1Եւ արդ այս պատուէր է իմ առ ձեզ, քահանայքդ։ 2Եթէ ոչ լսիցէք եւ ոչ դնիցէք ի սրտի ձերում, տալ փառս անուան իմում, ասէ Տէր ամենակալ, առաքեցից ի վերայ ձեր անէծս, եւ անիծից զօրհնութիւնս ձեր, եւ նզովեցից զնա, եւ ցրուեցից զօրհնութիւնս ձեր. եւ մի՛ եղիցի ի միջի ձերում,՝՝ զի դուք ոչ եդիք ի սրտի ձերում։ 3Ահաւասիկ ես որոշեցից ձեզ թեկն՝՝, եւ ցանեցից զապաւառն ընդ երեսս ձեր, զապաւառն տօնից ձերոց, եւ բարձից զձեզ նովաւ՝՝։ 4Եւ ծանիջիք եթէ ես առաքեցի առ ձեզ զպատուէրդ զայդ՝ լինել ուխտի իմոյ առ Ղեւտացիսն, ասէ Տէր ամենակալ։ 5Ուխտն իմ որ ընդ նմա՝ կենաց եւ խաղաղութեան. ես ետու նմա երկեւղ՝ երկնչել յինէն, եւ յերեսաց անուան իմոյ խորշել։ 6Օրէնք ճշմարտութեան էին ի բերան նորա, եւ անիրաւութիւն ոչ գտաւ ի շրթունս նորա. խաղաղութեամբ եւ ուղղութեամբ գնաց ընդ իս, եւ զբազումս դարձոյց յանիրաւութենէ։ 7Զի շրթունք քահանային զգուշասցին գիտութեան, եւ օրէնս խնդրեսցեն ի բերանոյ նորա. զի հրեշտակ Տեառն ամենակալի է։ 8Իսկ դուք խոտորեցարուք ի ճանապարհէ, եւ տկարացուցէք զբազումս օրինօքն՝՝, եւ ապականեցէք զուխտն Ղեւեայ, ասէ Տէր ամենակալ։ 9Եւ ես ետու զձեզ արհամարհեալս եւ լքեալս ընդ ամենայն ազգս, փոխանակ զի ոչ պահեցէք զճանապարհս իմ. այլ ակն առնուիք օրինօքն։

10Ո՞չ ապաքէն մի հայր է ամենեցուն ձեր. ո՞չ մի Աստուած հաստատեաց զձեզ. զի՞ է զի թողէք՝՝ իւրաքանչիւր զեղբայր իւր, պղծել զուխտ հարցն ձերոց։ 11Լքաւ Յուդա,՝՝ գարշելիք գործեցան յԻսրայելի եւ յԵրուսաղէմ. զի պղծեաց Յուդա զսրբութիւնս Տեառն ի ձեռն այնոցիկ՝՝ զոր սիրեացն, եւ հարաւ յաստուածս օտարս՝՝։ 12Սատակեսցէ Տէր զմարդն որ առնիցէ զայն, մինչեւ նկուն լիցի ի յարկացն Յակոբայ, եւ ի մատուցանելեացն պատարագաց՝՝ Տեառն ամենակալի։ 13Եւ զոր եսն ատէի՝ առնէիք. ծածկեցէք արտասուօք զսեղան իմ, եւ լալով եւ քքովք յաշխատութեանց. Եթէ արժա՞ն ինչ իցէ միւսանգամ հայել ի պատարագս ձեր, եւ կամ առնուլ ընդունելութիւն՝՝ ի ձեռաց ձերոց։ 14Եւ ասացէք. Բայ ընդէ՞ր. զի Տէր եդ ուխտ ի մէջ քո, եւ ի մէջ կնոջ մանկութեան քո զոր թողերն՝՝. եւ նա էր ամուսին եւ կին ուխտի քո։ 15Եւ ոչ այլ ոք արար, եւ հատոր ոգւոյ նորա է։ Եւ ասացէք թէ՝ Զի՞նչ այլ ինչ խնդրէ Աստուած՝ եթէ ոչ զաւակ.՝՝ զգուշացարուք յոգիս ձեր, եւ զկին մանկութեան քո մի՛ թողուր։ 16Բայց եթէ առ ատել արձակեսցես, ասէ Տէր Աստուած Իսրայելի, ծածկեսցէ ամպարշտութիւն զխորհուրդս քո՝՝, ասէ Տէր ամենակալ. զգոյշ լերուք յոգիս ձեր, եւ մի թողուցուք։

17Որ բարկացուցանէք զԱստուած՝՝ բանիւք ձերովք, եւ ասէք. Ի՞ւ բարկացուցաք զնա. յասելն ձեր թէ՝ Ամենայն որ զչար գործէ՝ բարւոք թուի առաջի Տեառն, եւ ընդ այն իսկ հաճեցաւ նա. եւ՝ Ո՞ւր է Աստուած արդարութեան։