1Եւ եկեղեցացաւ ամենայն ժողովուրդ որդւոցն Իսրայելի ի Սելով, եւ կանգնեցին անդ զխորանն վկայութեան. եւ երկիրն նուաճեցաւ ի նոցանէ։ 2Եւ մնացին որդիքն Իսրայելի եւ ոչ ժառանգեցին եւթն ցեղն՝՝։ 3Եւ ասէ ցնոսա Յեսու. Մինչեւ յե՞րբ մեղկիցիք չմտանել ժառանգել զերկիրն զոր ետ ձեզ Տէր Աստուած հարցն մերոց։ 4Տուք ինձ երիս արս ի ցեղէ, եւ առաքեցից զնոսա, եւ յարուցեալ անցանիցեն ընդ երկիրն, եւ գրեսցեն զնա առաջի իմ՝ թէ որպէս պարտ իցէ բաժանել զնա։ 5Եւ եկին առ նա. եւ բաժանեաց նոցա եւթն մասն՝՝. Յուդայ կացցէ նոցա սահման ի հարաւոյ, եւ որդիքն Յովսեփայ կացցեն ի սահմանս իւրեանց ի հիւսիսոյ։ 6Եւ դուք բաժանեցէք զերկիրն եւթն բաժին, եւ բերէք առ իս այսր, եւ հանից ձեզ վիճակ աստ առաջի Տեառն Աստուծոյ մերոյ։ 7Զի ոչ գոյ ընդ ձեզ բաժին որդւոցն Ղեւեայ, զի քահանայութիւն Տեառն է բաժին նորա. եւ Գադ եւ Ռուբէն եւ կէս ցեղին Մանասէի առին զժառանգութիւն իւրեանց յայնկոյս Յորդանանու յարեւելս, զոր ետ նոցա Մովսէս ծառայ Տեառն։

8Եւ յարուցեալ արքն գնացին. եւ պատուիրեաց Յեսու արանցն երթելոց աշխարհադիտել զերկիրն, եւ ասէ. Անցէք գնացէք եւ աշխարհադիտեցէք զերկիրն. եւ եկեսջիք առ իս այսր, եւ հանից ձեզ վիճակս առաջի Տեառն ի Սելով։ 9Եւ գնացին արքն եւ շրջեցան ընդ երկիրն, եւ աշխարհադիտեցին զերկիրն եւ տեսին զնա, եւ գրեցին ըստ քաղաքաց իւրեանց եւթն բաժին ի մատենի, եւ բերին առ Յեսու ի բանակն ի Սելով։ 10Եւ արկ նոցա Յեսու վիճակ ի Սելով առաջի Տեառն, եւ բաժանեաց անդ զերկիրն որդւոցն Իսրայելի՝ ըստ բաժանմանց իւրեանց։

11Եւ ել նախ վիճակն Բենիամինի ըստ տոհմից իւրեանց. եւ էին սահմանք վիճակի նոցա ի մէջ Յուդայ եւ ի մէջ որդւոցն Յովսեփայ։ 12Եւ եղեն սահմանք նոցա ի հիւսիսոյ Յորդանանու. եւ ամբարձցին սահմանք ի հարաւոյ Երեքոյի ընդ հիւսիսի, եւ ամբարձցին ի լեառնն ընդ ծովակողմն, եւ եղիցին նորա ելք Մաբդարայինն Բեթաւան. 13եւ անցցեն անտի սահմանքն Լուզայ, ի թիկանց Լուզայ ի հարաւոյ կողմանէ, այն է Բեթէլ. եւ իջցեն սահմանքն ցԱտարովթ Ադարայ ի լեռնակողմն, որ է ի հարաւոյ Բեթորոնայ ներքնոյ։ 14Եւ անցցեն սահմանքն եւ պատեսցեն առ եզերբն որ հայի ընդ ծով ի հարաւոյ, ի լեռնէն որ հանդէպ Բեթորոնի է ընդ հարաւոյ, եւ եղիցին նորա ելք ի Կարիաթբաաղ, այն է Կարիաթարիմ քաղաք որդւոցն Յուդայ. եւ այն է եզր ընդ ծովակողմն։ 15Եւ եզր ընդ հարաւ յեզրէ Կարիաթարիմայ, եւ անցանեն սահմանքն ի Գային, եւ ելցեն յաղբեւր ջրոցն Նափթովայ։ 16Եւ իջցեն սահմանքն յեզր լերինն որ է յանդիման հովտացն որդւոցն Ենովմայ, որ է մասն Ենակայ. Ռափայնոցն, ի հիւսիսի. եւ իջցեն ի Գայի Ենովմայ ի թիկանց Յեբուսայ ի հարաւոյ, եւ իջցեն յաղբեւրն Ռովգելայ. 17եւ հատցեն ընդ հիւսիսի, եւ անցցեն յաղբեւրն ի Սամիւս, եւ պատեսցին առ Գալիլովթաւ, որ է հանդէպ զառիվերին Եդովմինեայ. եւ իջցեն ի վէմն Բաան, որդւոյ Ռուբենի. 18եւ անցցեն ի թիկանց Բեթարաբայ ի հիւսիսոյ, եւ իջցեն յԱրաբա. 19եւ իջցեն սահմանքն ի թիկանց Բեթագղայ ի հիւսիսոյ ծովու, եւ եղիցին ելք սահմանացն ի սար ծովուն Աղւոյ ի հիւսիսոյ, եւ յեզր Յորդանանու ի հարաւոյ. այս են սահմանքն նոցա ի հարաւոյ։ 20Եւ Յորդանան զատուցանէ ի կողմանէ արեւելից։ Այս է ժառանգութիւն որդւոցն Բենիամինի, եւ սահմանք նոցա շուրջանակի ըստ տոհմից իւրեանց։

21Եւ եղեն քաղաքք ցեղի որդւոցն Բենիամինի ըստ տոհմից իւրեանց, Երիքով եւ Բեթագղա եւ Ամենգասիմ 22եւ Բեթարաբա եւ Սեմարիմ եւ Բեթէլ եւ Աւիմ եւ Ափար եւ Ափրա 23եւ Կարեմ եւ Քափերամին եւ Գաբաա. 24քաղաքք երկոտասան եւ աւանք նոցա։ 25Գաբաւոն եւ Ռամմա եւ Բերովթ 26եւ Մասփա եւ Կեփիրա եւ Ամուսա 27եւ Ռէկէմ եւ Յերփայէլ եւ Թարաղա 28եւ Սելա, Ելէփ եւ Յեբուս՝ այն է Երուսաղէմ, եւ Գաբաաթ եւ քաղաքն Արեմ. քաղաքք չորեքտասան, եւ աւանք նոցա։ Այս է ժառանգութիւն որդւոցն Բենիամինի ըստ տոհմից իւրեանց։