ՍԱՂՄՈՍ ՃԼԸ (ՃԼԹ)

Ի կատարած. Սաղմոս Դաւթի։

1Տէր, փորձեցեր զիս եւ ծանեար զիս։ 2Դու ծանեար զնստել իմ եւ զյառնել իմ. ի միտ առեր զխորհուրդս իմ ի հեռաստանէ։ 3Զշաւիղս իմ եւ զվիճակս իմ դու քննեցեր. եւ զամենայն ճանապարհս իմ յառաջագոյն տեսեր. 4զի ոչ գոյ նենգութիւն ի լեզուի իմում. ահա դու, Տէր, ծանեար 5զյետին իմ եւ զառաջին իմ, դու ստեղծեր զիս՝՝ եւ եդիր զձեռն քո ի վերայ իմ։ 6Սքանչելի եղեւ գիտութիւն քո յինէն, զօրացաւ՝՝ եւ ոչ հանդարտեմ սմա։

7Յո՞ երթայց ես յՈգւոյ քումմէ, կամ յերեսաց քոց ես յո՞ փախեայց։ 8Թէ ելանեմ յերկինս՝ դու անդ ես. թէ իջանեմ ի դժոխս՝ եւ անդր մօտ ես. 9թէ առից զթեւս իմ ընդ առաւօտս, եւ բնակեցայց յեզերս՝՝ ծովու, 10սակայն եւ անդ ձեռն քո առաջնորդեսցէ ինձ, եւ աջ քո ընկալցի զիս։ 11Ասացի. Խաւար ուրեմն արդեւք ծածկեաց զիս, կամ գիշեր փոխանակ լուսոյ փափկութեան իմոյ՝՝։ 12Խաւարն՝ ի քէն ոչ խաւարանայ, եւ գիշերն որպէս տիւ լուսաւոր եղիցի, եւ խաւար նորա որպէս զլոյս նորա՝՝։ 13Դու ստացար զերիկամունս իմ, եւ ընկալար զիս յորովայնէ՝՝ մօր իմոյ։ 14Խոստովան եղէց քեզ, Տէր, զի ահեղ եւ սքանչելի ես՝՝. սքանչելի են գործք քո, եւ անձն իմ գիտաց յոյժ։ 15Ոչ թաքեաւ ոսկր իմ ի քէն զոր արարեր ի ծածուկ, եւ կար զօրութեան իմոյ ընդ ստորինս՝՝ երկրի։ 16Զանգործս իմ տեսին աչք քո, եւ ի գիրս քո ամենեքեան գրեցան. ի տուէ մոլորեցան, եւ ոչ ոք էր որ առաջնորդէր նոցա՝՝։

17Ինձ յոյժ մեծարոյ եղեն բարեկամք քո, Աստուած. եւ յոյժ զօրացան իշխանք նոցա։ 18Թուեցի զնոսա, եւ քան զաւազ բազմացան. զարթեայ եւ արդ ընդ քեզ եմ։ 19Թէ սպանանես զմեղաւորս, Աստուած. արք արեան, ի բաց եղերուք յինէն։ 20Ի հակառակութիւն եւ ի նախանձ, առցեն ի նանիր զքաղաքս քո։՝՝ 21Ո՞չ զատելիս քո, Տէր, ատեցի, եւ ի վերայ թշնամեաց քոց մաշեցայ։ 22Ատելութիւն կատարեալ ատեցի զնոսա, եւ եղեն ինձ ի թշնամիս։ 23Փորձեա զիս, Աստուած, եւ ծանիր զսիրտ իմ, քննեա զիս եւ ծանիր զշաւիղս իմ, 24եւ տես թէ իցեն անօրէնութիւնք ի ճանապարհս իմ, եւ առաջնորդեա ինձ ի ճանապարհս քո յաւիտենից։