1Եւ իբրեւ լուաւ Ադոնիբեզեկ թագաւորն Երուսաղեմի, թէ առ Յեսու զԳայի եւ սատակեաց զնա. զոր օրինակ արար ընդ Երիքով եւ ընդ թագաւոր նորա, նոյնպէս արար ընդ Գայի եւ ընդ թագաւոր նորա, եւ զի անձնատուրք եղեն բնակիչք Գաբաւոնի առ Յեսու եւ՝՝ առ Իսրայէլ եւ եղեն ի միջի նոցա, 2զարհուրեցան յանձինս իւրեանց յոյժ, քանզի գիտէին թէ քաղաք մեծ է Գաբաւոն որպէս զմի ի մայրաքաղաքաց թագաւորացն. քանզի նա մեծ էր քան զԳայի, եւ ամենայն արք նորա զօրաւորք։ 3Եւ առաքեաց Ադոնիբեզեկ արքայ Երուսաղեմի առ Ելամ արքայ Քեբրոնի, եւ առ Բիրիմ արքայ Յերիմութայ, եւ առ Յեփիէ արքայ Լաքիսայ, եւ առ Դաբիր արքայ Եգղոնայ, եւ ասէ. 4Եկայք ելէք առ իս եւ օգնեցէք ինձ, եւ տացուք պատերազմ ընդ Գաբաւոնի. զի անձնատուրք եղեն առ Յեսու եւ առ որդիսն Իսրայելի։ 5Եւ գումարեցան եւ ելին հինգ թագաւորքն Յեբուսացւոց, թագաւորն Երուսաղեմի եւ թագաւորն Քեբրոնի եւ թագաւորն Յերիմութայ եւ թագաւորն Լաքիսայ եւ թագաւորն Եգղոնայ, ինքեանք եւ ամենայն ժողովուրդ նոցա, եւ նստան զԳաբաւոնիւ եւ պաշարեցին զնա։

6Եւ առաքեցին բնակիչք Գաբաւոնի առ Յեսու ի բանակն Իսրայելի ի Գաղգաղա՝ եւ ասեն. Մի՛ թողացուսցես զձեռն քո ի ծառայից քոց, ել առ մեզ վաղվաղակի եւ ապրեցո զմեզ, եւ օգնեա մեզ. զի ժողովեալ են ի վերայ մեր ամենայն թագաւորք Ամովրհացւոց որ բնակեալ են ի լեռնակողմանն։ 7Եւ ել Յեսու ի Գաղգաղայ, ինքն եւ ամենայն զօրն պատերազմօղ ընդ նմա, եւ ամենայն որ կարող էր զօրութեամբ։ 8Եւ ասէ Տէր ցՅեսու. Մի՛ երկնչիցես ի նոցանէ, զի ի ձեռս քո մատնեցից զնոսա. եւ ոչ ժուժկալեսցէ ի նոցանէ եւ ոչ մի ոք առաջի ձեր։ 9Եւ եհաս ի վերայ նոցա Յեսու յանկարծակի զցայգն ամենայն եկեալ ի Գաղգաղայ։ 10Եւ զարհուրեցոյց զնոսա Տէր յերեսաց Իսրայելի, եւ եբեկ զնոսա բեկումն մեծ ի Գաբաւոն. եւ հալածեցին զնոսա ընդ ճանապարհ զառիվայրին Բեթորոնայ, եւ կոտորեցին զնոսա մինչեւ յԱզեկա եւ ցՄակեդա։ 11Եւ ի փախչելն նոցա յերեսաց որդւոցն Իսրայելի ընդ զառիվայրն Բեթորոնայ, եւ Տէր արկ ի վերայ նոցա քարինս կարկտի յերկնից մինչեւ ցԱզեկա՝՝. եւ եղեն բազումք այնոքիկ որ մեռան ի քարանց կարկտին, քան զայնոսիկ զորս կոտորեցին որդիքն Իսրայելի սրով պատերազմի։

