1Եւ եղեւ յետ հարուածոցն, խօսեցաւ Տէր ընդ Մովսիսի եւ ընդ Եղիազարու քահանայի եւ ասէ. 2Կալ զհամար ամենայն ժողովրդեան որդւոցդ Իսրայելի ի քսանամենից եւ ի վեր ըստ տանց նահապետաց իւրեանց, ամենայն որ ելանիցէ յԻսրայելէ տալ պատերազմ։ 3Եւ խօսեցան Մովսէս եւ Եղիազար քահանայ յՌաբովթ Մովաբու առ Յորդանանաւ յանդիման Երիքովի, եւ ասեն. 4Ի քսանամենից եւ ի վեր, որպէս հրաման ետ Տէր Մովսիսի, դու եւ որդիքդ Իսրայելի ելեալքդ՝՝ յԵգիպտոսէ, կազմեցարուք։

5Ռուբէն անդրանիկն Իսրայելի, եւ որդիք Ռուբենի. Ենոք, եւ գունդն Ենոքայ. Փաղղուս, եւ գունդն Փաղղուսայ. 6Ասրովմ, եւ գունդն Ասրովմայ. Քարմի, եւ գունդն Քարմեայ։ 7Սոքա են գունդք Ռուբենի. եւ եղեւ հանդէս նոցա քառասուն եւ երեք հազարք եւթն հարեւր եւ երեսուն։ 8Եւ որդիք Փաղղուսայ Եղիաբ։ 9Եւ որդիք Եղիաբու՝ Նամուէլ եւ Դաթան եւ Աբիրոն. սոքա էին անուանիք ժողովրդեանն, եւ սոքա են՝ որ յարեան ի վերայ Մովսիսի եւ Ահարոնի ի ժողովրդեանն Կորխայ յարուցելոյ հակառակ Տեառն. 10եւ բացեալ երկրի զբերան իւր եկուլ զնոսա եւ զԿորխ մահուամբ ժողովրդեանն իւրոյ, յորժամ եկեր հուր զերկերիւր եւ զյիսունսն. եւ եղեն ի նշաւակ։ 11Եւ որդիքն Կորխայ ոչ մեռան։

12Եւ որդիք Շմաւոնի, եւ գունդք որդւոցն Շմաւոնի. Նամուէլ, եւ գունդ մի Նամուէլի. Յամին, եւ գունդ մի Յամինայ. Յաքին, եւ գունդ մի Յաքինայ. 13Զարա, եւ գունդ մի Զարայի. Սաւուղ, եւ գունդ մի Սաւուղայ։ 14Այս են գունդք Շմաւոնի ի հանդիսի իւրեանց, քսան եւ երկու հազար եւ երկերիւր։

15Եւ որդիք Գադայ՝ ըստ գնդից իւրեանց, Սափոն, եւ գունդ մի Սափոնայ. Անգի, եւ գունդ մի Անգեայ. Սունի, եւ գունդ մի Սունեայ. 16Ազենի, եւ գունդ մի Ազենեայ. Ադդի, եւ գունդ մի Ադդեայ. Արուադի, եւ գունդն Արուադեայ. 17Արիէլ, եւ գունդ մի Արիելի։ 18Սոքա են գունդք որդւոցն Գադայ ի հանդիսի իւրեանց. քառասուն եւ չորք՝՝ հազարք եւ հինգ հարեւր։

19Եւ որդիք Յուդայ՝ Էր եւ Աւնան եւ Սեղովմ եւ Փարէս եւ Զարա՝՝. եւ մեռան Էր եւ Աւնան յերկրին Քանանացւոց։ 20Եւ եղեն որդիք Յուդայի ըստ գնդից իւրեանց. Սեղովմ, եւ գունդ մի Սեղովմայ. Փարէս, եւ գունդ մի Փարեսի. Զարա, եւ գունդ մի Զարայի։ 21Եւ եղեն որդիք Փարեսի. Ասրովն, եւ գունդ մի Ասրովնի. Յամուէլ, եւ գունդ մի Յամուելի։ 22Սոքա են գունդք Յուդայ ըստ հանդիսի իւրեանց, եւթանասուն եւ վեց հազար եւ հինգ հարեւր։

