1Եւ այս են քահանայք եւ Ղեւտացիք որ ելին ընդ Զորաբաբելի Սաղաթիելեանց եւ Յեսուայ Յովսեդեկեանց. Սարայիա, Երեմիա, Եզրա եւ Ամարիա, Մաղուք, Ատտուս, Սեքենիա։ 2Այս՝՝ են իշխանք քահանայիցն եւ եղբարք նոցա յաւուրս Յեսուայ։

8Եւ Ղեւտացիք՝ Յեսու, Բանուի, Կադմիէլ, Սարաբիա, Յուդա, Մատթանիա, եւ եղբարք նոցա որ էին կարգեալ օր ըստ օրէ. եւ Յովակիմայ Եղիասիբ, 9եւ Եղիասիբայ Յովադէ, եւ Յովդայեայ Յովնաթան, եւ Յովնաթանայ Յատդուս։ Եւ յաւուրս Յովակիմայ եղբարք նորա էին իշխանք եւ քահանայք հայրապետացն. Սարիա, Եմարիա, Երեմիա, Անանիա, Ազարիա, Եզրա, Մեսուղամ, Ամարիա, Յովնան, Մաղուք։՝՝

22Եւ Ղեւտացիք յաւուրս Եղիասիբ, Յովդա եւ Յովա եւ Յովնան եւ Իդուա՝ գրեալք իշխանք հայրապետացն. եւ այս ամենայն՝՝ քահանայք էին ի թագաւորութեանն Դարեհի։ 23Որդիք Ղեւեայ իշխանք հայրապետացն գրեալք ի գիրս բանից աւուրց համարոյն, մինչեւ ցՈվնան որդի Եղիասիբ։ 24Եւ իշխանք Ղեւտացւոց՝ Ասաբիա եւ Սարաբիա եւ Յեսու. եւ որդիք Կադմիէլ, եւ եղբարք նորա մօտ առ նմա՝՝, օրհնել եւ սաղմոս ասել. որպէս եւ հրամայեաց Դաւիթ այրն Աստուծոյ, 25օր ըստ օրէ զօրհանապազ ի ժողովս իւրեանց հանդերձ դռնապանօք՝՝։ 26Սոքա էին յաւուրս Յովակիմայ որդւոյ Յեսուայ, որդւոյ Յովսեդեկեայ, եւ յաւուրս Նէեմայ եւ Եզրայ քահանայի եւ գրչի օրինացն Տեառն։՝՝

27Եւ ի նաւակատիս պարսպին Երուսաղեմի, խնդրեցին զՂեւտացիսն ի տեղիս իւրեանց՝ ածել զնոսա յԵրուսաղէմ, եւ առնել զնաւակատիս ուրախութեամբ հանդերձ եւ գոհութեամբ եւ երգովք նուագարանօք, ծնծղայիւք եւ թմբկօք եւ սաղմոսարանօք եւ ի ձայն եղջեր փողոյ՝՝։ 28Եւ ժողովեցան ամենեքեան որք երգէին եւ սաղմոսէին շուրջանակի յամենայն կողմանց Երուսաղեմի, 29ի քաղաքաց եւ ի գիւղից եւ ի բնակութեանց իւրեանց, գալ ի սպաս պաշտամանն յԵրուսաղէմ՝՝։ 30Եւ սրբեցան ամենայն քահանայքն եւ Ղեւտացիքն, եւ սրբեցին զժողովուրդն եւ զդռնապանս մեծի դրանց պարսպին։ 31Եւ հանին՝՝ ի վեր զիշխանս Յուդայ ի պարիսպն. եւ երթային զհետ նոցա երգովք նուագարանօք երկու երկու, 32Յովսիա եւ Ոզիա՝՝ եւ կէս իշխանացն Յուդայ, 33Ազարիաս, Եզրա եւ Մոսողամ, 34Յուդա եւ Բենիամին եւ Սամէաս եւ Երեմիաս։ 35Եւ յորդւոց քահանայիցն էին որք հարկանէին զփողսն՝ Զաքարիաս որդի Յովնաթանայ որդի Սամայի, որդի Մաթանիա, որդի Միքայ, որդի Զաքուր, որդի Ասափ։ 36Եւ եղբարք նոցա Սամէիա եւ Եզրիէլ օրհնէին զերգս եւ զսաղմոսս Դաւթի առնն Աստուծոյ զոր նուագեաց։ Եւ Եզրաս գրիչ երթայր առաջի նոցա ի վերայ դրանցն, եւ որք երգէինն երթային ընդդէմ նորա։ 37Եւ՝՝ ելին յաստիճանս քաղաքին Դաւթի, յելս պարսպին՝ ի վերոյ քան զապարանս Դաւթի, մինչեւ ի դուռն Ջրոյն Եփրեմի, եւ՝՝ ընդ կողմն արեւելից, 39եւ ի դուռն Եքթիերան, եւ յաշտարակն Անամայելի եւ մինչեւ ի դուռն Ջրբղխացն. եւ լսելի եղեւ ձայն երգոցն մինչեւ յամենայն տեղիս. քանզի հրամայեաց Եզր կալ ի վերայ ամենայն դրանցն եւ երգել։՝՝ 43Եւ զոհեցին յաւուր յայնմիկ զոհս մեծամեծս, եւ ուրախ եղեն յոյժ. վասն զի Աստուած արար ուրախ զնոսա յուրախութիւն մեծ. եւ կանայք նոցա եւ որդիք նոցա ուրախ եղեն, եւ լսելի եղեւ ուրախութիւն նոցա յԵրուսաղեմէ՝՝ մինչեւ ի հեռաւոր տեղիս։

44Եւ կացուցին յաւուր յայնմիկ ի վերայ գանձանակի գանձուցն եւ զառաջաւորացն եւ տասանորդացն, եւ որ միանգամ ժողովեալ էր անդր յիշխանաց քաղաքին, որպէս հրամայեալ էր յօրէնսն Մովսիսի քահանայիցն եւ Ղեւտացւոց. քանզի ուրախութիւն մեծ էր ի Յուդա եւ ի քահանայս եւ յՂեւտացիս. եւ զգուշացան սրբութեանցն Աստուծոյ եւ պահեցին զսրբութիւնն՝ որ էին երգեցիկք սաղմոսասացք եւ դռնապանքն, որպէս կարգեալ էր Դաւթի եւ որդւոյ նորա Սողոմոնի։ 45Քանզի յաւուրս Դաւթի՝ Ասափ էր իշխան եւ առաջնորդ երգոց սաղմոսացն, որք նուագէին, երգէին եւ փառաւոր առնէին զԱստուած։՝՝ 47Եւ ամենայն Իսրայէլ յաւուրս Զորաբաբելի եւ յաւուրս Նէեմեայ՝ տային մասն եւ բաժին երգեցկացն եւ դռնապանացն, որպէս եւ կարգեալ էր օր ըստ օրէ, եւ առնէին սուրբ զՂեւտացիսն եւ Ղեւտացիքն զորդիսն Ահարոնի՝՝։