12Յայնժամ խօսեցաւ Յեսու ընդ Տեառն յաւուր յորում մատնեաց Տէր Աստուած զԱմովրհացին ընդ ձեռամբ որդւոցն Իսրայելի, ի ժամանակին յորում խորտակեաց զնոսա ի Գաբաւոն, եւ խորտակեցան յերեսաց Իսրայելի, եւ ասէ Յեսու՝՝. Կացցէ արեգակն հանդէպ Գաբաւոնի եւ լուսին հանդէպ ձորոյն Ելովնայ։ 13Եւ կացին արեգակն եւ լուսին ի կայի իւրեանց, մինչեւ էառ Աստուած զվրէժ ի թշնամեաց նոցա։ Ո՞չ ապաքէն գրեալ է այս ի գիրս Ուղղութեան. Եւ եկաց արեգակն ի մէջ երկնից, եւ ոչ խաղաց ընդ արեւմուտս՝ մինչեւ ցկատարումն աւուր միոյ։ 14Եւ ոչ եղեւ այսպիսի օր ոչ յառաջ եւ ոչ յետոյ, լսել Աստուծոյ ձայնի մարդոյ. զի Տէր պատերազմեցաւ խառն ընդ՝՝ Իսրայելի։

15Եւ դարձաւ Յեսու եւ ամենայն Իսրայէլ ընդ նմա ի բանակն ի Գաղգաղա։ 16Եւ փախեան հնգեքին թագաւորքն այնոքիկ եւ թաքեան ի յայրին ի Մակեդա։ 17Եւ ազդ եղեւ Յեսուայ եւ ասեն. Գտան հինգ թագաւորքն թաքուցեալք ի յայրի անդ ի Մակեդա։ 18Եւ ասէ Յեսու. Թաւալեցուցէք վէմս մեծամեծս ի բերան այրին, եւ կացուցէք ի վերայ նոցա արս պահել զնոսա. 19բայց դուք մի՛ դադարէք ի պնդելոյ զհետ թշնամեաց ձերոց, եւ հասէք ի վերջս նոցա, եւ մի՛ տայք նոցա թոյլ մտանել ի քաղաքս իւրեանց. քանզի մատնեաց զնոսա Տէր Աստուած ի ձեռս մեր։ 20Եւ եղեւ իբրեւ դադարեաց Յեսու եւ ամենայն որդիքն Իսրայելի ի կոտորելոյ զնոսա կոտորումն մեծ յոյժ մինչեւ ի սպառ, եւ ապրեալքն որ ապրեցան ի նոցանէ՝ մտին ի քաղաքս ամուրս, 21եւ դարձաւ ամենայն ժողովուրդն ի բանակն առ Յեսու ի Մակեդա ողջանդամք. եւ ոչ ոք կռնչեաց յորդւոցն Իսրայելի լեզուաւ իւրով։ 22Եւ ասէ Յեսու. Բացէք զայրն եւ հանէք առ իս զհնգեսին թագաւորսն յայրէ անտի։ 23Եւ արարին այնպէս, եւ հանին առ նա զհնգեսին թագաւորսն յայրէ անտի, զթագաւորն Երուսաղեմի եւ զթագաւորն Քեբրոնի եւ զթագաւորն Յերիմութայ եւ զթագաւորն Լաքիսայ եւ զթագաւորն Եգղոնայ։ 24Եւ իբրեւ հանին զնոսա առ Յեսու, եւ կոչեաց Յեսու զամենայն Իսրայէլ եւ զյառաջամարտիկս երթալ ընդ նմա, եւ ասէ ցնոսա. Մատիք յառաջ եւ դիք զոտս ձեր ի վերայ պարանոցաց նոցա. եւ մատուցեալ եդին զոտս իւրեանց ի վերայ պարանոցաց նոցա։ 25Եւ ասէ ցնոսա Յեսու. Մի՛ երկնչիք ի նոցանէ եւ մի՛ զանգիտիցէք, քաջացարուք եւ զօրացարուք, զի այսպէս արասցէ Տէր ընդ ամենայն թշնամիս ձեր ընդ որս դուք մարտնչիցիք։ 26Եւ կոտորեաց զնոսա Յեսու, եւ կախեաց զնոսա հնգեսին զփայտից, եւ կային կախեալ զփայտիցն մինչեւ ցերեկոյ։ 27Եւ եղեւ ընդ արեւմուտսն հրամայեաց Յեսու եւ իջուցին զնոսա ի փայտիցն, եւ ընկեցին յայրն յոր փախուցեալ անկեալ էին, եւ թաւալեցուցին քարինս մեծամեծս ի վերայ այրին մինչեւ ցայսօր ժամանակի։

28Եւ զՄակեդա առին յաւուր յայնմիկ. եւ կոտորեցին զնա սրով սուսերի եւ զթագաւորն նորա, եւ սատակեցին զնա եւ զամենայն շնչաւոր որ ի նմա. եւ ոչ ոք մնաց ի նմանէ ապրեալ եւ փախուցեալ. եւ արար ընդ թագաւորն Մակեդայ, զոր օրինակ արար ընդ թագաւորն Երիքովի։

