1Եւ ել երկրորդ վիճակն Շմաւոնի, ցեղի որդւոցն Շմաւոնի ըստ տոհմից իւրեանց. եւ եղեւ ժառանգութիւն նոցա ի մէջ վիճակի որդւոցն Յուդայ։ 2Եւ եղեւ վիճակ նոցա Բերսաբէէ եւ Սաբէէ եւ Մովղադա 3եւ Ասերսուաղ եւ Բովղա եւ Ասոմ 4եւ Եղթուղաադ եւ Բաթուղ եւ Երմա 5եւ Սիկեղա եւ Բեթմարքաբովթ եւ Ասերսուսիմ 6եւ Բեթղաբաթ, եւ ագարակք նոցա՝՝. քաղաքք երեքտասան եւ աւանք նոցա։ 7Ային եւ Ռեմոն եւ Եթեր եւ Ասան. քաղաքք չորք եւ աւանք նոցա։ 8Եւ ամենայն ագարակք շուրջ զքաղաքօքն այնոքիւք, մինչեւ զԲաաղեթ Բերամմովթ, ի մուտս Ռամաթայ ընդ հարաւ։ Այս է ժառանգութիւն ցեղի որդւոցն Շմաւոնի ըստ տոհմից իւրեանց։ 9Ի վիճակին Յուդայ ժառանգութիւն ցեղի որդւոցն Շմաւոնի. քանզի եղեւ բաժին որդւոցն Յուդայ մեծ քան զնոցայն, եւ ժառանգեցին որդիքն Շմաւոնի ի մէջ վիճակի նոցա։

10Եւ ել երրորդ վիճակն Զաբուղոնի ըստ տոհմից իւրեանց. եւ եղեն սահմանք ժառանգութեան նոցա մինչեւ ցՍարիդ. 11սահմանք նոցա ծովն եւ Մարաղա, եւ հասցեն ցԴաբասթէ. եւ հանդիպեսցին ձորոյն որ է հանդէպ Յեկնամայ, 12եւ դարձցին ի Սարիդա դէմ յանդիման յարեւելից Բեթսամեայ, ի սահմանս Քասաղովթ Թաբովրայ, եւ անցցեն ի Դաբարաթ, եւ ամբարձցին առ Յաբագայիւ։ 13Եւ անտի պատիցին հանդէպ ընդ արեւելս ձգեալ ի քաղաքն՝՝ Կատասիմ, եւ անցցեն յՌեմմոն, յԱմաթարիմ, Աննուայ՝՝, 14եւ պատեսցին զսահմանօքն հիւսիսի ցԵկանթովն, եւ եղիցին ելք նոցա ի Գայի՝ Յեփթայեղի. 15եւ ընդ Կատտամաթ եւ ընդ Նաաղովղ եւ ընդ Սեմրոն եւ ընդ Յադեղա եւ ընդ Բեթղեհեմ. քաղաքք երկոտասան եւ աւանք նոցա։ 16Այս է ժառանգութիւն ցեղի որդւոցն Զաբուղոնի ըստ տոհմից իւրեանց, քաղաքք նոցա եւ աւանք իւրեանց։

17Եւ Իսաքարայ ել չորրորդ վիճակն, որդւոցն Իսաքարու ըստ ազգականութեան իւրեանց։ 18Եւ եղեն սահմանք նոցա Յեզրայէլ եւ Աքասեղովթ եւ Սունամ 19եւ Ափերեմ եւ Սիան եւ Ռամաթ եւ Ենդանիմ եւ Ռենաթ եւ՝՝ Անարեթ 20եւ Ռաբբովթ եւ Կեսիոն եւ Այեմէս 21եւ Ռամաթ եւ Ենգադիս եւ Ենգադդա եւ Բեթմասեմ. 22եւ կցեսցին սահմանքն ի Թաբովր եւ ի Կասիմ ընդ ծովակողմն՝՝, եւ ի Բեթսամիւս. եւ եղիցին ելք սահմանաց նոցա Յորդանան. քաղաքք վեշտասան եւ աւանք նոցա։ 23Այս է ժառանգութիւն ցեղի որդւոցն Իսաքարու ըստ տոհմից իւրեանց. քաղաքք եւ ագարակք իւրեանց։

24Եւ ել վիճակն հինգերորդ ցեղի որդւոցն Ասերայ ըստ տոհմից իւրեանց։ 25Եւ եղեն սահմանք նոցա Քեղկաթ եւ Ոողի եւ Բատնէ եւ Աքսափ 26եւ Ամաթ եւ Մասաղ. եւ կցեսցի ի Կարմեղ ընդ ծովակողմն. եւ Սիովր եւ ի Բաղանայէ՝՝, 27եւ դարձցին յարեւելից կողմանէ ի Բեթդագովն, եւ կցեսցի ի Զաբուղոն եւ ի Գայի, յԵփթայեղի, ընդ հիւսիսի. եւ մտցեն սահմանքն ի Սափաթա Բեթամեկ. եւ գնասցեն ընդ սահմանակիցս Անայելի՝՝, եւ անցցեն ի Քաբովղ յահեկէ կողմանէ, 28եւ յԱքրան, եւ յՌովբ, եւ յԱմմովն, եւ ի Կանայի մինչեւ ի Սիդոն մեծ. 29եւ դարձցին սահմանքն յՌամա մինչեւ ցքաղաք ամրոցին Տիւրացւոց, եւ դարձցին սահմանքն ի Սովսա, եւ եղիցին ելք նորա ծովն, եւ վիճակն Ակզիփայ. 30եւ Ամմա եւ Ափեկա եւ Ռաւովբա. քաղաքք քսան եւ երկու եւ աւանք նոցա։ 31Այս է ժառանգութիւն ցեղի որդւոցն Ասերայ ըստ տոհմից իւրեանց. քաղաքք նոցա եւ աւանք իւրեանց։

