1Եւ եղեւ յաւուրն ութերորդի կոչեաց Մովսէս զԱհարոն եւ զորդիս նորա եւ զծերակոյտն Իսրայելի. 2եւ ասէ Մովսէս ցԱհարոն. Առ դու քեզ զուարակ մի յանդոյ վասն մեղաց եւ խոյ յողջակէզ՝ անարատս. եւ մատո զնոսա առաջի Տեառն։ 3Եւ ընդ ծերակոյտսն Իսրայելի խօսեսցիս եւ ասասցես. Առէք դուք ձեզ նոխազ մի յայծեաց վասն մեղաց, եւ խոյ՝ եւ զուարակ եւ գառն տարեւոր յողջակէզ՝ անարատս. 4եւ զուարակ եւ խոյ՝ յողջակէզ փրկութեան առաջի Տեառն, եւ զոհ նաշիհ զանգեալ իւղով. զի այսօր երեւեսցի Տէր ի միջի ձերում։ 5Եւ առին որպէս եւ հրամայեաց Մովսէս առաջի խորանին վկայութեան. եւ մատեան ամենայն ժողովուրդն եւ կացին առաջի Տեառն։ 6Եւ ասէ Մովսէս. Այս բան է զոր ասաց Տէր առնել, եւ երեւեսցին ի ձեզ փառք Տեառն։ 7Եւ ասէ Մովսէս ցԱհարոն. Մատիր առ սեղանն, եւ արա զվասն մեղացն քո եւ զողջակէզն քո, եւ քաւեա վասն քո եւ տան քո՝՝. եւ արա զպատարագս ժողովրդեան քո, եւ քաւեա վասն նոցա, որպէս պատուիրեաց Տէր Մովսիսի։ 8Եւ մատեաւ Ահարոն առ սեղանն, եւ սպան զզուարակն զվասն մեղացն իւրոց։ 9Եւ մատուցին որդիքն Ահարոնի զարիւնն առ նա, եւ եթաց զմատն յարեանն, եւ եդ ի վերայ եղջերաց սեղանոյն, եւ զարիւնն եհեղ առ յատակաւ սեղանոյն. 10եւ զճարպն եւ զերիկամունսն եւ զլերդաբոյթն զվասն մեղացայոյն՝ եհան ի սեղանն՝՝, որպէս պատուիրեաց Տէր Մովսիսի։ 11Եւ զմիսն եւ զկաշին այրեցին հրով արտաքոյ բանակին։ 12Եւ սպան զողջակէզն. եւ մատուցին որդիքն Ահարոնի զարիւնն առ նա, եւ եհեղ շուրջ զսեղանովն։ 13Եւ զողջակէզն մատուցին առ նա անդամ անդամ՝ եւ զգլուխն, եւ եդ ի վերայ սեղանոյն։ 14Եւ լուաց զքաղիրթն եւ զոտսն ջրով, եւ եդ ի վերայ ողջակիզին ի սեղանն։

15Եւ մատուցին զպատարագ ժողովրդեանն, եւ առ զնոխազն զվասն մեղաց ժողովրդեանն եւ սպան զնա իբրեւ զառաջինն։ 16Եւ մատոյց զողջակէզն, եւ արար զնա որպէս եւ օրէն էր։ 17Եւ մատոյց զզոհն, եւ ելից զձեռս ի նմանէ, եւ եդ ի վերայ սեղանոյն ուրոյն յառաւօտին ողջակիզէն։ 18Եւ սպան զզուարակն եւ զխոյն զոհի փրկութեան ժողովրդեանն, եւ մատուցին որդիքն Ահարոնի զարիւնն առ նա, եւ եհեղ զայն շուրջ զսեղանովն։ 19Եւ զճարպն որ ի զուարակէն եւ ի խոյէն եւ զմկանն՝՝, եւ զճարպ թաղանթ քաղրթին, եւ զերկոսին երիկամունսն ճարպովին, եւ զլերդաբոյթն. 20եւ եդին զճարպն ի վերայ երբծոցն, եւ հանին զճարպն հանդերձ երբծովքն, եւ եդին զճարպն՝՝ ի վերայ սեղանոյն։ 21Եւ զերբուծսն եւ զերին աջոյ նուիրեաց նուէր՝՝ առաջի Տեառն, որպէս պատուիրեաց Տէր Մովսիսի՝՝։

22Եւ ամբարձեալ Ահարոնի զձեռս իւր ի վերայ ժողովրդեանն՝ եւ օրհնեաց զնոսա. եւ էջ արար զվասն մեղացն եւ զողջակէզսն եւ զփրկութեանն։ 23Եւ մտին Մովսէս եւ Ահարոն ի խորանն վկայութեան, եւ ելեալ անտի օրհնեցին զամենայն ժողովուրդն. եւ երեւեցան փառք Տեառն ամենայն ժողովրդեանն։ 24Եւ ել հուր ի Տեառնէ, եւ եկեր որ ինչ կայր ի վերայ սեղանոյն, զողջակէզն եւ զճարպն. եւ ետես ամենայն ժողովուրդն եւ զարհուրեցաւ, եւ անկան ի վերայ երեսաց իւրեանց։