայն Հրեայսն որ էին ընդ Գոդողեայ ի Մասփա, եւ զամենայն Քաղդէացիս որ անդ գտան զարս պատերազմօղս, կոտորեաց Իսմայէլ։

4Եւ եղեւ յերկրորդում աւուր սպանանելոյ անդ զԳոդողիա, եւ ոչ ոք գիտէր, 5եկին արք ի Սիւքեմայ եւ ի Սաղեմայ եւ ի Շամրնէ, արք ութսուն, գերծեալ զմօրուս եւ պատառեալ զհանդերձս կոծելով, եւ մաննա՝՝ եւ կնդրուկ ի ձեռս նոցա տանել ի տուն Տեառն։ 6Եւ ել Իսմայէլ որդի Նաթանայ ընդ առաջ նոցա ի Մասփայ, երթալով երթայր եւ լայր. եւ եղեւ իբրեւ մերձեցաւ ի նոսա՝ ասէ ցնոսա. Մտէք առ Գոդողիա որդի Աքիկամայ։ 7Եւ եղեւ իբրեւ մտին ի մէջ քաղաքին, կոտորեաց զնոսա Իսմայէլ որդի Նաթանայ ի մէջ քաղաքին, եւ ամաց ի ջրհոր՝ ինքն եւ արքն որ ընդ նմա։ 8Եւ արք տասն գտան անդ, եւ ասեն ցԻսմայէլ. Մի՛ սպանաներ զմեզ, զի գոն մեզ գանձք ի բացի, ցորեան եւ գարի, մեղր եւ եւղ։ Եւ զանց արար եւ ոչ սպան զնոսա ի մէջ եղբարց իւրեանց։ 9Եւ ջրհորն յոր ամաց Իսմայէլ զամենայն մարմինս արանցն զոր կոտորեաց վասն Գոդողեայ, ջրհոր մեծ էր՝՝ զոր արար արքայ Ասա յերեսաց Բաասայ արքայի Իսրայելի. զայն ելից Իսմայէլ որդի Նաթանայ վիրաւորօք։ 10Եւ դարձոյց Իսմայէլ զամենայն ժողովուրդն որ մնացեալ էր ի Մասփա, եւ զդստերս թագաւորին հանդերձ ամենայն սինլքորօք ժողովրդեանն որ էին ի Մասփա, զորս յանձն արարեալ էր Նաբուզարդանայ դահճապետի Գոդողեայ որդւոյ Աքիկամայ. եւ կանխեաց Իսմայէլ որդի Նաթանայ ընդ առաւօտս՝՝, եւ գնաց յայն կոյս առ որդիսն Ամոնայ։

11Եւ լուաւ Յովնան որդի Կարէի եւ ամենայն զօրավարք զօրացն որ ընդ նմա էին, զամենայն չարիսն զոր գործեաց Իսմայէլ որդի Նաթանայ. 12ժողովեցին զամենայն զօրականն իւրեանց, եւ խաղացին երթալ տալ պատերազմ ընդ Իսմայելի որդւոյ Նաթանայ. եւ գտին զնա ի վերայ ջուրցն բազմաց որ էին ի Գաբաւոն։ 13Եւ եղեւ իբրեւ տեսին ամենայն ժողովուրդն որ էին ընդ Իսմայելի՝ զՅովնան որդի Կարէի եւ զամենայն զօրավարս զօրացն որ էին ընդ նմա՝ ուրախ եղեն։ 14Եւ դարձան առ նոսա՝՝ ամենայն ժողովուրդն զոր գերեաց Իսմայէլ ի Մասփայ, եւ եկին առ Յովնան որդի Կարէի։ 15Բայց Իսմայէլ որդի Նաթանայ ապրեցաւ ութ արամբք յերեսացն Յովնանայ, եւ անկաւ առ որդիսն Ամոնայ։ 16Եւ առ Յովնան որդի Կարէի, եւ ամենայն զօրավարք զօրացն որ էին ընդ նմա, զամենայն մնացորդս ժողովրդեանն զորս թափեաց յԻսմայելէ յորդւոյ Նաթանայ ի Մասփայ, յետ սպանանելոյն զԳոդողիա որդի Աքիկամայ զարս հզօրս պատերազմօղս, եւ զկանայս եւ զարս եւ զներքինիս, զոր առ յերկրէն Գաբաւոնացւոց, 17եւ գնաց. եւ նստան յերկրին Բերութքամամայ՝՝ հանդէպ Բեթղեհեմի, երթալ մտանել յերկիրն Եգիպտացւոց՝ 18յերեսաց Քաղդէացւոցն, քանզի զահի հարան յերեսաց նոցա. զի սպան Իսմայէլ զԳոդողիա որդի Աքիկամայ, զոր կացոյց արքայն Բաբելացւոց ի վերայ երկրին։