1Եւ խօսեցաւ Տէր ընդ Մովսիսի եւ ասէ. 2Ա՛ռ զվրէժ որդւոցդ Իսրայելի ի Մադիանացւոց անտի. եւ ապա յաւելցիս ի ժողովուրդ քո։ 3Եւ խօսեցաւ Մովսէս ընդ ժողովրդեանն եւ ասէ. Վառեցէք ի ձէնջ արս՝ ճակատել առաջի Տեառն՝՝ ի վերայ Մադիամու, հատուցանել զվրէժ ի Տեառնէ Մադիամու։ 4Հազար այր ի ցեղէ յամենայն ցեղիցն Իսրայելի առաքեցէք տալ պատերազմ։ 5Եւ համարեցան ի հազարաւորացն Իսրայելի հազար այր ի ցեղէ, երկոտասան հազար վառեալ ի պատերազմ։ 6Եւ արձակեաց զնոսա Մովսէս, հազար այր ի ցեղէ հանդերձ զօրու իւրեանց, եւ զՓենեէս որդի Եղիազարու որդւոյ Ահարոնի՝՝ քահանայի. եւ զսպասն սրբութեան եւ փողքն ազդեցութեան ի ձեռս նոցա։ 7Եւ ճակատեցան ընդդէմ Մադիանացւոցն, որպէս եւ հրամայեաց Տէր Մովսիսի. եւ կոտորեցին զամենայն արու. 8եւ զթագաւորսն Մադիանացւոց կոտորեցին հանդերձ վիրաւորօք նոցա, եւ զԵւին եւ զՍուր եւ զՐոկոմ եւ զՈւր եւ զՌոբոք, զհինգ թագաւորս Մադիամու. եւ զԲաղաամ որդի Բէովրայ սպանին սրով, հանդերձ վիրաւորօք նոցա՝՝։ 9Եւ զկանայս Մադիամու եւ զաղխն նոցա եւ զանասուն նոցա եւ զամենայն ստացուածս նոցա եւ զզօրս նոցա առին յաւարի։ 10Եւ զամենայն քաղաքս նոցա տամբք իւրեանց եւ զաւանս նոցա հրձիգ արարին։ 11Եւ առին զամենայն զաւար նոցա եւ զամենայն կապուտ նոցա ի մարդոյ մինչեւ յանասուն։ 12Եւ ածին առ Մովսէս եւ առ Եղիազար քահանայ եւ առ ամենայն որդիսն Իսրայելի զգերին եւ զկապուտ եւ զաւար բանակին յՌաբովթ Մովաբ՝՝, որ է յանդիման Երիքովի առ եզերբ Յորդանանու։

13Եւ ելին Մովսէս եւ Եղիազար քահանայ եւ ամենայն իշխանք ժողովրդեանն ընդ առաջ նոցա արտաքոյ բանակին։ 14Եւ բարկացաւ Մովսէս ի վերայ ոստիկանաց զօրուն, հազարապետաց եւ հարիւրապետաց եկելոց ի ճակատէ պատերազմին. 15եւ ասէ ցնոսա Մովսէս. Ընդէ՞ր ապրեցուցէք՝՝ զամենայն էգ, 16զի նոքա էին որդւոցն Իսրայելի ըստ բանիցն Բաղաամու, առ ի վրիպեցուցանելոյ եւ արհամարհելոյ զբան Տեառն վասն Փոգովրայ, եւ եղեւ հարուած ի ժողովրդեանն Տեառն։ 17Եւ արդ կոտորեցէք զամենայն արու յամենայն աղխիդ, եւ զամենայն կին որոյ գիտացեալ է զարութիւն արուի՝ կոտորեցէք։ 18Եւ զամենայն զաղխ կանանց որ ոչ իցէ գիտացեալ զարութիւն արուի՝ ապրեցուցէք։ 19Եւ դուք բանակեցարուք արտաքոյ բանակին զեւթն օր. ամենայնի որոյ սպանեալ իցէ եւ մերձեալ ի վիրաւոր՝ սրբեսցի յաւուրն երրորդի եւ յաւուրն եւթներորդի, դուք եւ գերիդ ձեր։ 20Եւ զամենայն հանդերձ եւ զամենայն անօթ մաշկեղէն եւ զամենայն գործ մազագործ եւ զամենայն կահ փայտակերտ սրբեսջիք։

21Եւ ասէ Եղիազար քահանայ ցարս զօրուն եկելոց ի ճակատէ պատերազմին. Այս իրաւունք օրինի են զոր հրամայեաց Տէր Մովսիսի։ 22Բաց յոսկւոյ եւ յարծաթոյ եւ ի պղնձոյ եւ յերկաթոյ եւ ի կապարոյ եւ յանագէ. 23ամենայն որ անցանէ՝՝ ընդ հուր՝ եւ սրբեսցի, այլ եւ ջրովն սրսկման սրբեսցի. եւ ամենայն որ ոչ անցանիցէ ընդ հուր՝ լուանայցի ջրով։ 24Լուասջիք զհանդերձս յաւուրն եւթներորդի, եւ սուրբք լինիջիք, եւ ապա մտանիցէք ի բանակն։

