1Եւ խօսեցաւ Տէր ընդ Մովսիսի եւ ընդ Ահարոնի եւ ասէ. 2Կալ զթիւ գլխոց որդւոցն Կահաթու ի միջոյ որդւոցն Ղեւեայ՝ ըստ գունդս իւրեանց, ըստ տանց նահապետաց իւրեանց, 3ի քսան եւ ի հինգամենից՝՝ եւ ի վեր մինչեւ ցյիսնամեանս. ամենայն որ մտանիցէ ի սպաս գործել զամենայն գործ ի խորանին վկայութեան։ 4Եւ այս իցէ գործ որդւոցն Կահաթու ի միջոյ որդւոցն Ղեւեայ՝ ըստ գունդս իւրեանց, ըստ տանց նահապետացն՝՝ ի խորանին վկայութեան՝ սրբութիւնք սրբութեանցն։ 5Եւ մտցէ Ահարոն եւ որդիք իւր յորժամ խաղայցէ բանակն, եւ իջուսցեն զվարագոյրն հովանոց, եւ ծածկեսցեն նովաւ զտապանակն վկայութեանն։ 6Եւ դիցեն ի վերայ նորա զնուարտանն մաշկեղէն զկապուտակ, եւ արկցեն զնովաւ ձորձ համակ կապուտակ ի վերուստ կողմանէ, եւ ագուսցեն զլծակսն։ 7Եւ ի վերայ զառաջաւորի սեղանոյն արկցեն հանդերձ համակ ծիրանի, եւ զափսէսն եւ զտուփս եւ զճաշակս եւ զնուիրանոցսն որովք նուիրեսցեն, եւ հացքն հանապազորդք ի վերայ նորա կացցեն. 8եւ արկցեն զնովաւ հանդերձ կարմիր, եւ ծածկեսցեն զնա մաշկեղէն նուարտանաւ կապուտակաւ. եւ ագուսցեն ի նմա զլծակսն։ 9Եւ առցեն հանդերձ կապուտակ եւ ծածկեսցեն զաշտանակն լուսոյ եւ զերկոսին ճրագարանսն՝՝ նորա եւ զունելիս նորա եւ զբազմակալս նորա, եւ զամենայն ամանս իւղոյ որովք պաշտիցեն. 10եւ արկցեն զնա եւ զամենայն զկահ նորա ի նուարտան մաշկեղէն կապուտակ, եւ դիցեն զնա ի վերայ լծակացն։ 11Եւ զսեղանն ոսկի ծածկեսցեն հանդերձիւ կապուտակաւ, եւ արկցեն ի վերայ նորա նուարտան մաշկեղէն կապուտակ. եւ ագուսցեն ի նմա զլծակս նորա։ 12Եւ առցեն զամենայն զկահ պաշտամանն՝ որովք պաշտիցեն ի սրբութիւնսն, եւ արկցեն ի հանդերձս կապուտակս, եւ ծածկեսցեն զայն մաշկեղէն նուարտանաւ կապուտակաւ, եւ դիցեն ի վերայ լծակացն։ 13Եւ զնուարտանն դիցեն ի վերայ սեղանոյն՝՝, եւ ծածկեսցեն զնա հանդերձիւ համակ ծիրանւով, 14եւ դիցեն ի վերայ նորա զսպասն որովք պաշտիցեն ի վերայ նորա, եւ զբուրուառս եւ զմսահանս եւ զտաշտսն, եւ զծածկիչսն եւ՝՝ զամենայն սպաս սեղանոյն, եւ արկցեն ի վերայ նորա նուարտան մաշկեղէն կապուտակ. եւ անցուսցեն ընդ նա զլծակսն։ Եւ առցեն հանդերձ ծիրանի եւ ծածկեսցեն զաւազանն եւ զխարիսխս նորա, եւ արկցեն զնովաւ մաշկ կապուտակ, եւ դիցեն ի վերայ լծակացն։՝՝ 15Եւ կատարեսցեն Ահարոն եւ որդիք նորա ծածկել զսրբութիւնսն, եւ զամենայն կահ սրբութեանն ի չուել բանակին. եւ ապա մտցեն որդիքն Կահաթու բառնալ. եւ մի՛ մերձեսցին ի սրբութիւնսն՝ զի մի՛ մեռանիցին. զայն բառնայցեն որդիքն Կահաթու ի խորանէ անտի վկայութեան։

