1Եւ խօսեցաւ Տէր ընդ Մովսիսի եւ ընդ Ահարոնի եւ ասէ. 2Այս որոշումն է օրինին զոր պատուիրեաց Տէր Մովսիսի եւ ասէ. Խօսեաց ընդ որդիսն Իսրայելի, եւ առցեն առ քեզ երինջ մի կարմիր անարատ, յորում ոչ գուցէ բիծ ինչ, եւ ոչ իցէ մտեալ ընդ լծով։ 3Եւ տացես զնա ցԵղիազար քահանայ. եւ հանցեն զնա արտաքոյ բանակին ի տեղի սուրբ՝՝, եւ սպանցեն զնա առաջի նորա։ 4Եւ առցէ Եղիազար յարենէ նորա՝՝, եւ ցանեսցէ յանդիման խորանին վկայութեան յարենէ նորա եւթն անգամ։ 5Եւ այրեսցեն զնա առաջի նորա. եւ մորթ նորա եւ միս նորա եւ արիւն նորա հանդերձ ապաւառաւն իւրով այրեսցի։ 6Եւ առցէ քահանայն փայտ եղեւնեայ եւ զոպայ եւ կարմիր, եւ արկցեն ի մէջ այրեցածի երընջուն։ 7Եւ ողողեսցէ զհանդերձս իւր քահանայն, եւ լուասցէ զմարմին իւր ջրով, եւ ապա մտցէ ի բանակն. եւ անսուրբ լիցի քահանայն մինչեւ ցերեկոյ։ 8Եւ որ այրիցէն զնա՝ ողողեսցէ զհանդերձս իւր, եւ լուասցէ զմարմին իւր ջրով, եւ անսուրբ լիցի մինչեւ ցերեկոյ։ 9Եւ ժողովեսցէ այր սուրբ զմոխիր երընջուն, եւ կուտեսցէ արտաքոյ բանակին ի սուրբ տեղւոջ. եւ եղիցի ժողովրդեան որդւոցն Իսրայելի ի պահեստ ջուր սրսկման, զի սրբութիւն է։ 10Եւ լուասցէ զմարմին իւր որ ժողովիցէ զմոխիր երընջուն, եւ ողողեսցէ զհանդերձս իւր, եւ անսուրբ լիցի մինչեւ ցերեկոյ. եւ եղիցի ժողովրդեան որդւոցն Իսրայելի եւ եկացն յեցելոց ի նոսա օրէն յաւիտենական։

11Եւ որ մերձենայցէ ի մեռեալ ամենայն անձին մարդոյ, անսուրբ լիցի զեւթն օր։ 12Եւ սրբեսցի նա յաւուրն երրորդի եւ յաւուրն եւթներորդի, եւ ապա սուրբ լիցի. ապա թէ ոչ սրբեսցի յաւուրն երրորդի եւ յաւուրն եւթներորդի, մի՛ լիցի սուրբ։ 13Ամենայն որ մերձենայցէ ի մեռեալ անձին մարդոյ որ մեռանիցի, եւ ոչ սրբեսցի, զխորանն Տեառն պղծեաց, սատակեսցի անձն այն յԻսրայելէ. զի ջուրն սրսկման ոչ սրսկեցաւ ի վերայ նորա, անսուրբ է, զի պղծութիւն իւր ի նմա է։ 14Եւ այս օրէն իցէ մարդոյ որ մեռանիցի ի տան. ամենայն որ մտանիցէ ի տունն եւ որ ինչ կայցէ ի տանն՝ անսուրբ լիցին զեւթն օր։ 15Եւ ամենայն աման բաց որ ոչ իցէ խփեալ կամ սերեկեալ՝ պիղծ լիցի։ 16Եւ ամենայն որ մերձենայցէ ընդ երեսս դաշտի ի վիրաւոր կամ ի մեռեալ, կամ յոսկր մարդոյ կամ ի գերեզման, պիղծ լիցի զեւթն օր։ 17Եւ առցեն պղծելոյն ի մոխրոյ այրեցելոյն սրբութեան՝՝, եւ արկցեն ի վերայ նորա ջուր յամանի. 18եւ առցէ զոպայ, եւ թացցէ ի ջուրն այր սուրբ, եւ ցանեսցէ զտամբն եւ զկահիւն եւ զամանովքն եւ զանձամբքն որ իցեն անդ, եւ զմերձեցելովն յոսկր մարդոյ կամ ի վիրաւոր կամ ի մեռեալ կամ ի գերեզման։ 19Եւ ցանեսցէ սուրբն զպղծովն յաւուրն երրորդի եւ յաւուրն եւթներորդի, եւ սրբեսցի յաւուրն եւթներորդի. եւ ողողեսցէ զհանդերձս իւր, եւ լուասցէ զմարմին իւր ջրով, եւ անսուրբ լիցի մինչեւ ցերեկոյ՝՝։ 20Եւ մարդ որ պղծիցի եւ ոչ սրբեսցի, սատակեսցի անձն այն ի ժողովրդենէ իւրմէ. զի զսրբութիւնն Տեառն պղծեաց, եւ ջուր սրսկման ոչ սրսկեցաւ զնովաւ, անսուրբ է։ 21Եւ եղիցի ձեզ այն օրէն յաւիտենական, եւ որ սրսկէ զջուրն սրսկման լուասցէ զձորձս իւր. եւ որ մերձենայցէ ի ջուրն սրսկման, անսուրբ լիցի մինչեւ ցերեկոյ։ 22Եւ յամենայն ինչ յոր մերձենայցէ պղծեալն, անսուրբ լիցի մինչեւ ցերեկոյ՝՝, եւ անձն որ մերձենայցէ ի նա, անսուրբ լիցի մինչեւ ցերեկոյ։