25Եւ խօսեցաւ Տէր ընդ Մովսիսի եւ ասէ. 26Ա՛ռ զհամար աւարի գերութեանդ ի մարդոյ մինչեւ յանասուն, դու եւ Եղիազար քահանայ, եւ իշխանք նահապետաց ժողովրդեանդ. 27եւ բաժանեցէք զաւարդ ի մէջ պատերազմողացդ ելելոցդ ի պատերազմ, եւ ի մէջ ամենայն ժողովրդեանդ։ 28Եւ առջիք հաս Տեառն յամենայն արանց պատերազմողաց երթելոց ի պատերազմ, ոգի մի ի հինգ հարիւրոց՝ ի մարդոյ եւ յանասնոյ եւ յարջառոյ եւ յոչխարէ եւ յայծեաց։ 29Եւ զկէս՝՝ նոցա առնուցուս, եւ տացես Եղիազարու քահանայի զպտուղսն Տեառն։ 30Եւ ի կիսոյ որդւոցն Իսրայելի առցես մի ի յիսնէ, ի մարդոյ եւ յանասնոյ, յարջառոյ եւ յոչխարէ եւ յիշոյ եւ յամենայն անասնոյ, եւ տացես զայն Ղեւտացւոցն որ պահիցեն զպահպանութիւնս խորանին Տեառն։ 31Եւ արարին Մովսէս եւ Եղիազար քահանայ որպէս հրամայեաց Տէր Մովսիսի։

32Եւ եղեւ աւելորդ աւարին զոր ածին յաւարի արքն պատերազմօղք՝ յոչխարաց վեց հարեւր հազար եւ եւթանասուն եւ հինգ հազար, 33եւ արջառ՝ եւթանասուն եւ երկու հազարք, 34եւ էշք՝ վաթսուն եւ մի հազար, 35եւ ոգիք մարդկան՝ ի կանանց որ ոչ գիտէին զարութիւն առն, ամենայն ոգիք՝ երեսուն եւ երկու հազարք։

36Եւ եղեւ կէս աւարին երթելոցն ի պատերազմ ի թուոյ ոչխարացն՝ երեք հարեւր եւ երեսուն հազար եւ եւթն հազար եւ հինգ հարեւր. 37եւ եղեւ հասն Տեառն յոչխարէ՝ վեց հարեւր եւ եւթանասուն եւ հինգ. 38եւ արջառ՝ երեսուն եւ վեց հազար, եւ հաս Տեառն՝ եւթանասուն եւ երկու. 39եւ էշք՝ երեսուն հազար եւ հինգ հարեւր, եւ հասն Տեառն՝ վաթսուն եւ մի. 40եւ ոգիք մարդկան՝ վեշտասան հազար, եւ հաս ի նոցանէ Տեառն՝ երեսուն եւ երկու ոգիք։ 41Եւ ետ Մովսէս զհասն Տեառն զնուէրն Աստուծոյ՝ Եղիազարու քահանայի, որպէս հրաման ետ Տէր Մովսիսի։

42Զհասարակած որդւոցն Իսրայելի՝ զորս բաժանեաց Մովսէս յարանցն պատերազմողաց։ 43Եւ եղեւ հասարակած ի ժողովրդենէ անտի, յոչխարէ՝ երեք հարեւր եւ երեսուն հազար եւ եւթն հազար եւ հինգ հարեւր, 44եւ արջառ՝ երեսուն եւ վեց հազար, 45եւ էշք՝ երեսուն հազար եւ հինգ հարեւր, 46եւ ոգիք մարդկան՝ վեշտասան հազար։ 47Եւ ա՛ռ Մովսէս ի հասարակածէ որդւոցն Իսրայելի՝ մի ի յիսնէ, ի մարդոյ եւ յանասնոյ, եւ ետ զայն Ղեւտացւոցն որ պահէին զպահպանութիւն խորանին Տեառն, որպէս հրաման ետ Տէր Մովսիսի։

48Եւ մատեան առ Մովսէս ամենայն վերակացուք հազարապետութեան զօրուն, հազարապետք եւ հարիւրապետք. 49եւ ասեն ցՄովսէս. Ծառայք քո կալան զհամար արանց պատերազմողաց առ ի մէնջ, եւ ոչ ծախեցաւ ի նոցանէ եւ ոչ մի։ 50Եւ բերաք մատուցանել ընծայ Տեառն, այր որոյ գտանիցի ոսկի մեհեւանդ կամ ապարանջանք, եւ մատանի եւ կշտապանակ եւ փողոշուկ ընդելուզեալ, քաւել վասն մեր առաջի Տեառն։ 51Եւ առին Մովսէս եւ Եղիազար քահանայ զոսկին ի նոցանէ, զամենայն անօթ գործեալ։ 52Եւ եղեւ ամենայն ոսկի հասին զոր հանին Տեառն՝ վեշտասան հազար եւ եւթն հարեւր եւ յիսուն սիկղ՝ ի հազարապետաց անտի։ 53Եւ արք պատերազմօղք որ ածին աւար, իւրաքանչիւր ումեք՝՝։ 54Եւ առին Մովսէս եւ Եղիազար քահանայ զոսկին ի հազարապետաց անտի եւ ի հարիւրապետաց, եւ տարան ի խորանն վկայութեան, յիշատակ առ ի յորդւոցն Իսրայելի առաջի Տեառն։