1Պաւղոս, կապեալ Յիսուսի Քրիստոսի, եւ Տիմոթէոս եղբայր, Փիլիմովնի սիրելւոյ եւ գործակցի մերոյ, 2եւ Ապփեայ քեռ, եւ Արքիպպեայ զինուորակցի մերոյ, եւ առտնին եկեղեցւոյդ. 3շնորհք ընդ ձեզ եւ խաղաղութիւն յԱստուծոյ Հօրէ մերմէ եւ ի Տեառնէ Յիսուսէ Քրիստոսէ։

4Գոհանամ զԱստուծոյ իմոյ յամենայն ժամ յիշատակեալ յաղօթս իմ վասն քո, 5իբրեւ լսեմ զքո հաւատսն եւ զսէր զոր ունիս առ Տէր Յիսուս եւ առ ամենայն սուրբս, 6զի հաղորդութիւն հաւատոցն քոց արգոյ լինիցի գիտութեամբ ամենայն բարութեան որ ի ձեզ է ի Քրիստոս Յիսուս։ 7Խնդութիւն յոյժ ընկալայ եւ մխիթարութիւն ի վերայ սիրոյն քո, զի գութք սրբոց քեւ հանգուցեալ են, եղբայր։

8Վասն որոյ բազում համարձակութիւն ունիմ ի Քրիստոս՝ հրաման տալ քեզ զարժանն, 9վասն սիրոյ մանաւանդ թէ աղաչեմ իսկ, այնպիսի լինել որպէս եւ Պաւղոս ծերացեալ, արդ եւ կապեալ եւս Յիսուսի Քրիստոսի։ 10Աղաչեմ զքեզ վասն որդւոյ իմոյ զոր ծնայ ի կապանս իմ, զՈնեսիմոս. 11որ երբեմն անպիտան էր քեզ, բայց արդ քեզ եւ ինձ պիտանի. 12զոր յղեցի առ քեզ. եւ դու զդա ընկալջիր, այսինքն է զիմ աղիս. 13զոր կամէի առ իս արգելուլ, զի ընդ քո ունիցի ինձ սպաս ի կապանս աւետարանին։ 14Բայց առանց քո կամաց ոչինչ կամեցայ առնել, զի մի՛ բարիքդ քո ի հարկէ լինիցին, այլ կամաւ։ 15Եւ թերեւս վասն այնորիկ մեկնեցաւ առ ժամանակ մի, զի յաւիտեան ունիցիս զդա, 16մի՛ եւս իբրեւ զծառայ, այլ ի վեր քան զծառայ, իբրեւ զեղբայր սիրելի. եթէ ինձ այսպէս, ո՞րչափ եւս առաւել քեզ մարմնով եւ Տերամբ։ 17Եթէ զիս քեզ հաղորդ համարիցիս, ընկալ զդա իբրեւ զիս։ 18Եւ եթէ յանցուցեալ ինչ իցէ կամ պարտիցի, զայն ինձ համարեաց։ 19Ես Պաւղոս գրեցի իմով ձեռամբ, ես հատուցից. զի մի՛ ասիցեմ քեզ թէ դու զանձն քո ինձ պարտիս։ 20Այո, եղբայր, ես քո փոխանակ եղէց՝՝ ի Տէր. հանգո զաղիսդ իմ ի Քրիստոս։ 21Յուսացեալ ի հնազանդութիւնդ քո գրեցի առ քեզ, քանզի գիտեմ թէ առաւել եւս քան զոր ասեմդ՝ առնիցես։

22Միանգամայն եւ պատրաստեսջիր ինձ վանս, քանզի յուսամ թէ աղօթիւք ձերովք շնորհեցայց ձեզ։ 23Ողջոյն տայ ձեզ Եպափրաս գերեկից իմ ի Քրիստոս Յիսուս, 24եւ Մարկոս եւ Արիստարքոս եւ Դեմաս եւ Ղուկաս՝ գործակիցք իմ։ 25Շնորհք Տեառն մերոյ Յիսուսի Քրիստոսի ընդ ոգւոյդ ձերում։Առ Փիլիմովն եւ Ապփիա, տեարս Ոնեսիմայ, եւ առ Արքիպպոս, սարկաւագ Կողոսացւոց եկեղեցւոյն, գրեցաւ ի Հռովմէ ի ձեռն Ոնեսիմայ ծառայի։