1Քսան եւ մի ամաց էր Սեդեկիա արքայ ի թագաւորել իւրում, եւ մետասան ամ թագաւորեաց յԵրուսաղէմ, եւ անուն մօր նորա Ամատեղ դուստր Երեմեայ ի Ղոբնայ։ 2Եւ արար չար առաջի Տեառն, որպէս արար Յովակիմ։ 3Զի ի ցասումն Տեառն էր Երուսաղէմ եւ Յուդա, մինչեւ մերժեաց զնոսա յերեսաց իւրոց. եւ ապստամբեաց Սեդեկիա յարքայէն Բաբելացւոց։

4Եւ եղեւ յիններորդի ամի թագաւորութեան նորա, եւ յամսեանն տասներորդի՝ որ օր տասն էր ամսոյն, եկն Նաբուքոդոնոսոր արքայ Բաբելացւոց ամենայն զօրօք իւրովք յԵրուսաղէմ, եւ պաշարեաց զնա. եւ շինեաց շուրջ զնովաւ պարիսպ առ պարիսպ՝ ի չորեքկուսի վիմաց՝՝։ 5Եւ եհաս քաղաքն ի նեղութիւն մինչեւ յամն մետասաներորդ Սեդեկեայ արքայի։ 6Եւ յամիսն չորրորդ՝ որ օր ինն էր ամսոյն, եւ զօրացաւ սով ի քաղաքին. եւ ոչ գտանէր հաց ուտելոյ ժողովրդեան երկրին։ 7Եւ խրամատեցաւ քաղաքն, եւ ամենայն արք պատերազմօղք փախեան, եւ ելին ի քաղաքէ անտի ի գիշերի ընդ ճանապարհ դրանն ընդ պարիսպ եւ ընդ պատուհան՝՝, ընդ կողմն պարտիզին արքունի, եւ Քաղդէացիքն շուրջ զքաղաքաւն էին. եւ գնացին ընդ ճանապարհ Արաբացւոց։ 8Եւ զհետ եղեն զօրք թագաւորին Քաղդէացւոց՝՝, եւ հասին Սեդեկեայ արքայի յանցս Երիքովի, եւ ամենայն ծառայք նորա ցրուեցան ի նմանէ։ 9Եւ կալան զթագաւորն եւ ածին առ արքայն Բաբելացւոց ի Ռեբղաթա յերկիրն Եմաթայ, եւ խօսեցաւ ընդ նմա դատաստանօք։ 10Եւ կոտորեաց արքայն Բաբելացւոց զորդիսն Սեդեկեայ յանդիման նորա, եւ զամենայն իշխանս Յուդայ կոտորեաց ի Ռեբղաթա. 11եւ զաչսն Սեդեկեայ կուրացոյց, եւ կապեաց զնա ձեռակապօք, եւ տարաւ զնա արքայն Բաբելացւոց ի Բաբելոն, եւ եդ զնա ի տուն աղօրեաց մինչեւ յօր մահուան իւրոյ։

12Եւ յամսեանն հինգերորդի, որ օր տասն էր ամսոյն, այն ամ իննուտասն էր Նաբուքոդոնոսորայ արքային Բաբելացւոց, եկն Նաբուզարդան դահճապետ որ կայր առաջի արքային Բաբելացւոց, 13եւ հրձիգ արար զտունն Տեառն եւ զապարանսն արքունի, եւ զամենայն տունս քաղաքին եւ զամենայն ապարանս մեծամեծս այրեաց հրով։ 14Եւ զամենայն պարիսպն Երուսաղեմի շուրջանակի՝ ամենայն զօրք Քաղդէացւոց քակեցին, որ էին ընդ դահճապետին։ 15Բայց յաղքատաց ժողովրդեանն եւ ի մնացորդաց, եւ զսինլքորսն որ մնացին ի քաղաքին, եւ զփախստականս որ փախեան առ արքայն Բաբելացւոց, եւ զմնացորդս ժողովրդեանն եթող Նաբուզարդան դահճապետ։ 16Եւ յաղքատաց երկրին եթող Նաբուզարդան դահճապետ յայգեգործս եւ յարդիւնարարս։