32Եւ Նեփթաղիմայ ել վիճակն վեցերորդ, որդւոցն Նեփթաղիմայ ըստ տոհմից իւրեանց։ 33Եւ եղեն սահմանք նոցա Մեեղեփ եւ Մայեղովմ եւ Բերսանայիմ եւ Արմէ եւ՝՝ Նագեբ եւ Յաբնեղ մինչեւ ցՂակում. եւ եղեն ելք նոցա Յորդանան։ 34Եւ դարձցին սահմանքն ի ծովն Ազանովթ Թաբովր, եւ անցցեն անտի ի Կովկ. եւ կցեսցին ի հարաւոյ՝ Զաբուղոնի, եւ Ասերայ կցեսցին ի ծովակողմն, Յուդայ եւ՝՝ Յորդանան յարեւելից կողմանէ։ 35Եւ քաղաքք պարսպաւորք Տիւրացւոց՝ Տիւրոս՝՝ եւ Ամաթ եւ Ռեկկաթ եւ Քեներեթ 36եւ Ադամի եւ Ռամմա եւ Ասովր 37եւ Կադէս եւ Եդրային եւ Ակնասովր 38եւ Յարովն եւ Մակդաղիէլ, Ովրամ եւ Բեթանաթ եւ Բեթսամիւս. քաղաքք ինն եւ տասն եւ ագարակք նոցա։ 39Այս է ժառանգութիւն ցեղի որդւոցն Նեփթաղիմայ, ըստ տոհմից իւրեանց, քաղաքք եւ աւանք նոցա։

40Եւ ցեղի որդւոցն Դանայ ըստ տոհմից իւրեանց ել վիճակն եւթներորդ։ 41Եւ եղեն սահմանք ժառանգութեան նոցա Սարաա եւ Եսթաւուղ 42եւ Սաղաբին եւ Յեթղա եւ Թամնա 43եւ Եղթեկով եւ Բաաղովթ եւ Բանեբարակ, 44եւ քաղաքք Սամէս եւ Յաաղոն եւ Եղոն եւ Ակկարոն 45եւ Գաբաթոն եւ Յութ եւ Գեթրեմոն, 46եւ ի ծովէն Բազէից, եւ Բակրովնա. սահման մերձ Յոպպէ՝՝։ 47Եւ ել սահման որդւոցն Դանայ ի նոցանէն։ Այս է ժառանգութիւն ցեղի որդւոցն Դանայ՝ ըստ տոհմից իւրեանց, քաղաքք եւ աւանք նոցա։ Եւ ոչ ջնջեցին որդիքն Դանայ զԱմովրհացին զնեղիչն իւրեանց ի լերինն. եւ ոչ թողուին զնոսա Ամովրհացիքն իջանել ի հովիտսն, եւ նեղէին ի նոցանէ զսահմանս բաժնի իւրեանց։՝՝ Եւ գնացին որդիքն Դանայ եւ ետուն պատերազմ ընդ Ղեսեմայ, եւ առին զնա եւ հարին զնա սրով սուսերի. եւ ժառանգեցին զնա եւ բնակեցին ի նմա. եւ անուանեցին զՂեսեմ՝ Դան, ըստ անուան հօրն իւրեանց։ 48Այս է ժառանգութիւն ցեղի որդւոցն Դանայ ըստ ազգականութեան իւրեանց. քաղաքքս այսոքիկ եւ ագարակք իւրեանց։

49Եւ վախճանեցին ժառանգել զերկիրն ըստ սահմանաց իւրեանց։ Եւ Ամովրհացին տեւեաց բնակել յԵղով եւ ի Սաղամիմ. եւ ծանրացաւ ձեռն Եփրեմի ի վերայ նոցա, եւ եղեն նոցա ի հարկատուս. եւ գնացին նկատել զերկիրն ըստ սահմանաց նոցա։՝՝ Եւ ետուն որդիքն Իսրայելի ժառանգութիւն Յեսուայ որդւոյ Նաւեայ ի մէջ իւրեանց. 50հրամանաւ Տեառն ետուն նմա զքաղաքն զոր խնդրեաց զԹամնաթսարա որ է ի լերինն Եփրեմայ, եւ շինեաց զքաղաքն եւ բնակեցաւ ի նմա։

51Այս են բաժինք՝ զորս բաժանեաց Եղիազար քահանայ եւ Յեսու Նաւեան, եւ իշխանք նահապետութեանց ցեղիցն Իսրայելի, վիճակօքն ի Սելով առաջի Տեառն առ դրան խորանին վկայութեան. եւ գնացին նկատել՝՝ զերկիրն։