1Եւ եղեն որդւոցն Յովսեփայ սահմանք, ի Յորդանանէ հանդէպ Երիքովի, ի ջրոյ անտի որ հանդէպ՝՝ Երիքովի յարեւելից, ընդ անապատն եւ ամբառնան յԵրիքովէ ի լեռնակողմ անապատին ի Բեթէղղուզա՝՝, 2եւ ելանեն ի Բեթէղղուզայ եւ անցանեն առ սահմանօքն Արքիատարովթայ, 3եւ ելանեն ընդ ծովակողմն ի սահմանսն Յեփաղթեայ, մինչեւ ցսահմանս Բեթորոնայ ներքնոյ եւ մինչեւ ցԳազեր, եւ եղիցին ելք նոցա ընդ ծովակողմն։ 4Եւ ժառանգեցին որդիքն Յովսեփայ՝ Եփրեմ եւ Մանասէ։

5Եւ եղեն սահմանք որդւոցն Եփրեմայ ըստ տոհմից իւրեանց. եւ եղեն սահմանք ժառանգութեան նոցա յարեւելից՝ Ատարովթ Ադար, մինչեւ ցԲեթորոնն վերին եւ ցԳազեր՝՝. 6եւ անցանեն սահմանքն ընդ ծովակողմն ի Մաքովթ ի հիւսիսոյ, եւ պատիցի սահմանն ընդ արեւելս ի Թենաթսելով, եւ անցանէ յարեւելից առ Յանովաւ, 7եւ իջցէ Յանովայ յԱտարովթ եւ ի Նաարաթա, եւ աւանք նոցա՝՝ անցցեն առ Երիքոյիւ եւ հանցեն ի Յորդանան. 8եւ ի Թափուեայ անցցեն սահմանքն ի ծովակողմն՝ ի հեղեղատն Կանայ, եւ եղիցին ելք նորա ի ծովակողմն։ Այս է ժառանգութիւն ցեղի որդւոցն Եփրեմի ըստ տոհմից իւրեանց. 9եւ քաղաքքն զատուցեալք որդւոցն Եփրեմի ի մէջ ժառանգութեան որդւոցն Մանասէի, ամենայն քաղաքք եւ աւանք նոցա։

10Եւ ոչ կորոյս Եփրեմ զՔանանացին բնակեալ ի Գազեր, եւ բնակէր Քանանացին ի մէջ Եփրեմայ մինչեւ ցայսօր. մինչեւ ել փարաւոն արքայ Եգիպտացւոց եւ առ զքաղաքն, եւ այրեաց զնա հրով, եւ զՔանանացին եւ զՓերեզացին զբնակեալն ի Գազեր խոտեաց, եւ ետ զնա փարաւոն պաշտատական դստեր իւրում.՝՝ եւ եղեն ծառայք հարկատուրք։