17Եւ զսիւնսն պղնձիս տան Տեառն եւ զխարիսխսն, եւ զծովն պղնձի որ էր ի տան Տեառն՝ խորտակեցին Քաղդէացիքն, եւ խաղացուցին զամենայն պղինձն ի Բաբելոն։ 18Եւ զոտսն եւ զվերնախարիսխսն եւ զպսակսն եւ զտաշտսն եւ զմսահանսն՝՝, եւ զամենայն կահ պղնձի որովք առնէին սպաս՝ առ. 19եւ զապփովթն եւ զամասարակովթ եւ զպարզուտսն՝՝ եւ զաշտանակսն եւ զճաշակսն եւ զտուփսն, որ ոսկի՝ ոսկի, եւ որ արծաթի՝ արծաթի, ա՛ռ դահճապետն։ 20Եւ սիւնք երկու էին, եւ ծով մի, եւ ցուլքն երկոտասան էին որ կային ընդ ծովուն՝՝, զորս արար արքայ Սողոմոն ի տան Տեառն, եւ ոչ գոյր չափ պղնձոյն եւ՝՝ ամենայն կահին պղնձոյ։ 21Եւ սեանցն՝ երեսուն եւ հինգ՝՝ կանգուն էր բարձրութիւն միոյ միոյ սեան, եւ մանեակ յերկոտասան կանգնոյ շուրջ զնովաւ, եւ թանձրութիւն նորա շուրջ առ չորս մատունս. 22եւ ախաւեղագէսք նորա պղնձիք, եւ բարձրութիւն միոյ ախաւեղագիսին՝ ի հինգ կանգնոյ, եւ վանդակապատք եւ նռնաձեւք ի վերայ ախաւեղագիսին շուրջ շրջանակաւ՝ ամենայն պղնձի. ըստ նմին օրինակի եւ երկրորդի սեանն, ութ նռնաձեւ, կանգուն առ կանգուն, յերկոտասան կանգնոյ՝՝։ 23Եւ էին նռնաձեւք իննսուն եւ վեց ի միոջէ կողմանէ՝՝, եւ էին ամենայն նռնաձեւքն հարեւր ի վերայ վանդակին շուրջանակի։

24Եւ ա՛ռ դահճապետն զՍարայիա զքահանայ զգլխաւորն, եւ զՍոփոնիա զքահանայ զերկրորդ, եւ երիս բարապանս 25եւ ի քաղաքէ անտի ա՛ռ ներքինի մի՝ որ էր ոստիկան արանց պատերազմողաց, եւ եւթն այր անուանի որ կային առաջի թագաւորին՝ գտեալս ի քաղաքին. եւ զդպրապետն զիշխան զօրացն, եւ զդպրապետ ժողովրդեան՝՝ երկրին, եւ վաթսուն այր ի ժողովրդենէ երկրին՝ որ գտան ի քաղաքին։ 26Եւ ա՛ռ զնոսա Նաբուզարդան դահճապետ, եւ տարաւ առ արքայն Բաբելացւոց ի Ռեբղաթա։ 27Եւ եհար զնոսա արքայն Բաբելացւոց, եւ սպան զնոսա ի Ռեբղաթա յերկրին Եմաթայ։ Եւ գերեցաւ Յուդա անդուստ յերկրէ իւրմէ։

28Եւ այս ժողովուրդ է զոր գերեաց Նաբուքոդոնոսոր արքայ. յամին եւթներորդի, ի Հրէից՝ երիս հազարս եւ քսան եւ երեք. 29եւ յամին ութուտասաներորդի Նաբուքոդոնոսորայ՝ տարան յԵրուսաղեմէ ոգիս ութ հարեւր երեսուն եւ երկուս. 30եւ յամին քսաներորդի եւ երրորդի Նաբուքոդոնոսորայ՝ խաղացոյց Նաբուզարդան դահճապետ ի Հրէից ոգիս եւթն հարեւր քառասուն եւ հինգ. ընդ ամենայն ոգիք չորք հազարք եւ վեց հարեւր։

31Եւ եղեւ յերեսներորդի եւթներորդի ամի գերութեան Յովաքինայ արքայի Յուդայ, յերկոտասաներորդ ամսեանն ի քսան եւ ի չորս ամսոյն, բարձրացոյց Եւիլմարովդաք արքայ Բաբելացւոց՝ յամին յորում թագաւորեաց՝ զգլուխ Յովաքինայ արքայի Յուդայ. եւ եհան զնա ի տանէն ուր կայր ի պահեստի. 32եւ խօսեցաւ ընդ նմա քաղցրութեամբ, եւ արկ զաթոռ նորա ի վերոյ քան զաթոռս թագաւորացն որ էին ընդ նմա ի Բաբելոն. 33եւ փոխեաց զպատմուճան բանտի նորա, եւ ուտէր հաց հանապազ առաջի նորա զամենայն աւուրս որչափ եւ եկեաց։ 34Եւ կարգեցաւ նմա ռոճիկ հանապազորդ, զոր տային յարքայէն Բաբելացւոց օր ըստ օրէ մինչեւ ցօր մահու՝ զամենայն աւուրս կենաց իւրոց։