ՍԱՂՄՈՍ ՃԻԲ (ՃԻԳ)

Օրհնութիւնք աստիճանաց։

1Առ քեզ, Տէր, համբարձի զաչս իմ, որ բնակեալդ ես ի յերկինս։ 2Որպէս աչք ծառայից ի ձեռս տերանց իւրեանց, որպէս աչք աղախնոյ ի ձեռս տիկնոջ իւրոյ, այնպէս են աչք մեր առ քեզ, Տէր Աստուած մեր, մինչեւ ողորմեսցիս ի վերայ մեր։ 3Ողորմեաց մեզ, Տէր, ողորմեաց մեզ, զի բազում լցաք արհամարհանօք։ 4Եւս առաւել լցան անձինք մեր նախատանօք որ նախատէին զմեզ՝՝, եւ արհամարհանօք ամբարտաւանից։