1Եւ այս են որ կնքեն զգիրս զայս հաւատարմութեան առ քեզ. Նէեմիա որդի Աքաղեայ, եւ Սեդեկիա որդի Սարերայ՝՝, 2եւ Ազարիա եւ Երեմիա 3եւ Փասուր, Ամարիա. Մեղքիա, 4Ատտուս, Սաբանիա, Մաղուք, 5Եմաթ, Մերամովթ, Աբդիա, 6Դանիէլ, Կանաթոն, Բարուք, 7Մեսուղամ, Աբիա, Միամին, 8Մաազիա, Բեղգեէ, Սեմէի. այսք ամենեքեան են քահանայք։ 9Եւ Ղեւտացիք՝ Յեսու որդի Ազանեա, Բանիա յորդւոց Ենադադայ, Գադմիէլ, 10եւ եղբարք նոցա, Սեբանիա, Ովդիա, Կաղիտան, Փեղի, Անան, 11Միքա, Հռովբա, Սեբի, 12Զաքուր, Սարաբիա, Սեբանիա, 13Ովդիա, որդիք Բանունեայ՝՝։ 14Իշխանք ժողովրդեանն, Փորխ, Փաքադմովաբ, Եղամ, Զատթուրա, 15որդիք Բանեայ՝՝ Ազգաթ, Բեբայի, 16Ադոնիա, Բագու, Եգին, Ատեր, 18Եզեկիա, Ազուր, Ովդիա, Ասամ, Բեսէի, 19Արիփ, Անաթովթ, Նովբա, 20Մոթափէս, Մեսուղամ, Եզր, 21Մասիզաբէէլ, Զադուկ, Եդովք, 22Փաղիտա, Անան, Անիա, 23Ասէէ, Անանիաս, 24Հռայում՝՝, Էսաբանան, Մաասիա, 26Այիա, Էնան, Աւնան, 27Մաղուք, Հռէում։

28Եւ այլ եւս մնացորդք ժողովրդեանն, քահանայք եւ Ղեւտացիք, դռնապանք, երգեցիկք, Նաթանացիք. եւ ամենեքեան ժողովուրդքս որք լսեմք զօրէնս Տեառն Աստուծոյ մերոյ, դնեմք վկայութիւն այսօր առաջի քո՝ արք եւ կանայք, որդիք եւ դստերք իւրեանց։ 29Եւ որ միանգամ անցցէ զօրինօք քովք, երդմամբ հաստատեմք այսօր առաջի քո, եղիցի նա ի նզովս եւ յանէծս, որ ոչ պահեսցէ զօրէնս քո որ տուաւ ի ձեռն Մովսիսի ծառայի քո. այլ ամենայն կամօք մերովք պահեսցուք, եւ արասցուք՝՝ զամենայն պատուիրանս Տեառն Աստուծոյ եւ զդատաստանս նորա եւ զհրամանս։ 30Եւ մի՛ տացուք զդստերս մեր ուստերաց ժողովրդոց օտարաց, եւ զդստերս հեթանոսաց ոչ առցուք որդւոց մերոց։ 31Եւ ժողովուրդք երկրիս այսորիկ որ բերիցեն առ մեզ վաճառս յաւուր շաբաթու, ոչ գնեսցուք ի նոցանէն ի շաբաթուն. զի օր սուրբ է, եւ սուրբ պահեսցուք զօրն եւթներորդ։ 32Եւ տացուք զողորմութիւնս երրորդ՝՝ դիդրաքմայի ամ ըստ ամէ ի հարկ տանն Աստուծոյ, 33եւ զհաց զառաջէից եւ զզոհս ըստ ժամանակս ժամանակս, եւ զողջակէզս՝՝ յամենայն տօնս եւ ի տարեկանս եւ ի շաբաթս եւ յամսամուտս եւ ի նաւակատիս եւ ի սրբութիւնս, եւ վասն մեղաց՝ որ են ի քաւութիւնս Իսրայելի եւ ի գործս տաճարին Տեառն Աստուծոյ մերոյ։ 34Եւ վիճակս արկցուք վասն ժառանգութեան փայտիցն, որ երթայ քահանայիցն եւ Ղեւտացւոցն, եւ ժողովուրդն բերցէ ի տուն Աստուծոյ մերոյ, ի տունս՝՝ հարցն մերոց ըստ ժամանակս ժամանակս ամ ըստ ամէ, զորս արժան է այրել ի վերայ սեղանոյ զոհից Տեառն Աստուծոյ մերոյ, որպէս եւ գրեալ է յօրէնսն Մովսիսի։ 35Եւ տացուք զպտուղս զառաջաւորութեանց երկրի մերոյ, եւ զպտուղս ծառոց մերոց ամ ըստ ամէ ի տուն Տեառն Աստուծոյ մերոյ։ 36Եւ զդիդրաքմայս անդրանկաց՝՝ որդւոց մերոց, եւ զանդրանիկս անասնոց մերոց՝ որպէս եւ գրեալ է յօրէնսն Մովսիսի՝ եւ զանդրանիկս առջառոց մերոց եւ հօտից բերցուք ի տուն Աստուծոյ մերոյ, քահանայից մերոց Ղեւտացւոց որք կան ի սպասու տան Տեառն. 37եւ զառաջաւորս ցորենոյ եւ՝՝ զպտուղս ծառոց՝ գինւոյ եւ ձիթոյ բերցուք առ քահանայսն ի տուն գանձանակին Աստուծոյ. եւ զտասանորդս երկրիս մերոյ Ղեւտացիքն շրջեսցին եւ առցեն զամենայն բովանդակ։ 38Եւ եղիցի քահանայ որդի Ահարոնի՝ որ տասանորդեսցէ զՂեւտացիսն, եւ Ղեւտացիքն ի տասանորդաց մերոց տասանորդեսցեն քահանային մեծի՝՝ ի տուն Աստուծոյ մերոյ, ի տուն գանձանակին որ կան ի տաճարին Տեառն. 39վասն զի կացցէ ի գանձել ի համբարս որդւոց Ղեւտացւոցն եւ սպասաւորաց՝ ի տեղիսն ուր կահ սրբութեանցն. եւ եղիցի քահանայիցն եւ Ղեւտացւոց եւ դռնապանաց եւ երգեցկաց սաղմոսաց. եւ մի՛ պակասեսցին նոցա ռոճիկք երբեք ի տանէ Աստուծոյ մերոյ, եւ մի՛ նոքա զսպաս Տեառն խափանեսցեն։՝՝