ՍԱՂՄՈՍ ՃԴ (ՃԵ)

1Խոստովան եղերուք Տեառն եւ կարդացէք զանուն նորա, պատմեցէք ի հեթանոսս զգործս նորա։ 2Օրհնեցէք եւ սաղմոս ասացէք նմա, պատմեցէք զամենայն սքանչելիս նորա. 3եւ գովեցարուք յանուն սուրբ նորա. ուրախ եղիցին սիրտք այնոցիկ ոյք խնդրեն զՏէր։ 4Խնդրեցէք զՏէր եւ հզօրք եղերուք՝՝, եւ խնդրեցէք զերեսս նորա յամենայն ժամ։ 5Յիշեցէք զսքանչելիս նորա զոր արար, զարուեստս եւ զիրաւունս բերանոյ նորա։ 6Զաւակն Աբրահամեան՝ ծառայք նորա, որդիք Յակոբայ՝ ընտրեալք նորա։ 7Նա ինքն է Տէր Աստուած մեր, յամենայն երկրի են իրաւունք նորա։

8Յիշեաց յաւիտենից զուխտ իւր, եւ զբանն զոր պատուիրեաց մինչեւ ի հազար ամ։ 9Զուխտն զոր եդ ընդ Աբրահամու, եւ զերդումն իւր ընդ Իսահակայ։ 10Հաստատեաց առ Յակոբ զհրաման իւր, եւ առ Իսրայէլ զուխտ իւր յաւիտենից. 11ասէ. Ձեզ տաց զերկիրն Քանանու, զվիճակ ժառանգութեան ձերոյ. 12զի էին նոքա թուով սակաւ, նուազք եւ պանդուխտք ի նմա. 13անցին նոքա ազգէ յազգ, ի թագաւորութենէ ի ժողովուրդ յայլ։ 14Ոչ եթող մարդկան մեղանչել նոցա, կշտամբեաց զթագաւորս վասն նոցա. 15մի՛ մերձենայք, ասէ, յօծեալս իմ, եւ ի մարգարէս իմ մի՛ մեղանչէք։

16Կոչեաց սով յերկիր նոցա, զամենայն զօրութիւն հացի եբեկ։ 17Առաքեաց առաջի նոցա այր, ի ծառայութիւն վաճառեցաւ Յովսէփ։ 18Խոնարհ արարին ի կապանս զոտս նորա, եւ անց ընդ երկաթ անձն նորա։ 19Մինչեւ եկեսցէ բան նորա, եւ բան Տեառն փորձեաց զնա։ 20Առաքեաց թագաւորն եւ ելոյծ զնա, իշխան ժողովրդեան եթող զնա։ 21Կացոյց զնա տէր տան իւրոյ, իշխան ի վերայ ամենայն ստացուածոց իւրոց, 22խրատել զիշխանս նոցա որպէս զինքն, եւ զծերս նոցա՝ իմաստունս արասցէ։

23Եմուտ Իսրայէլ յԵգիպտոս, Յակոբ պանդխտեցաւ յերկիր Քամայ։ 24Աճեցոյց զժողովուրդ իւր յոյժ, եւ զօրացոյց զնոսա քան զթշնամիս իւր։ 25Դարձոյց զսիրտս նոցա՝ ատել զժողովուրդ իւր, եւ ի նենգել զծառայս իւր։ 26Առաքեաց զՄովսէս ծառայ իւր, եւ զԱհարոն ընտրեալ իւր։ 27Ետ նոցա զբան նշանաց իւրոց, եւ զարուեստս իւր յերկիր Քամայ։

28Առաքեաց խաւար եւ խաւարեցոյց զնոսա, զի դառնացուցին զբան նորա։ 29Դարձոյց յարիւն զգետս նոցա, եւ սպան զամենայն ձկունս նոցա։ 30Եռաց յերկիր նոցա գորտ, ի շտեմարանս թագաւորաց նոցա։ 31Ասաց՝ եւ եկն շանաճանճ եւ մժիխ ընդ ամենայն սահմանս նոցա։ 32Դարձոյց զանձրեւս նոցա ի կարկուտ, եւ հուր յերկիր նոցա բորբոքեցաւ։ 33Եհար զայգիս եւ զթզենիս նոցա, եւ փշրեաց զամենայն ծառս սահմանաց նոցա։ 34Ասաց՝ եւ եկն մարախ եւ խառնիճ՝ զի ոչ գոյր նոցա թիւ։ 35Եկեր զամենայն խոտ երկրի նոցա, եւ սպառեաց զամենայն պտուղ անդոյ նոցա։ 36Եհար զամենայն անդրանիկս Եգիպտացւոց, զսկիզբն ամենայն վաստակոց նոցա։ 37Եհան զնոսա ոսկւով եւ արծաթով, եւ ոչ գոյր յազգի նոցա հիւանդ։ 38Ուրախ եղեւ Եգիպտոս ընդ ելանել նոցա, զի անկաւ ահ Տեառն ի վերայ նոցա։

39Սփռեաց ամպ հովանի առնել նոցա ի տուէ, եւ հրով լոյս տայր նոցա ի գիշերի։ 40Խնդրեցին եւ եկն լորամարգի, եւ հացիւ երկնից լցոյց զնոսա։ 41Եհար զվէմն եւ բղխեցին ջուրք, եւ գնացին գետք ընդ անջրդիս։ 42Յիշեաց զբան իւր սուրբ, որ ընդ Աբրահամու ծառայի իւրում։ 43Եհան զժողովուրդ իւր ցնծութեամբ, եւ զընտրեալս իւր ուրախութեամբ։ 44Ետ նոցա զգաւառս հեթանոսաց, ի վաստակս ժողովրդոց ժառանգեցոյց զնոսա։ 45Զի պահեսցեն զվկայութիւնս նորա, եւ զօրէնս նորա խնդրեսցեն։