1Եւ անասուն բազում էր որդւոցն Իսրայելի, որդւոցն՝՝ Ռուբենի եւ որդւոցն Գադայ զեղեալ յոյժ. եւ տեսին զերկիրն Յազերայ եւ զերկիրն Գաղաադու, եւ էր տեղին տեղի խաշանց։ 2Եւ մատուցեալ որդիքն Ռուբենի եւ որդիքն Գադայ ասեն ցՄովսէս եւ ցԵղիազար քահանայ եւ ցիշխանս ժողովրդեանն։ 3Ատարովթ եւ Դեբոն եւ Յազեր եւ Նեմբրա եւ Եսեբոն եւ Եղէաղէ եւ Սեբամա եւ Նաբաւ եւ Բէան, 4երկիրն զոր մատնեաց Տէր առաջի որդւոցն Իսրայելի, երկիր անասնասնոյց է. եւ ծառայից քոց խաշինք են։ 5Եւ ասեն. Եթէ գտաք շնորհս առաջի քո, տացի երկիրն այն ծառայից քոց ի կալուած, եւ մի՛ անցուցաներ զմեզ ընդ Յորդանան։

6Եւ ասէ Մովսէս ցորդիսն Գադայ եւ ցորդիսն Ռուբենի. Եղբարք ձեր երթայցեն ի պատերազմ, եւ դուք նստիցի՞ք աստ։ 7Եւ ընդէ՞ր խոտորեցուցանէք զսիրտ որդւոցն Իսրայելի չանցանել յերկիրն զոր Տէր տալոց է նոցա։ 8Ո՞չ այդպէս արարին հարքն ձեր, յորժամ առաքեցի զնոսա ի Կադեսբառնեայ դիտել զերկիրն։ 9Եւ ելին ի Ձորն ողկուզի եւ դիտեցին զերկիրն, եւ զանգիտեցուցին զսիրտս որդւոցն Իսրայելի, զի մի՛ մտանիցեն յերկիրն զոր ետ նոցա Տէր։ 10Եւ բարկացաւ սրտմտութեամբ Տէր յաւուր յայնմիկ, եւ երդուաւ եւ ասէ. 11Մի՛ տեսցեն արք որ ելին յԵգիպտոսէ, ի քսանամենից եւ ի վեր, որ գիտիցեն զչար եւ զբարի,՝՝ զերկիրն զոր երդուայ տալ Աբրահամու եւ Իսահակայ եւ Յակոբայ, զի ոչ եկին զհետ իմ. 12բայց Քաղէբ որդի Յեփոնեայ զատուցեալն, եւ Յեսու որդի Նաւեայ, զի եկին զկնի Տեառն։ 13Եւ բարկացաւ սրտմտութեամբ Տէր ի վերայ Իսրայելի, եւ յածեցոյց զնոսա յանապատին ամս քառասուն, մինչեւ սատակեցաւ ամենայն ազգն որ արարին զչարիս առաջի Տեառն։ 14Եւ արդ դուք յարուցեալ էք փոխանակ հարցն ձերոց, ժողովք մարդկան մեղաւորաց, յաւելուլ միւսանգամ ի սրտմտութիւն բարկութեան Տեառն ի վերայ Իսրայելի։ 15Զի դարձեալ էք ի նմանէ, յաւելուլ միւսանգամ լքանել նմա զձեզ յանապատի աստ. եւ անօրինիք յամենայն ժողովուրդս յայս։

16Եւ մատեան առաջի նորա եւ ասեն. Դադարս ոչխարաց մերոց շինեսցուք եւ անասնոց մերոց, եւ քաղաքս աղխից մերոց. 17եւ մեք վառեսցուք առաջի Տեառն՝՝ առաջապահք երթիցուք որդւոցն Իսրայելի, մինչեւ հանցուք զնոսա յիւրաքանչիւր տեղի. եւ բնակեսցէ աղխն մեր ի քաղաքս պարսպաւորս վասն բնակչաց երկրիս. 18եւ ոչ դարձցուք ի տունս մեր, մինչեւ բաժանեսցին որդիքն Իսրայելի զիւրաքանչիւր ժառանգութիւն։ 19Եւ ոչ եւս ժառանգեսցուք ի մէջ նոցա յանցիցն Յորդանանու եւ անդր. զի ունիմք զվիճակս մեր յայսկոյս Յորդանանու յարեւելից։

