ՍԱՂՄՈՍ ՃԼԴ (ՃԼԵ)

Ալէլուիա։

1Օրհնեցէք զանուն Տեառն, օրհնեցէք, ծառայք Տեառն, զՏէր. 2ո կայք ի տան Տեառն, ի գաւիթս տան Աստուծոյ մերոյ։ 3Օրհնեցէք զՏէր, զի բարի է Տէր. սաղմոս ասացէք անուան նորա՝ զի քաղցր է։ 4ԶՅակոբ ընտրեաց իւր Տէր, եւ զԻսրայէլ ժառանգութիւն իւր։ 5Ես ծանեայ զի մեծ է Տէր, եւ Տէր մեծ է քան զամենայն կուռս։ 6Զամենայն զոր ինչ կամեցաւ՝ եւ արար Տէր յերկինս եւ յերկրի, ի ծով եւ յամենայն խորս։ 7Հանէ զամպս ի ծագաց երկրէ, զփայլատակունս իւր յանձրեւս արար, եւ հանէ զհողմս ի շտեմարանաց իւրոց։

8Ո եհար զամենայն անդրանիկս Եգիպտացւոց՝ ի մարդոյ մինչեւ յանասուն։ 9Առաքեաց զնշանս եւ զարուեստս իւր ի մէջ քո, Եգիպտոս, ի փարաւոն եւ յամենայն զօրս իւր։ 10Ո եհար զազգս բազումս, եւ սպան զթագաւորս հզօրս։ 11ԶՍեհովն թագաւոր Ամովրհացւոց. զՈվգ թագաւոր Բասանու, եւ զամենայն թագաւորութիւնս Քանանացւոց. 12ետ զերկիր նոցա ի ժառանգութիւն, ժառանգութիւն Իսրայելի ժողովրդեան իւրոյ։

13Տէր, անուն քո յաւիտեան. Տէր, յիշատակ քո ազգէ մինչեւ յազգ։ 14Դատի Տէր զժողովուրդս իւր, եւ ի ծառայս իւր մխիթարի։

15Կուռք հեթանոսաց արծաթ եւ ոսկի են, ձեռագործք են որդւոց մարդկան. 16բերան գոյ՝ եւ ոչ խօսին, աչք են՝ եւ ոչ տեսանեն. 17ականջք են՝ եւ ոչ լսեն, եւ ոչ գոյ շունչ ի բերանս նոցա։ 18Նման նոցա եղիցին ոյք արարին զնոսա, եւ ամենեքեան ոյք յուսացեալ են ի նոսա։ 19Տուն Իսրայելի, օրհնեցէք զՏէր. տուն Ահարոնի, օրհնեցէք զՏէր. 20տուն Ղեւեայ, օրհնեցէք զՏէր. երկիւղածք Տեառն, օրհնեցէք զՏէր։ 21Օրհնեալ Տէր ի Սիոնէ, որ բնակեալն է յԵրուսաղէմ։ Ալէլուիա։