23Եւ որդիք Իսաքարու՝ ըստ գնդից իւրեանց. Թովղայ, եւ գունդ մի Թովղայի. Փուա, եւ գունդ մի Փուայի. Յասուբ, եւ գունդ մի Յասուբայ. 24Սամրան, եւ գունդ մի Սամրանայ։ 25Սոքա են գունդք Իսաքարու ի հանդիսի իւրեանց, վաթսուն եւ չորք հազարք եւ երեք հարեւր։

26Եւ որդիք Զաբուղոնի՝ ըստ գնդից իւրեանց. Սարեդ, եւ գունդ մի Սարեդայ. Աղղոն, եւ գունդ մի Աղղոնի. Աղէլ, եւ գունդ մի Աղելայ։ 27Սոքա են գունդք Զաբուղոնի ի հանդիսէ իւրեանց, վաթսուն հազար եւ հինգ հարեւր։

28Եւ որդիք Յովսեփայ ըստ գնդից իւրեանց՝ Մանասէ եւ Եփրեմ։ 29Եւ որդիք Մանասէի. Մաքիր, եւ գունդ մի Մաքիրայ. եւ Մաքիր ծնաւ զԳաղաադ. Գաղաադ, եւ գունդ մի Գաղաադու։ 30Եւ որդիք Գաղաադու՝ Աքիեզեր, եւ գունդ մի Աքիեզերայ. Քեղէգ, եւ գունդ մի Քեղեգեայ. 31Եսրիէլ, եւ գունդ մի Եսրիելի. Սիւքէմ, եւ գունդ մի Սիւքեմայ. 32Սիմայի, եւ գունդ մի Սիմայեայ. Ոփեր, եւ գունդ մի Ոփերայ։ 33Եւ Սաղպաադայ որդւոյ Ոփերայ ոչ եղեն ուստերք, այլ դստերք. եւ անուանք դստերացն Սաղպաադայ՝ Մաաղա եւ Նուա եւ Էգղա եւ Մեղգա եւ Թերսա։ 34Այս գունդք Մանասէի ի հանդիսէ իւրեանց, յիսուն եւ երկու հազարք եւ եւթն հարեւր։

35Եւ այս են որդիք Եփրեմայ. Սուտաղա, եւ գունդ մի Սուտաղայի՝՝. Տանաք, եւ գունդ մի Տանաքայ։ 36Սոքա են որդիք Սուտաղայի. Եդեն, եւ գունդ մի Եդենայ։ 37Այս գունդք Եփրեմայ ի հանդիսէ իւրեանց, երեսուն եւ երկու հազարք եւ հինգ հարեւր։ Սոքա են գունդք Յովսեփայ ըստ գնդից իւրեանց։

38Եւ որդիք Բենիամինի ըստ գնդից իւրեանց. Բաղէ, եւ գունդ մի Բաղեայ. Ասիբեր եւ գունդ մի Ասիբերայ. Յաքիրան, եւ գունդ մի Յաքիրանայ. 39Սափան, եւ գունդ մի Սափանայ։ 40Եւ եղեն որդիք Բաղեայ՝ Արեդ եւ Նոյեման, եւ գունդ մի Նոյեմանայ։ 41Այս որդիք Բենիամինի, ըստ գնդից իւրեանց ի հանդիսէ իւրեանց, երեսուն եւ հինգ հազար եւ հինգ հարեւր։

42Եւ որդիք Դանայ՝ ըստ գնդից իւրեանց. Սամի, եւ գունդ մի Սամեայ. այս են գունդք Դանայ ըստ գնդից իւրեանց։ 43Ամենայն գունդք Սամեայ ըստ հանդիսի իւրեանց՝ վաթսուն եւ չորք հազարք եւ վեց հարեւր։

