ՍԱՂՄՈՍ ՃԽԹ

Ալէլուիա։

1Օրհնեցէք զՏէր յօրհնութիւն նոր, օրհնութիւն նմա յեկեղեցիս սրբոց։ 2Ուրախ եղեւ Իսրայէլ յԱրարիչ իւր, որդիք Սիոնի ցնծասցեն ի Թագաւորն իւրեանց։ 3Օրհնեսցեն զանուն նորա օրհնութեամբ, սաղմոսիւք եւ օրհնութեամբ սաղմոս ասասցեն նմա։ 4Հաճի Տէր ընդ ժողովուրդ իւր, եւ բարձր առնէ զհեզս ի փրկութեան։

5Պարծեսցին սուրբքն փառօք, եւ ցնծասցեն ի հանգիստս իւրեանց. 6եւ բարձր արասցեն զԱստուած բերանովք իւրեանց. սուրք երկսայրիք են ի ձեռս նոցա, 7առնուլ հատուցումն ի հեթանոսաց, ի յանդիմանութիւն ամենայն ժողովրդոց, 8կապել զթագաւորս նոցա կապանօք, զզօրաւորս նոցա ձեռակապօք երկաթեօք, 9առնել ի նոսա զդատաստանն գրեալ. փառք այս են ամենայն սրբոց նորա։