1Ընդէ՞ր զՏէր մոռացան ամբարհաւաճք, 2եւ ամպարիշտք անցին ըստ սահման. զհօտ հանդերձ հովուօք յափշտակեցին, 3զէշ որբոյն վարեցին, եւ զեզն այրւոյն գրաւեցին։ 4Խոտորեցուցին զտկարս ի ճանապարհէ արդարութեան, առ հասարակ ղօղեցուցին զհեզս երկրի, դիպեցան իբրեւ զցիռս ի վայրի։ 5Վասն իմ ծախեցին զգործ իւրեանց, քաղցրացաւ նոցա հաց ընդ լկտիս։ 6Զանդ տհաս որ ոչ իւրեանց էր՝ հնձեցին, տկարք զայգիս ամպարշտաց անհաց եւ անվարձ գործեցին։ 7Զմերկս բազումս ննջեցուցին առանց հանդերձից, զզգեստ անձանց նոցա զերծին։ 8Ի ցօղոյ լերանց տամկանան. քանզի ոչ գոյր նոցա յարկ. արկին զինքեանս ընդ վիմաւ։ 9Յափշտակեցին զորբն ի ստենէ, եւ զանկածն տառապեցուցին։ 10Զմերկն ննջեցուցին առանց հանդերձի տարապարտուց, հատին զհաց քաղցելոց։ 11Յանձուկս դարանակալ եղեն ի տարապարտուց, զճանապարհս արդարութեան ոչ գիտացին։ 12Որք ի քաղաքաց եւ ի տանց իւրեանց զրկեցան, անձինք տղայոց մեծամեծս հեծեծեցին. եւ նա այնմ այցելութիւն ընդէ՞ր ոչ առնիցէ։ 13Յերկրի էին նոքա՝ եւ ոչ ծանեան. զճանապարհս արդարութեան ոչ գիտացին, եւ ընդ շաւիղս նորա ոչ գնացին։ 14Ծանուցեալ զգործս նոցա՝ մատնեաց զնոսա ի խաւար, եւ զցայգ եղիցին իբրեւ զգողս։ 15Եւ աչք շնացելոյն պահեսցեն զխաւար, եւ ասիցէ՝՝ թէ՝ Ոչ զականիցէ զիս ակն. եւ քօղ արկ զերեսօք իւրովք։ 16Փորեաց ընդ մութ զտուն իւր. ի տուէ կնքեցին զանձինս, եւ ոչ ծանեան զլոյս։ 17Եթէ միանգամայն առաւօտ նոցա ի ստուերս մահու է, եթէ ի միտ առնուցու զխռովութիւն ստուերաց մահու։՝՝ 18Թեթեւագոյն է ի վերայ ջուրցն երեսաց. կործանեսցի մասն նոցա ի վերայ երկրի, երեւեսցի տունկ նոցա ի վերայ ցամաք երկրի։ 19Զի զանթանոցիկ որբոյն յափշտակեցին. ընդդէմ յիշատակեցան նմա մեղք, իբրեւ զմառախուղ ցօղոյ եղեւ անյայտ։ 20Հատուսցի նմա որ ինչ արարն. խորտակեսցի ամենայն անիրաւ հանգոյն փայտի անբժշկականի։ 21Զի ամլոյն բարի ոչ արար, եւ ամուրւոյն ոչ ողորմեցաւ։ 22Սրտմտութեամբ կործանեաց զտկարս. եւ թէպէտ եւ յարիցէ, մի՛ հաւատասցէ կենաց իւրոց։ 23Հիւանդացեալ՝ եւ մի՛ ակն կալցի ողջանալոյ, այլ անկցի ախտիւ. զի զբազումս չարչարեաց բարձրութիւն նորա։ 24Թարշամեսցի իբրեւ զբանջար ի տօթի, կամ իբրեւ զհասկ ինքնին անկեալ ի ցօղնոյ։ 25Ապա թէ իցէ ոք որ ասիցէ զինէն՝ սուտ խօսել, դիցէ զբանս իմ յոչինչ։՝՝