44Եւ որդիքն Ասերայ՝ ըստ գնդից իւրեանց. Յամին, եւ գունդ մի Յամինայ. Յեսու, եւ գունդն Յեսուայ. Բարիա, եւ գունդ մի Բարիայի։ 45Քոբէր, եւ գունդ մի Քոբերայ. Մեղքիէլ, եւ գունդն Մեղքիելի։ 46Եւ անուն դստերն Ասերայ՝ Սարա։ 47Սոքա են գունդք Ասերայ ի հանդիսէ իւրեանց, քառասուն եւ երեք հազարք եւ վեց հարեւր։

48Եւ որդիք Նեփթաղիմայ՝ ըստ գնդից իւրեանց. Ասէղ, եւ գունդ մի Ասեղայ. Գաւնի, եւ գունդ մի Գաւնեայ. 49Յեսեր, եւ գունդ մի Յեսերայ. Սեղղեմ, եւ գունդ մի Սեղղեմայ։ 50Այս գունդք Նեփթաղիմայ ի հանդիսէ իւրեանց, քառասուն հազար եւ երեք հարեւր։

51Այս է հանդէս որդւոցն Իսրայելի, վեց հարեւր հազար եւ հազար մի եւ եւթն հարեւր եւ երեսուն։

52Եւ խօսեցաւ Տէր ընդ Մովսիսի եւ ասէ. 53Դոցա բաժանեսցի երկիրն ժառանգել ըստ թուոյ անուանց։ 54Ըստ բազմաց՝ բազմացուսցես զժառանգութիւնն, եւ ըստ սակաւուց՝ սակաւացուսցես զժառանգութիւնն իւրեանց. իւրաքանչիւր որպէս եւ անցին ի հանդիսի՝ տացի ժառանգութիւնն իւրեանց։ 55Վիճակօք ժառանգեսցի երկիրն, ըստ անուանց, ըստ ցեղից նահապետաց իւրեանց ժառանգեսցեն։ 56Վիճակաւ բաժանեսցեն զժառանգութիւն նոցա ի մէջ բազմաց եւ սակաւուց։

57Եւ որդիքն Ղեւեայ ըստ գնդից իւրեանց. Գերսոն, եւ գունդ մի Գերսոնի. Կահաթ, եւ գունդ մի Կահաթու. Մերարի, եւ գունդ մի Մերարեայ։ 58Սոքա եւ գունդք որդւոցն Ղեւեայ. գունդ մի Ղոբենի, եւ գունդ մի Քեբրոնի, եւ գունդ մի Կորխ, եւ գունդ մի Մուսի։ Եւ Կահաթ ծնաւ զԱմրամ։ 59Եւ անուն կնոջ նորա Յովքաբեթ՝ դուստր Ղեւեայ, որ ծնաւ զսոսա Ղեւեայ յԵգիպտոս. եւ ծնաւ Ամրամայ զԱհարոն, եւ զՄովսէս, եւ զՄարիամ քոյր նոցա։ 60Եւ ծնան Ահարոնի Նաբադ եւ Աբիուդ, Եղիազար եւ Իթամար։ 61Եւ մեռան Նաբադ եւ Աբիուդ ի մատուցանել իւրեանց զհուրն օտար առաջի Տեառն յանապատին Սինայի՝՝։ 62Եւ եղեն ի հանդիսէն իւրեանց քսան եւ երեք հազարք, ամենայն արու յամսօրէից եւ ի վեր. քանզի ոչ անցին ի հանդիսի ի մէջ որդւոցն Իսրայելի, զի ոչ էր նոցա տուեալ վիճակ ի մէջ որդւոցն Իսրայելի։

63Եւ այս է հանդէս Մովսիսի եւ Եղիազարու քահանայի, որ արարին հանդէս որդւոցն Իսրայելի յՌաբովթ Մովաբու առ Յորդանանու՝ յանդիման Երիքովի։ 64Եւ ընդ նոսա մի այր ոչ գոյր յանցելոցն ի հանդիսի ի Մովսիսէ եւ յԱհարոնէ որ արարին հանդէս որդւոցն Իսրայելի յանապատին Սինայի։ 65Քանզի ասաց զնոցանէ Տէր թէ մահու մեռանիցին յանապատին, եւ ոչ մնաց ի նոցանէ եւ ոչ մի, բայց Քաղէբ որդի Յեփոնեայ, եւ Յեսու որդի Նաւեայ։