1Խօսեցաւ Տէր ընդ Մովսիսի եւ ասէ. 2Պատուիրեա որդւոցն Իսրայելի, եւ առցեն քեզ եւղ ի ձիթենեաց սուրբ խակակութ ի լոյս, զի այրիցի ճրագ հանապազորդ, 3արտաքոյ վարագուրին ի խորանին վկայութեան. եւ լուցցեն զայն Ահարոն եւ որդիք նորա՝՝, յերեկորեայ մինչեւ ցառաւօտ առաջի Տեառն անպակաս. օրէն յաւիտենական յազգս ձեր։ 4Ի վերայ աշտանակին սրբոյ այրիցէք ճրագունս առաջի Տեառն մինչեւ ցառաւօտ՝՝։

5Եւ առնուցուք նաշիհ, եւ առնիցէք զայն երկոտասան պան. յերկուց տասանորդաց լինիցի պան մի։ 6Եւ դնիցէք զնոսա երկուս նուէրս, վեց պան զմի նուէրն՝՝ ի վերայ սեղանոյն սրբոյ առաջի Տեառն։ 7Եւ դիցես ի վերայ նուիրին կնդրուկ սուրբ եւ աղ՝՝. եւ եղիցին ի հաց յիշատակի զառաջաւոր Տեառն։ 8Յաւուրն շաբաթուց դնիցէ առաջի Տեառն հանապազորդ յորդւոցն Իսրայելի ուխտ յաւիտենական։ 9Եւ եղիցի Ահարոնի եւ որդւոցն նորա, եւ կերիցեն զայն ի սուրբ տեղւոջն. զի սրբութիւն սրբութեանց է այն նմա ի զոհաւորացն Տեառն, օրէն յաւիտանական։

10Եւ ել որդի կնոջ Իսրայելացւոյ, եւ նա էր որդի առն Եգիպտացւոյ ի մէջ որդւոցն Իսրայելի. եւ կռուեցան ի բանակին որ յԻսրայելացւոյ անտի էր՝՝ եւ այր մի Իսրայելացի. 11եւ անուանեալ որդի կնոջն Իսրայելացւոյ զԱնունն՝ եւ անէծ. եւ ածին զնա առ Մովսէս. եւ անուն մօր նորա Սաղամիթ՝ դուստր Դաբրեայ, յազգէ Դանայ։ 12Եւ արկին զնա ի պահ, դատել զնա հրամանաւ Տեառն։ 13Եւ խօսեցաւ Տէր ընդ Մովսիսի եւ ասէ. 14Հանէք զայն որ անէծն՝ արտաքոյ բանակին, եւ դիցեն որք լուան զձեռս իւրեանց ի վերայ գլխոյ նորա, եւ քարկոծեսցեն զնա ամենայն ժողովուրդն։ 15Եւ ընդ որդիսն Իսրայելի խօսեսցիս եւ ասասցես ցնոսա. Այր ոք այր որ անիծանիցէ զԱստուած, մեղս ընկալցի. 16զի անուանեաց՝՝ զանուն Տեառն՝ մահու մեռցի. քարընկեցութեամբ քարկոծ արասցեն զնա ամենայն ժողովուրդն. եթէ պանդուխտ իցէ եւ եթէ բնակ, յանուանել նորա զանուն Տեառն, սատակեսցի։

17Եւ մարդ որ հարկանիցէ զամենայն անձն մարդոյ եւ մեռանիցի՝ մահու մեռցի եւ նա։ 18Եւ որ հարկանէ զանասուն՝ անձն ընդ անձին տուժեսցի. 19եւ եթէ խեղեսցէ ոք զընկեր իւր, որպէս արարն՝ նոյնպէս արասցի նմա. 20բեկումն ընդ բեկման, ակն ընդ ական, ատամն ընդ ատաման. որպէս առնիցէ ոք զխեղութիւն, նոյնպէս հատուսցի նմա։ 21Եւ որ հարկանիցէ զմարդ եւ մեռանիցի, մահու մեռցի եւ նա։՝՝ 22Իրաւունք՝ մի եւ նոյն կացցեն եկին եւ բնակին. զի ես եմ Տէր Աստուած ձեր։

23Եւ խօսեցաւ Մովսէս ընդ որդիսն Իսրայելի. եւ հանին զայրն որ անէծն՝ արտաքոյ բանակին, եւ քարկոծ արարին զնա ամենայն ժողովուրդն՝՝ քարամբք. եւ որդիքն Իսրայելի արարին որպէս պատուիրեաց Տէր Մովսիսի։