29Եւ գնաց Յեսու եւ ամենայն Իսրայէլ ընդ նմա ի Մակեդայէ ի Լեբնա, եւ պաշարեցին զԼեբնա։ 30Եւ մատնեաց զնա Տէր ի ձեռս Իսրայելի. եւ առ զնա՝՝ եւ զթագաւոր նորա, եւ կոտորեաց զնա սրով սուսերի եւ զամենայն շնչաւոր որ ի նմա, եւ ոչ մնաց ի նմա եւ ոչ մի ապրեալ եւ փախստական. եւ արար ընդ թագաւորն նորա՝ զոր օրինակ արար ընդ թագաւորն Երիքովի։

31Եւ գնաց Յեսու եւ ամենայն Իսրայէլ ընդ նմա ի Լեբնայէ ի Լաքիս, եւ նստաւ զնովաւ եւ պաշարեաց զնա։ 32Եւ մատնեաց Տէր զԼաքիս ի ձեռս Իսրայելի, եւ առ զնա յաւուրն երկրորդի, եւ կոտորեաց զնա բերանով սրոյ, եւ սատակեաց զնա, զոր օրինակ արար ընդ Լեբնա։

33Յայնժամ ել Ելամ արքայ Գազերայ օգնել Լաքիսայ, եւ եհար զնա Յեսու սրով սուսերի եւ զզօրս նորա մինչեւ չմնալ ի նոցանէ ապրեալ եւ փախստական։

34Եւ չուեաց Յեսու եւ ամենայն Իսրայէլ ընդ նմա ի Լաքիսայ յԵգղոն, եւ նստաւ զնովաւ եւ պաշարեաց զնա եւ մատնեաց զնա Տէր ի ձեռս Իսրայելի՝՝. 35եւ առ զնա յաւուր յայնմիկ, եւ կոտորեաց զնա սրով սուսերի, եւ զամենայն շնչաւոր որ ի նմա յաւուր յայնմիկ կոտորեցին, զոր օրինակ արարին ընդ Լաքիս։

36Եւ չուեաց Յեսու եւ ամենայն Իսրայէլ ընդ նմա յԵգղոնայ ի Քեբրոն, եւ նստաւ զնովաւ. 37եւ առին զնա, եւ հարին զնա բերանով սուսերի, եւ զթագաւորն նորա, եւ զամենայն շնչաւոր որ ի նմա, եւ ի նմա ոչ ոք էր ապրեալ. եւ արարին ընդ նմա որպէս արարին ընդ Եգղոն. եւ սատակեցին զնա եւ զամենայն շնչաւոր եւ զամենայն ինչ որ ի նմա։

38Եւ դարձաւ Յեսու եւ ամենայն Իսրայէլ ի Դաբիր, եւ նստեալ զնովաւ՝ 39առին զնա եւ զթագաւորն նորա եւ զամենայն զօրս նորա. եւ հարին զնա բերանով սրոյ, եւ սատակեցին զնա եւ զամենայն շնչաւոր որ ի նմա, եւ ոչ թողին եւ ոչ մի ապրեալ. զոր օրինակ արարին ընդ Քեբրոն՝ նոյնպէս արարին ընդ Դաբիր եւ ընդ թագաւորն նորա, եւ որպէս արարին ընդ Լեբնա եւ ընդ թագաւորն նորա։

40Եւ եհար Յեսու զամենայն երկիրն լեռնական եւ զՆագեբ եւ զդաշտականսն, եւ զԱսեթովթ եւ զամենայն թագաւորս նորա, եւ ոչ եթող ի նմանէ ապրեալ, եւ զամենայն շնչաւոր սատակեցին ի նմանէ, զոր օրինակ պատուիրեաց Տէր Աստուած Իսրայելի։ 41Եւ կոտորեաց զնոսա Յեսու ի Կադէսբառնեայ մինչեւ ցԳազա, եւ զամենայն երկիրն Գոսոմայ մինչեւ ցԳաբաւոն։ 42Եւ զամենայն թագաւորսն նոցա, եւ զերկիր նոցա ա՛ռ Յեսու միանգամայն. զի Տէր Աստուած Իսրայելի համագունդ կռուէր ընդ՝՝ Իսրայելի։ 43Եւ դարձաւ Յեսու եւ ամենայն Իսրայէլ ընդ նմա ի բանակն ի Գաղգաղա։