1Բանք Նէեմեայ որդւոյ Աքաղիայ։ Եւ եղեւ յամսեանն Քասղեւ յամի քսաներորդի Արտաշիսի արքայի, ես էի ի Շաւշ ի մայր քաղաքացն աբիրայ. 2եւ եկն առ իս՝՝ յեղբարցն իմոց, նա եւ արք Յուդայ, եւ հարցի ցնոսա վասն փրկելոցն որք ապրեցան եւ ելին ի գերութենէն եւ վասն Երուսաղեմի։ 3Եւ ասեն ցիս. Զերծեալքն ի գերութենէն են անդէն յաշխարհին իւրեանց ի մեծ նեղութեան եւ ի նախատինս. եւ պարիսպքն Երուսաղեմի կան նոյնպէս քակեալ եւ աւերեալ, եւ դրունք նորա հրկիզեալ հրով։

4Եւ եղեւ յորժամ լուայ ես զբանս զայս, նստայ եւ լայի եւ սուգ առի զաւուրս եւ պահեցի պահս, եւ կացի յաղօթս առաջի Տեառն Աստուծոյ երկնից, 5եւ ասեմ. Տէր, Աստուած երկնի եւ երկրի, որ զօրաւորդ ես եւ՝՝ մեծ եւ ահարկու, պահես զուխտս եւ զողորմութիւնս ոյք սիրեն զքեզ, եւ ոյք առնեն զօրէնս քո, 6եղիցին ականջք քո ի լսել եւ աչք քո ի տեսանել. եւ արդ լուր եւ տես զաղօթս ծառայի քո զոր ես այսօր մատուցանեմ առաջի քո, վասն որդւոցն Իսրայելի ծառայից քոց, որք մատնեցաք ի նեղութիւն վասն մեղաց մերոց զոր մեղաքն. ես՝՝ եւ տուն հօր իմոյ մեղաք։ 7Վասն զի յանցանելով յանցեաք, եւ ոչ պահեցաք զօրէնս եւ զհրամանս եւ զդատաստանս քո զոր պատուիրեցեր մեզ ի ձեռն ծառային քո Մովսիսի։ 8Յիշեա, Տէր, զբանն քո զոր պատուիրեցեր ծառային քո Մովսիսի եւ ասացեր. Եթէ դուք ոչ պահեսջիք զօրէնս իմ, եւ ես ցրուեցից զձեզ ընդ հեթանոսս. 9եւ եթէ դարձջիք եւ պահիցէք զօրէնս իմ եւ արասջիք զնոսա, եւ եթէ իցէք ցրուեալք մինչեւ ի ծագս երկրի, եւ անտի ժողովեցից եւ ածից զձեզ ի տեղին զոր ընտրեցից եւ յորում բնակէ անուն իմ ի նմա՝՝։ 10Եւ արդ սոքա ծառայք քո եւ ժողովուրդք զորս փրկեցեր զօրութեամբ քով մեծաւ եւ բարձր բազկաւ։ 11Մի՛ թողուր ի ձեռաց. այլ՝՝ եղիցին ականջք քո հայել յաղօթս ծառայից քոց, եւ անսալ խնդրուածոց որոց երկնչին յանուանէ քումմէ. եւ յաջողեա զխնդրուածս ծառայի քո այսօր, եւ տուր ինձ գտանել գթութիւնս առաջի առնս այսորիկ։ Եւ ես էի տակառապետ թագաւորին։