1Իբրեւ լուաւ Յաբին արքայ Ասովրայ, առաքեաց առ Յոբաբ արքայ Մառոնայ եւ առ արքայն Սէմերոնի եւ առ արքայն Աքիփայ, 2եւ առ թագաւորս մեծի Սիդոնայ ի լեռնայինսն, եւ յՌաբաթ հանդէպ Քեներեթայ, եւ ի դաշտայինն եւ ի Նաբեթդովր, եւ ի ծովեզերեայսն, 3Քանանացիս յարեւելից կողմանէ, ի ծովեզերեայսն Ամովրհացւոց՝՝, եւ ի Քետացիս եւ ի Փերեզացիս եւ Յեբուսացիս որ ի լերինն, եւ ի Խեւացիսն որ ընդ Հերմոնիւ ի Մասեփա։ 4Եւ ելին ինքեանք եւ թագաւորք իւրեանց ընդ նոսա, եւ՝՝ զօր բազում իբրեւ զաւազ առ ափն ծովու բազմութեամբ, եւ երիվարք եւ կառք բազում յոյժ։ 5Գումարեցան ամենայն թագաւորքն այնոքիկ եւ եկին ի միասին, եւ բանակեցան միանգամայն առ ջրովն Մառոնայ՝ տալ պատերազմ ընդ Իսրայելի։

6Եւ ասէ Տէր ցՅեսու. Մի՛ երկնչիր յերեսաց նոցա, զի վաղիւ ի սոյն ժամու մատնեցից ես զամենեսեան զնոսա վանեալս առաջի որդւոցն Իսրայելի. զերիվարս նոցա կարթակոտորս արասցես, եւ զկառս նոցա այրեսցես հրով։ 7Եւ եկն Յեսու եւ ամենայն զօրն պատերազմող ընդ նմա ի վերայ նոցա ի ջուրն Մառոնայ յանկարծօրէն, եւ անկան ի վերայ նոցա ի լեռնակողմանն։ 8Եւ մատնեաց զնոսա Տէր ընդ ձեռամբ Իսրայելի, եւ կոտորեալ զնոսա՝ արարին հալածական մինչեւ ցմեծն Սիդոն, եւ մինչեւ ցՄասրեփովթմայիմ, եւ մինչեւ ցդաշտն Մասեփայ ընդ արեւելս. եւ կոտորեաց զնոսա մինչեւ չմնալոյ ի նոցանէ ապրեալ։ 9Եւ արար ընդ նոսա Յեսու որպէս պատուիրեաց նմա Տէր. զերիվարս նոցա կարթակոտորս արար, եւ զկառս նոցա այրեաց հրով։

10Եւ դարձաւ Յեսու ի ժամանակին յայնմիկ, եւ առ զԱսովր եւ զթագաւորն նորա, եւ սպան զնա. զի Ասովր էր նախ իշխան ամենայն թագաւորութեանցն այնոցիկ. 11եւ կոտորեցին զամենայն շնչաւոր որ ի նմա սրով սուսերի, եւ սատակեցին զամենեսին. եւ ոչ մնաց ի նմա շնչաւոր. եւ զԱսովր այրեցին հրով։ 12Եւ զամենայն քաղաքս թագաւորութեանցն այնոցիկ եւ զթագաւորս նոցա ա՛ռ Յեսու, եւ կոտորեաց զնոսա սրով սուսերի եւ սատակեաց զնոսա, զոր օրինակ հրամայեաց նոցա Մովսէս ծառայ Տեառն։ 13Այլ զամենայն քաղաքս հողացուցեալս ի նոցանէ՝՝ ոչ այրեաց Իսրայէլ, բայց միայն զԱսովր զոր այրեաց Յեսու։ 14Եւ զամենայն կապուտ նորա եւ զանասուն առին իւրեանց յաւարի որդիքն Իսրայելի. բայց զնոսա զամենեսին՝՝ սատակեցին սրով սուսերի մինչեւ կորուսին զնոսա, եւ ոչ թողին ի նոցանէ եւ ոչ մի շնչաւոր։ 15Զոր օրինակ հրամայեաց Տէր Մովսիսի ծառայի իւրում, եւ որպէս պատուիրեաց Մովսէս Յեսուայ՝ նոյնպէս արար Յեսու. եւ ոչ անց եւ ոչ զիւիք յամենայնէ զոր պատուիրեաց նմա Մովսէս՝՝։

16Եւ ա՛ռ Յեսու զամենայն երկիրն զայն, զլեռնակողմնն եւ զամենայն երկիրն Նագեբ՝՝, եւ զամենայն երկիրն Գոսոմ, եւ զդաշտայինն եւ զարեւմտեայն՝՝, եւ զլեառնն Իսրայելի եւ զհովիտ նորա որ առ լերամբն. 17ի լեռնէն Աքելայ եւ ցելսն Սուրայ՝՝, մինչեւ ցԲաաղգադ, եւ զդաշտայինն՝՝ Լիբանանու առ ոտամբն Հերմոնի, եւ զթագաւորս նոցա զամենեսին առ եւ կոտորեաց։ 18Եւ աւուրս բազումս արար Յեսու ընդ ամենայն թագաւորսն ընդ այնոսիկ պատերազմ։ 19Եւ ոչ էր քաղաք զոր ոչ մատնեաց Տէր՝՝ որդւոցն Իսրայելի, բաց ի Խեւացւոյն որ բնակեալ էր ի Գաբաւոն. զամենեսին ա՛ռ պատերազմաւ։ 20Զի ի Տեառնէ կարծրանային սիրտք նոցա պատահել պատերազմաւ Իսրայելի զի սատակեսցին, եւ մի՛ տացի նոցա ողորմութիւն, այլ զի սատակեսցին որպէս խօսեցաւ Տէր ընդ Մովսիսի։

21Եւ եկն Յեսու ի ժամանակին յայնմիկ եւ սատակեաց զԵնակիմսն ի լեռնակողմն Քեբրոնի եւ՝՝ Դաբիրայ, եւ յԱնովբայ եւ յամենայն լեռնէն Իսրայելի եւ յամենայն լեռնէն Յուդայ, հանդերձ քաղաքօք նոցա, եւ սատակեաց զնոսա Յեսու։ 22Եւ ոչ մնաց յԵնակիմացն յորդւոցն Իսրայելի, բայց միայն ի Գազա եւ ի Գէթ եւ յԱսեդովթ մնացին։

23Եւ ա՛ռ Յեսու զամենայն երկիրն որպէս պատուիրեաց Տէր Մովսիսի, եւ ետ Յեսու ժառանգութիւն Իսրայելի վիճակաւ ըստ ցեղից նոցա. եւ դադարեաց երկիրն պատերազմել։