16Եւ ոստիկան Եղիազար որդի Ահարոնի քահանայի՝ զեւղն լուսոյ եւ զխունկսն հանդերձանաց եւ զզոհն հանապազորդ եւ զեւղն օծութեան, եւ զհանդերձ՝՝ ամենայն խորանին եւ որ ինչ ի նմա, եւ որ ի սրբութեանն եւ յամենայն սրբութիւնսն՝՝։

17Եւ խօսեցաւ Տէր ընդ Մովսիսի եւ ընդ Ահարոնի եւ ասէ. 18Մի՛ սատակիցէք զգունդն Կահաթու ի միջոյ Ղեւտացւոցն. 19զայս ինչ արասջիք նոցա եւ կեցցեն եւ մի՛ մեռանիցին ի մերձանալ նոցա ի սրբութիւն սրբութեանցն. Ահարոն եւ որդիք նորա մտցեն ի ներքս, եւ կարգեսցեն զնոսա իւրաքանչիւր ըստ կարգի եւ ըստ բեռին իւրում։ 20Եւ մի՛ մտանիցեն վայրապար տեսանել զսրբութիւն սրբութեանցն՝՝ զի մի՛ մեռանիցին։

21Եւ խօսեցաւ Տէր ընդ Մովսիսի եւ ասէ. 22Կալ դու զհամար որդւոցն Գերսոնի, ըստ տանց նահապետաց իւրեանց, ըստ գնդից իւրեանց. 23ի քսան եւ ի հինգամենից՝՝ եւ ի վեր մինչեւ ցյիսնամեանս, եւ արասցես նոցա հանդէս, ամենայն որ մտանիցէ ի սպաս գործել զգործ խորանին վկայութեան։ 24Այս իցէ սպասաւորութիւն գնդին Գերսոնի՝ ի մտանել ի հարկ եւ ի բառնալ. 25եւ բարձցէ զվերնափեղկս՝՝ խորանին եւ զխորանն վկայութեան եւ զարտախուրակս նորա, եւ զնուարտանն կապուտակեայս որ ի նմա ի վերուստ կողմանէ, եւ զվարագոյր խորանին վկայութեան, 26եւ զառագաստ սրահին, եւ որ ինչ ի վերայ խորանին վկայութեան՝՝, եւ զապարումսն եւ զամենայն զկահ սպասուն որովք պաշտիցենն։ 27Եւ արասցեն ըստ բերանոյ Ահարոնի եւ որդւոց նորա. եղիցի սպասաւորութիւն որդւոցն Գերսոնի ըստ ամենայն սպասաւորութեան իւրեանց եւ ըստ ամենայն գործոց իւրեանց. եւ արասջիք նոցա հանդէս յանուանէ, եւ՝՝ ամենայնի որ ինչ բառնայցի ի նոցանէ։ 28Այս իցէ սպասաւորութիւն որդւոցն Գերսոնի ի խորանին վկայութեան, եւ պահպանութիւն նոցա ի ձեռն Իթամարայ որդւոյ Ահարոնի քահանայի։

29Եւ որդւոցն Մերարեայ ըստ գնդից իւրեանց, ըստ տանց նահապետաց իւրեանց արասջիք հանդէս. 30ի քսան եւ ի հինգամենից՝՝ եւ ի վեր մինչեւ ցյիսնամեանս՝ արասջիք նոցա հանդէս, ամենայն որ մտանիցէ ի սպաս գործոյ խորանին վկայութեան։ 31Եւ այս իցէ պահպանութիւն բեռանցն որ բառնայցին ի նոցանէ, ըստ ամենայն գործոյ նոցա ի խորանին վկայութեան. զխոյակս խորանին եւ զնիգս եւ զսիւնակս նորա եւ զխարիսխս նորա, եւ զվարագոյրն եւ զխարիսխս նոցա եւ զսիւնս նոցա. եւ զվարագոյր դրան խորանին, 32եւ զսիւնս սրահին՝՝ շուրջանակի եւ զխարիսխս նոցա, եւ զսիւնս վարագուրին դրան սրահին, եւ զխարիսխս նոցա եւ՝՝ զցիցս նոցա եւ զապաւանդակս նոցա, եւ զամենայն զկահ նոցա եւ զամենայն սպաս նոցա. եւ յանուանէ հանդէս առնիցէք նոցա, եւ՝՝ ամենայն կահի պահպանութեանն որ բառնայցի ի նոցանէ. 33այս իցէ սպասաւորութիւն գնդի որդւոցն Մերարեայ, յամենայն ի գործս իւրեանց ի խորանին վկայութեան՝ ի ձեռն Իթամարայ որդւոյ Ահարոնի քահանայի։

