1Իբրեւ լուան ամենայն թագաւորքն Ամովրհացւոց որ յայնկոյս Յորդանանու՝ որ լեռնայինք եւ որ դաշտայինք, եւ որ յամենայն ծովեզեր ծովուն մեծի եւ որք առ Լիբանաներբն, եւ Քետացիքն եւ Ամովրհացիք եւ Գերգեսացիք եւ՝՝ Քանանացիք եւ Փերեզացիք եւ Խեւացիք եւ Յեբուսացիք, 2եկին ի միասին տալ պատերազմ ընդ Յեսուայ եւ ընդ Իսրայելի՝ ամենեքին առ հասարակ։

3Եւ բնակիչքն Գաբաւոնի լուան զոր ինչ արար Յեսու ընդ Երիքով եւ ընդ Գայի. 4արարին նոքա խորամանկութեամբ՝ եկեալք պաշարովք եւ պատրաստութեամբ, առին քուրձս հնացեալս ի վերայ ուսոց իւրեանց, եւ տիկս գինւոյ հնացեալս եւ պատառատունս կարկատեալս. 5եւ անկանուրդք կօշկաց նոցա,՝՝ հողաթափք իւրեանց հնացեալք եւ կարկատեալք յոտս իւրեանց, եւ հանդերձք իւրեանց հնացեալք զանձամբք իւրեանց, եւ հաց պաշարի իւրեանց չորացեալ եւ ճճեկեր. 6եւ եկին առ Յեսու ի բանակն Իսրայելի ի Գաղգաղա, եւ ասեն ցՅեսու եւ ցամենայն Իսրայէլ. Յերկրէ հեռաստանէ եկեալ եմք, եւ արդ՝ դիք ընդ մեզ ուխտ։ 7Եւ ասեն որդիքն Իսրայելի ցՔոռացին. Տես՝ գուցէ՝՝ առ իս բնակեալ իցես, եւ զիա՞րդ դնեմք ընդ քեզ ուխտ։ 8Եւ ասեն ցՅեսու. Ծառայք քո եմք։ Եւ ասէ ցնոսա Յեսու. Ուստի՞ էք դուք, եւ ուստի՞ եկեալ էք։ 9Եւ ասեն ցնա. Յերկրէ հեռաստանէ յոյժ եկին ծառայք քո յանուն Տեառն Աստուծոյ քո, զի լուաք զանուն նորա, եւ զոր ինչ արար ընդ Եգիպտոս, 10եւ զոր ինչ արար ընդ երկուս թագաւորսն Ամովրհացւոց որ էին յայնկոյս Յորդանանու, ընդ Սեհոն թագաւորն Եսեբոնի, եւ ընդ Ովգ թագաւորն Բասանու՝ որ բնակեալ էր յԱստարովթ եւ յԵդրային՝՝. 11եւ խօսեցան ընդ մեզ ծերքն մեր, եւ ամենայն բնակիչք երկրին մերոյ եւ ասեն. Առէք ձեզ պաշար ճանապարհի, եւ երթայք ընդ առաջ նոցա, եւ ասասջիք ցնոսա. Ծառայք ձեր եմք, եւ արդ դիք ընդ մեզ ուխտ։ 12Զի զհացս զայս մեր, ջերմ առաք պաշար ի տանց մերոց յաւուր յորում ելաք ի տանց մերոց եւ եկաք առ ձեզ, եւ արդ՝ չորացաւ եւ եղեւ ճճեկեր. 13եւ տիկքս զոր լցաք գինւով՝ նորք էին, եւ պատառեցան. եւ ձորձք մեր եւ կօշիկք մաշեցան ի բազում երկայն ճանապարհէն։ 14Եւ առին իշխանքն զպաշար նոցա՝՝ եւ զՏէր ոչ հարցին։ 15Եւ արար ընդ նոսա խաղաղութիւն Յեսու, եւ ուխտեաց նոցա ուխտ ապրեցուցանել զնոսա. եւ երդուան նոցա իշխանք ժողովրդեանն։ 16Եւ եղեւ յետ երից աւուրց զհետ ուխտելոյ նոցա զուխտն՝ լուան եթէ մօտաւորք են, եւ անդէն առ նոսա բնակեն։ 17Չուեցին որդիքն Իսրայելի, եւ ելին ի քաղաքս նոցա յաւուրն երրորդի. եւ քաղաքք նոցա էին Գաբաւոն եւ Կեփիրոն եւ Բերովթ, եւ քաղաքք յԱրիմայ։ 18Եւ ոչ մարտեան ընդ նոսա որդիքն Իսրայելի. քանզի երդուան նոցա ամենայն իշխանք ժողովրդեանն ի Տէր Աստուած Իսրայելի. եւ տրտնջեցին ամենայն ժողովուրդն զիշխանացն։ 19Եւ ասեն ամենայն իշխանքն ցամենայն ժողովուրդն. Մեք երդուաք նոցա ի Տէր Աստուած Իսրայելի, եւ ոչ կարեմք ստել նոցա։ 20Արդ՝ զայս արասցուք նոցա ապրեցուցանել զնոսա, եւ ստասցուք զնոսա.՝՝ եւ մի՛ եկեսցէ ի վերայ մեր բարկութիւն վասն երդմանն զոր երդուաք նոցա։ 21Եւ ասեն ցնոսա իշխանքն. Կեցցեն, եւ լինիցին փայտաբերք եւ ջրակիրք ամենայն ժողովրդեանդ. եւ եղեն փայտակոտորք եւ ջրաբերք, որպէս եւ ասացին նոցա իշխանքն։ 22Եւ կոչեաց զնոսա միահամուռ Յեսու, եւ խօսեցաւ ընդ նոսա եւ ասէ. Ընդէ՞ր խաբեցէք զիս եւ ասացէք. Հեռի եմք ի ձէնջ յոյժ, եւ դուք գաւառականք էք բնակչացս որ ի միջի մերում՝՝։ 23Եւ արդ՝ անիծեալք էք, եւ մի՛ պակասեսցէ ի ձէնջ ծառայ, փայտակոտոր եւ ջրկիր ինձ եւ Աստուծոյ իմում՝՝։ 24Պատասխանի ետուն եւ ասեն ցՅեսու. Ազդեցութեամբ ազդ եղեւ մեզ, զոր ինչ հրամայեաց Տէր Աստուած քո Մովսիսի ծառայի իւրոյ, տալ ձեզ զերկիրս զայս, եւ սատակել զամենայն բնակիչս սորա յերեսաց ձերոց. եւ երկեաք յոյժ վասն անձանց մերոց յերեսաց ձերոց, եւ արարաք զիրն զայն։ 25Եւ արդ աւասիկ եմք ընդ ձեռամբ ձերով. որպէս հաճոյ է ձեզ եւ որպէս կամիք՝՝ առնել՝ արարէք։ 26Եւ արարին նոցա այնպէս, եւ ապրեցոյց զնոսա Յեսու յաւուր յայնմիկ՝՝ ի ձեռաց որդւոցն Իսրայելի, եւ ոչ կոտորեցին զնոսա։ 27Եւ կացոյց զնոսա յաւուր յայնմիկ փայտակոտորս եւ ջրակիրս ամենայն ժողովրդեանն եւ սեղանոյն Աստուծոյ մինչեւ ցայսօր ժամանակի, եւ ի տեղւոջն զոր ընտրեսցէ Տէր։