1Եւ եղեւ իբրեւ լուան ամենայն թագաւորք Ամովրհացւոց, որ էին յայնկոյս Յորդանանու առ ծովեզերբն, եւ թագաւորքն Փիւնիկեցւոց՝՝ որ առ ծովեզերբն, եթէ ցամաքեցոյց Տէր Աստուած զՅորդանան գետ առաջի որդւոցն Իսրայելի յանցանելն նոցա, հաշեցան սիրտք նոցա եւ զարհուրեցան՝՝, եւ ոչ գոյր ի նոսա իմաստութիւն եւ ոչ մի՝՝ յերեսաց որդւոցն Իսրայելի։

2Ընդ այնու ժամանակաւ ասէ Տէր ցՅեսու. Արա դու քեզ սուր ի գայլախազ վիմէ. եւ նստեալ թլփատեսցես զորդիսն Իսրայելի կրկնակի։ 3Եւ արար իւր Յեսու սուրս քարեղէնս գայլախազեայս, եւ թլփատեաց զորդիսն Իսրայելի ի տեղւոջն որ կոչէր Բլուր անթլփատից։ Եւ զոր օրինակ յապաւեաց Յեսու զորդիսն Իսրայելի որ էին ի ճանապարհի անդ, որ բնաւ չէին թլփատեալք յելելոցն յԵգիպտոսէ, զամենեսեան թլփատեաց Յեսու։ 4Եւ այս ժողովուրդ է զոր թլփատեաց Յեսու. ամենայն ժողովրդեանն ելելոց յԵգիպտոսէ զարու մանուկ. քանզի ամենայն արք՝՝ պատերազմողք մեռան յանապատին անդէն ի ճանապարհին յելանելն իւրեանց յերկրէն Եգիպտացւոց։ 5Զի թլփատեալք էին ամենայն ժողովուրդն որ ելին, եւ ամենայն ժողովուրդն որ ծնան յանապատին ի ճանապարհին ելանելոյ նոցա յերկրէն Եգիպտացւոց. 6քանզի զքառասուն եւ զերկուս ամս շրջեցաւ Իսրայէլ յանապատին Աբդարեայ, վասն որոյ անթլփատք էին բազումք ի պատերազմողացն ելելոց յերկրէն Եգիպտացւոց՝՝ որք անհնազանդեցան պատուիրանացն Աստուծոյ. որոց եւ սահմանեաց Տէր չտեսանել զերկիրն զոր երդուաւ հարցն նոցա տալ նոցա. զերկիր՝ որ բղխէ զկաթն եւ զմեղր։ 7Եւ փոխանակ նոցա կացոյց զորդիս նոցա՝ զոր թլփատեաց Յեսու, քանզի անթլփատք էին, վասն լինելոյ նոցա անթլփատս ի ճանապարհին։ 8Եւ իբրեւ թլփատեցաւ ամենայն ազգն, հանդարտութիւն կալեալ նստան անդէն ի բանակին մինչեւ ողջացան։ 9Եւ ասէ Տէր ցՅեսու. Յաւուր յայսմիկ բարձի զնախատինս Եգիպտացւոց ի ձէնջ։ Եւ կոչեաց զանուն տեղւոյն այնորիկ Գաղգաղա մինչեւ ցայսօր. 10եւ անդ բանակեցան որդիքն Իսրայելի. եւ արարին որդիքն Իսրայելի՝՝ զզատիկն ի չորեքտասաներորդում աւուր ամսոյն յերեկորեայ, յարեւելից Երիքովի ի դաշտի անդ՝՝։ 11Եւ կերան ի ցորենոյ երկրին զայգոյ զատկին բաղարջ, եւ նորի՝ յաւուր յայնմիկ։

12Եւ պակասեաց մանանայն յետ ուտելոյ նոցա ի ցորենոյ երկրին, եւ ոչ եւս գտանէր որդւոցն Իսրայելի մանանայ. եւ ժողովեցին զպտուղ երկրին Փիւնիկեցւոց ի տարւոջն յայնմիկ։

13Եւ եղեւ մինչ էր Յեսու յԵրիքով, ամբարձեալ զաչս իւր ետես զի կայր առաջի նորա այր, եւ սուսեր մերկ ի ձեռին նորա. եւ մատուցեալ Յեսուայ ասէ ցնա. Մե՞ր ես թէ ի թշնամեաց մերոց։ 14Եւ նա ասէ ցնա. Ես զօրավար եմ զօրու Տեառն, եւ այժմ եկի։ 15Եւ անկաւ Յեսու ի վերայ երեսաց իւրոց եւ երկիր եպագ եւ ասէ ցնա. Տէր, զի՞նչ հրաման տացես ծառայի քում։ 16Եւ ասէ զօրավարն Տեառն ցՅեսու. Լոյծ զկօշիկս քո յոտից քոց, զի տեղիդ յորում կաս՝ սուրբ է։ Եւ արար այնպէս Յեսու։