34Եւ արարին հանդէս Մովսէս եւ Ահարոն եւ իշխանքն Իսրայելի որդւոցն Կահաթու ըստ գնդից իւրեանց եւ ըստ տանց նահապետաց իւրեանց՝ 35ի քսան եւ ի հինգամենից՝՝ եւ ի վեր մինչեւ ցյիսնամեանս, ամենայն որ մտանէր ի սպաս եւ գործէր գործ ի խորանին վկայութեան. 36եւ եղեւ նոցա հանդէս ըստ գնդից իւրեանց՝ երկու հազար եւ եւթն հարեւր եւ յիսուն։ 37Այս է հանդէս գնդին Կահաթու ամենայն որ մտանէր ի սպաս ի խորանն վկայութեան, որպէս եւ արարին հանդէս Մովսէս եւ Ահարոն բանիւ Տեառն ի ձեռն Մովսիսի։

38Եւ անցին ի հանդիսի որդիքն Գերսոնի ըստ գնդից իւրեանց, ըստ տանց նահապետաց իւրեանց՝ 39ի քսան եւ ի հինգամենից՝՝ եւ ի վեր մինչեւ ցյիսնամեանս, ամենայն որ մտանէր պաշտել եւ գործել գործ ի խորանին վկայութեան. 40եւ եղեւ հանդէս նոցա ըստ գնդից իւրեանց, ըստ տանց նահապետաց իւրեանց՝ երկու հազար եւ վեց հարեւր եւ երեսուն։ 41Այս է հանդէս գնդի որդւոցն Գերսոնի, ամենայն որ պաշտէր ի խորանին վկայութեան, որոց արարին հանդէս Մովսէս եւ Ահարոն ըստ բանի Տեառն ի ձեռն Մովսիսի՝՝։

42Անցին ի հանդիսի եւ գունդք որդւոցն Մերարեայ ըստ գնդից իւրեանց, ըստ տանց նահապետաց իւրեանց՝ 43ի քսան եւ ի հինգամենից՝՝ եւ ի վեր մինչեւ ցյիսնամեանս, ամենայն որ մտանէր պաշտել ի գործ խորանին վկայութեան. 44եւ եղեւ հանդէս նոցա ըստ գնդից իւրեանց, ըստ տանց նահապետաց իւրեանց՝ երեք հազար եւ երկերիւր։ 45Այս է հանդէս գնդի որդւոցն Մերարեայ, որոց արարին հանդէս Մովսէս եւ Ահարոն ըստ բանի Տեառն ի ձեռն Մովսիսի։

46Ամենեքին անցեալք ի հանդիսի, որոց արարին հանդէս Մովսէս եւ Ահարոն եւ իշխանքն Իսրայելի Ղեւտացւոցն՝ ըստ գնդից իւրեանց, ըստ տանց նահապետաց իւրեանց՝ 47ի քսան եւ ի հինգամենից՝՝ եւ ի վեր մինչեւ ցյիսնամեանս, ամենայն որ մտանէր ի գործ սրբութեանցն եւ ի գործ կրելեաց խորանին վկայութեան, 48եղեն անցեալք ի հանդիսի ութ հազար եւ հինգ հարեւր եւ ութսուն ըստ բանի Տեառն։ 49Արար նոցա հանդէս Տէր՝՝ ի ձեռն Մովսիսի, այր ըստ առնէ ի վերայ գործոյ իւրեանց, ի վերայ բեռանցն զոր ինքեանք բառնային. եւ անցին ի հանդիսի՝ որպէս հրամայեաց Տէր Մովսիսի։