1Իվերայ Եգիպտոսի։՝՝ Բանն Տեառն որ եղեւ առ Երեմիա մարգարէ ի վերայ ամենայն ազգացն, 2Եգիպտացւոց՝՝, ի վերայ զօրացն փարաւոնի Նեքաւովայ արքային Եգիպտացւոց, որ էր առ Եփրատ գետով ի Քարքամիս, զոր եհար Նաբուքոդոնոսոր արքայ Բաբելացւոց, յամին չորրորդի Յովակիմայ որդւոյ Յովսեայ արքայի Հրէաստանի։

3Առէք զէն եւ վահանս, մատերուք ի պատերազմ. 4կազմեցէք զերիվարս, հեծարուք սպառազէնք, դիք զսաղաւարտս, առէք յառաջ զգեղարդունս, զգեցարուք զզրահս ձեր։ 5Իսկ այդ զի՞նչ է. դոքա աւադիկ զարհուրեալ իմն են, եւ յետս ընդդէմ շարժին. զի զօրաւորք նոցա հարան. ի փախուստ կացին. եւ ոչ դարձցին ի դոցանէ պատեալքն շուրջանակի՝՝, ասէ Տէր։ 6Մի՛ փախիցէ թեթեւն, եւ մի՛ ապրեսցի հզօրն. ի կողմանս հիւսիսոյ առ Եփրատ գետով տկարացան, կործանեցան։ 7Ո՞վ է սա որ իբրեւ զգետ յարուցեալ է, իբրեւ զգետս կուտակեալս ջուր զջուրբք. 8ջուրքն Եգիպտացւոց՝՝ իբրեւ զգետ ելանէ, եւ իբրեւ զգետ խռովին ջուրք նորա. եւ ասէ. Ելից եւ ծածկեցից զերկիր, կորուսից զքաղաքն եւ զբնակիչս նորա։ 9Հեծեայք յերիվարս, կազմեցէք կառս՝՝. ելէք, պատերազմաօղք Եթէովպացւոց, եւ Լիբէացիք վառեալք զինու, եւ Լիւդացիք, ելէք լարեցէք զաղեղունս։ 10Զի օրն այն Տեառն Աստուծոյ մերոյ՝ օր վրէժխնդրութեան է, առնուլ վրէժ ի թշնամեաց իւրոց. եւ կերիցէ սուր եւ յագեսցի, եւ արբեսցի յարենէ նոցա. զի զոհ Տեառն զօրութեանց է յերկրէն հիւսիսոյ ի վերայ գետոյն Եփրատայ։ 11Ել ի Գաղաադ, եւ առ դեղ ռետին՝ կուսի դստերն՝՝ Եգիպտացւոց. ի զուր յաճախեցեր զբժշկութիւնս քո, եւ օգուտ չիք ուստեք քեզ։ 12Լուան զգոյժ քո ազգք, եւ աղաղակաւ քով լի եղեւ երկիր. զի պատերազմօղ առ պատերազմողի տկարացաւ՝՝, եւ անկան երկոքեան ի միասին։

13Բանն զոր խօսեցաւ Տէր ի ձեռն Երեմիայի մարգարէի ի գալ Նաբուքոդոնոսորայ արքային Բաբելացւոց, հարկանել զերկիրն Եգիպտացւոց։

14Գոյժ արարէք յԵգիպտոս, եւ հնչեցէք ի Մակդող, եւ պատուէր տուք ի Մեմփիս, ազդ արարէք ի Տափնաս՝՝, թէ՝ Արի եւ պատրաստեաց, զի եկեր սուր զուռս քո։ 15Ի փախուստ դարձաւ ցուլն քո ընտիր, ոչ մնաց՝ զի Տէր լքոյց զնա։ 16Եւ բազմութիւնն տկարացաւ, եւ անկան՝՝ իւրաքանչիւր առ ընկերի իւրում, եւ ասեն. Արիք եւ դարձցուք առ իւրաքանչիւր ժողովուրդ մեր, եւ յիւրաքանչիւր աշխարհ իւր՝ յերեսաց Յունական սրոյն։ 17Կոչեցէք զանուն փարաւոնի արքային Եգիպտացւոց՝ Սաովն եւ Եբիր եւ Մովեդ։՝՝ 18Կենդանի եմ ես, ասէ Տէր, որոյ Թագաւոր՝՝ զօրութեանց անուն է նորա. զի իբրեւ զԹափոր ի լերինս, եւ իբրեւ զԿարմեղոս ի ծովու եկեսցէ։ 19Հանդերձ գերութեան արա քեզ, բնակեալ դուստրդ Եգիպտացւոց. զի Մեմփիս յապականութիւն եղիցի, եւ կոչեսցի նմա վա՜յ՝՝ առ ի չգոյէ բնակչաց նորա։

20Երինջ զարդարեալ գեղեցիկ՝ Եգիպտոս. հատ հատաւ ի հիւսիսոյ՝ եկն ի վերայ նորա՝՝, 21եւ վարձկանք նորա ի նմա իբրեւ եզինք պարարակք, զի եւ նոքա ի փախուստ դարձան առ հասարակ, եւ ոչ հանդարտեցին. զի օր կորստեան եկն ի վերայ նոցա, եւ ժամանակ վրէժխնդրութեան։ 22Ձայն նորա իբրեւ զօձի որ շչիցէ, զի ընդ աւազ գնայցեն՝՝. տապարաւորք եկեսցեն ի վերայ նորա իբրեւ զփայտահարս. 23հարէք զանտառս նորա, ասէ Տէր Աստուած, զորոյ ոչ ոք առնուցու զչափ. զի բազմասցի առաւել քան զմարախ, եւ ոչ է նոցա թիւ։ 24Յամօթ եղեւ դուստրն Եգիպտացւոց, մատնեցաւ ի ձեռս հիւսիսային զօրացն։ 25Ասէ Տէր զօրութեանց՝ Աստուած Իսրայելի. Ահաւասիկ ես խնդրեցից զվրէժ յԱմոնայ որդւոյ նորա՝՝, ի փարաւոնէ եւ յԵգիպտացւոց, եւ ի դից նոցա եւ ի թագաւորաց նորա, եւ ի փարաւոնէ եւ ի յուսացելոց ի նա։ 26Եւ մատնեցից զնոսա ի ձեռս խնդրողաց անձանց նոցա, եւ ի ձեռս Նաբուքոդոնոսորայ արքային Բաբելացւոց, եւ ի ձեռս ծառայից նորա. եւ յետ այնորիկ բնակեսցի իբրեւ զառաջինն, ասէ Տէր։

27Բայց դու մի՛ երկնչիցիս, ծառայ իմ Յակոբ, եւ մի՛ զարհուրիցիս, Իսրայէլ. զի ահաւասիկ ես զերծուցանեմ զքեզ ի հեռաստանէ, եւ զզաւակ քո ի գերութենէ նոցա. եւ դարձցի Յակոբ եւ դադարեսցէ եւ ննջեսցէ, եւ ոչ ոք իցէ որ լլկիցէ զնա։ 28Եւ դու մի՛ երկնչիր, ծառայ իմ Յակոբ, ասէ Տէր, զի ես ընդ քեզ եմ. թէ արարից վախճան ամենայն ազգաց՝ ուր ցրուեցի զքեզ անդր, այլ քեզ ոչ արարից վախճան. եւ խրատեցից զքեզ յիրաւունս, եւ քաւելով ոչ քաւեցից՝՝ զքեզ։