1Եւ խօսեցաւ Տէր ընդ Մովսիսի եւ ասէ. 2Խօսեաց ընդ որդիսդ Իսրայելի եւ ասասցես. Այր կամ կին, որ մեծ ինչ ուխտս ուխտեսցէ սրբել զսրբութիւն Տեառն։ 3Ի գինւոյ եւ ի ցքւոյ սրբեսցի. եւ զքացախ գինւոյ եւ զքացախ ցքւոյ մի՛ արբցէ, եւ զխաղող նորա եւ զչամիչ մի՛ կերիցէ։ 4Զամենայն աւուրս ուխտին իւրոյ՝ յամենայնէ զինչ եւ լինիցի յորթոյ, զգինի՝՝ ի չամչոյ մինչեւ ցթինն մի՛ կերիցէ։ 5Զամենայն աւուրս սրբութեանն, սրբիչ մի՛ ածիցէ զգլխով իւրով, մինչեւ լցցին աւուրքն զորս ուխտեաց Տեառն՝ սուրբ կացցէ, աճեցուցեալ զվարսս մազոյ գլխոյ իւրոյ։ 6Զամենայն աւուրս ուխտին իւրոյ Տեառն, յոգի վախճանեալ մի՛ մտցէ. 7ի հօր եւ ի մօր, յեղբօր եւ ի քեռ, մի՛ պղծեսցի նոքօք ի մահու նոցա, զի ուխտ Տեառն ի վերայ գլխոյ նորա է։ 8Զամենայն աւուրս ուխտին իւրոյ սուրբ կացցէ Տեառն։ 9Եւ եթէ յանկարծ մեռանիցի ոք ի վերայ նորա, առժամայն պղծեսցի գլուխ ուխտի նորա. եւ գերծցէ զգլուխ իւր յաւուր յորում սրբիցի, եւ յաւուրն եւթներորդի գերծցի. 10եւ յաւուրն ութերորդի ածցէ երկուս տատրակս կամ երկուս ձագս աղաւնեաց առ քահանայն ի դուռն խորանին վկայութեան։ 11Եւ արասցէ քահանայն զմին վասն մեղաց, եւ զմին յողջակէզ. եւ քաւեսցէ վասն նորա քահանայն ընդ մեղացն զոր մեղաւ յոգի, եւ սրբեսցէ զգլուխ իւր յաւուր յայնմիկ. 12զի յայնմ աւուր սրբեաց՝՝ Տեառն զաւուրս ուխտին իւրոյ, եւ ածցէ գառն մի տարեւոր վասն յանցանացն. եւ աւուրքն առաջինք անհամարք լինիցին, զի պղծեցաւ գլուխ ուխտի՝՝ նորա։

13Եւ այս օրէն իցէ ուխտաւորին յաւուր յորում կատարիցէ զաւուրս ուխտին իւրոյ, ածցի ի դուռն խորանին վկայութեան. 14եւ մատուսցէ զպատարագն իւր Տեառն, գառն մի տարեւոր անարատ յողջակէզ, եւ որոջ մի տարեւոր անարատ վասն մեղաց, եւ խոյ մի անարատ ի փրկութիւն, 15եւ խան մի բաղարջաց նաշհոյ, եւ պանս զանգեալ իւղով, եւ քաքարս բաղարջս օծեալս իւղով, եւ զզոհս նոցա եւ զնուէրս իւրեանց։ 16Եւ մատուսցէ քահանայն առաջի Տեառն, եւ արասցէ զվասն մեղացն նորա եւ զողջակէզն նորա։ 17Եւ զխոյն արասցէ զոհ փրկութեան Տեառն ի վերայ խանին բաղարջոյ, եւ արասցէ քահանայն զզոհն նորա եւ զնուէրս նորա։ 18Եւ գերծցէ ուխտաւորն առ դրան խորանին վկայութեան զգլուխ ուխտին իւրոյ, եւ դիցէ զմազն ի հուրն որ ի վերայ զոհին փրկութեան։ 19Եւ առցէ քահանայն զերին եփեալ ի խոյէ անտի, եւ պան մի բաղարջ ի խանէն եւ քաքար մի բաղարջ, եւ դիցէ քահանայն ի վերայ ձեռաց ուխտաւորին, յետ գերծելոյ նորա զգլուխն իւր. 20եւ մատուսցէ զայն քահանայն ընծայ՝՝ առաջի Տեառն, եւ եղիցի սուրբ, քահանային եղիցի ի վերայ երբծոյն նուիրի եւ ի վերայ երւոյն հասի. եւ ապա արբցէ ուխտաւորն գինի։ 21Այս օրէն իցէ ուխտաւորի որ ուխտիցէ ոք Տեառն զպատարագ իւր վասն ուխտից, թող զայն որ ինչ գտանիցէ ձեռն իւր. ըստ կարի ուխտին իւրոյ զոր ուխտիցէ ըստ օրինի սրբութեան Տեառն՝՝։

22Եւ խօսեցաւ Տէր ընդ Մովսիսի եւ ասէ. 23Խօսեաց ընդ Ահարոնի եւ ընդ որդիս նորա եւ ասասցես. Այսպէս օրհնեսջիք զորդիսդ Իսրայելի, եւ ասասջիք նոցա. 24Օրհնեսցէ զքեզ Տէր եւ պահեսցէ զքեզ. 25երեւեցուսցէ Տէր զերեսս իւր ի քեզ, եւ ողորմեսցի քեզ. 26ամբարձցէ Տէր զերեսս իւր ի քեզ, եւ տացէ քեզ խաղաղութիւն։ 27Եւ դիցեն զանուն իմ ի վերայ որդւոցն Իսրայելի, եւ ես օրհնեցից զնոսա։