ՍԱՂՄՈՍ ՃԼԶ (ՃԼԷ)

Սաղմոս Դաւթի. ի ձեռն Երեմիայի. աննշան յԵբրայեցւոցն։՝՝

1Առ գետս Բաբելացւոց՝ անդ նստէաք, եւ լայաք որպէս յիշեցաք մեք անդ զՍիոն։ 2Ի մէջ ուռեաց նոցա կախեցաք զկտակարանս մեր։ 3Անդ հարցանէին գերիչք մեր զբանս օրհնութեան, գերեվարք մեր ստիպէին զմեզ եւ ասէին. Օրհնեցէք մեզ յօրհնութենէն Սիոնի։ 4Իսկ զիա՞րդ օրհնեսցուք զօրհնութիւնս Տեառն յերկիր օտար։ 5Եթէ մոռացայց զքեզ, Երուսաղէմ, մոռասցի զիս աջ իմ։ 6Կցեսցի լեզու իմ ի քիմս իմ՝ թէ ոչ յիշեցից զքեզ, թէ ոչ նախ նուագեցից զքեզ, Երուսաղէմ, սկիզբն՝՝ ուրախութեան իմոյ։ 7Յիշեա, Տէր, զորդիսն Եդովմայ՝ յաւուրսն Երուսաղեմի, ոյք ասէին. Քակեցէք, քակեցէք, մինչեւ ի հիմն հասուցէք։

8Դուստր Բաբելացւոց թշուառական, երանի՛ որ հատոյց զհատուցումն քո զոր դու մեզ հատուցեր. 9երանի՛ որ կալաւ զմանկունս քո եւ եհար զքարի։