20Եւ ասէ ցնոսա Մովսէս. Եթէ առնիցէք ըստ բանիդ ըստ այդմիկ, եթէ վառիցիք առաջի Տեառն ի պատերազմ, 21եւ անցցէ ձեր ամենայն վառեալ ընդ Յորդանան առաջի Տեառն, մինչեւ սատակիցի թշնամին նորա առաջի նորա, 22եւ նուաճեսցի երկիրն առաջի Տեառն, եւ ապա դառնայցէք, քաւեալ լիջիք առաջի Տեառն եւ յԻսրայելէ. եւ եղիցի երկիրս այս ձեզ ի կալուած առաջի Տեառն։ 23Ապա թէ ոչ առնիցէք այդպէս, յանցաւոր գտանիցիք առաջի Տեառն. եւ ծանիջիք զմեղս ձեր, յորժամ հասանիցեն ձեզ չարիք՝՝։ 24Եւ շինեսջիք դուք ձեզ քաղաքս աղխին ձերոյ, եւ դադարս խաշանց ձերոց, եւ որ ինչ ել ի բերանոյ ձերմէ՝ առնիցէք։

25Եւ խօսեցան որդիքն Ռուբենի եւ որդիքն Գադայ ընդ Մովսիսի եւ ասեն. Արասցեն ծառայք քո որպէս հրամայեաց մեզ տէրդ մեր։ 26Աղխ մեր եւ կանայք մեր եւ ամենայն անասուն մեր կացցեն ի քաղաքս Գաղաադու։ 27Եւ ծառայք քո անցցեն վառեալք եւ կազմեալք առաջի Տեառն ի պատերազմ, որպէս եւ տէրդ ասէ։

28Եւ յանդիման արար նոցա Մովսէս զԵղիազար քահանայ, եւ զՅեսու որդի Նաւեայ եւ զիշխանս նահապետաց ցեղիցն Իսրայելի, 29եւ ասէ ցնոսա Մովսէս. Եթէ անցցեն որդիքդ Ռուբենի եւ որդիքդ Գադայ ընդ ձեզ ըստ Յորդանան, ամենեքին վառեալ ի պատերազմ առաջի Տեառն, եւ տիրիցէք երկրին տաջիք դոցա զերկիրն Գաղաադու ի կալուածս. 30ապա թէ ոչ անցցեն ընդ ձեզ վառեալք ի պատերազմ առաջի Տեառն, անցուսջիք զաղխ դոցա եւ զկանայս դոցա եւ զանասուն դոցա յառաջագոյն քան զձեզ յերկիրն Քանանացւոց, եւ՝՝ ժառանգեսցեն ընդ ձեզ յերկրին Քանանացւոց։ 31Պատասխանի ետուն որդիքն Ռուբենի եւ որդիքն Գադայ եւ ասեն. Զոր ինչ ասէ տէրդ ցծառայս իւր՝՝ արասցուք։ 32Մեք անցցուք վառեալք առաջի Տեառն յերկիրն Քանանացւոց, եւ տաջիք մեզ կալուածս յայսկոյս Յորդանանու։ 33Եւ ետ Մովսէս որդւոցն Գադայ եւ որդւոցն Ռուբենի եւ կիսոյ ցեղին Մանասէի որդւոցն Յովսեփայ զթագաւորութիւնն Սեհոնի արքային Ամովրհացւոց, եւ զթագաւորութիւնն Ովգայ արքային Բասանու, զերկիրն եւ զքաղաքս սահմանօք իւրովք, եւ զքաղաքս երկրին շուրջանակի։

34Եւ շինեցին որդիքն Գադայ զԴեբոն եւ զԱտարովթ եւ զԱրոյեր, 35եւ զՍոփար եւ զՅազեր, եւ բարձրացուցին զնոսա՝՝, 36եւ զՆամրան եւ զԲաւթառան, քաղաքս ամուրս եւ դադարս հօտից։

37Եւ որդիքն Ռուբենի շինեցին զԵսեբոն եւ զԵղիաղէ եւ զԿարիաթեմ. 38եւ զԲէեղմէովն, շուրջ ամրացուցեալս,՝՝ եւ զՍեբամայ. եւ անուանեցին ըստ անուանց իւրեանց զանուանս քաղաքացն զոր շինեցին։

39Եւ գնաց որդի՝՝ Մաքիրայ որդւոյ Մանասէի ի Գաղաադ եւ առ զնա, եւ կորոյս՝՝ զԱմովրհացին որ բնակեալ էր ի նմա։ 40Եւ ետ Մովսէս զԳաղաադ Մաքիրայ որդւոյ Մանասէի, եւ բնակեցաւ անդ։ 41Եւ Յայիր Մանասեան չոքաւ առ զքաղաքս նոցա, եւ անուանեաց զնոսա Աւանս Յայիրայ։ 42Եւ Նաբաւ գնաց եւ առ զԿանաթ եւ զաւանս նորա, եւ անուանեաց զնոսա Նաբաւթ ըստ անուան իւրոյ։