ՍԱՂՄՈՍ ԻԳ (ԻԴ)

Սաղմոս Դաւթի. միաշաբաթուն։

1Տեառն է երկիր լրիւ իւրով, աշխարհ եւ ամենայն բնակիչք նորա։ 2Նա ինքն ի վերայ ծովու հիմունս արկ նմա, ի վերայ գետոց պատրաստեաց զնա։

3Ո՞վ ելցէ ի լեառն Տեառն, կամ ո՞վ կացցէ ի տեղւոջ սրբութեան նորա։ 4Որ սուրբ է ձեռօք եւ ամբիծ սրտիւ, որ ոչ առ զնանրութիւնս յանձն իւր, եւ ոչ երդուաւ նենգութեամբ ընդ ընկերի իւրում՝՝։ 5Սա առցէ զօրհնութիւն ի Տեառնէ, զողորմութիւն յԱստուծոյ փրկչէ իւրմէ։ 6Այս ազգ է որ խնդրէ զՏէր, խնդրէ տեսանել զերեսս Աստուծոյ Յակովբայ։ 7Համբարձէք, իշխանք, զդրունս ձեր ի վեր, համբարձցին՝՝ դրունք յաւիտենից, եւ մտցէ Թագաւոր փառաց։ 8Ո՞վ է սա Թագաւոր փառաց, Տէր հզօր զօրութեամբ իւրով, Տէր հզօր ի պատերազմի։ 9Համբարձէք, իշխանք, զդրունս ձեր ի վեր, համբարձցին՝՝ դրունք յաւիտենից եւ մտցէ Թագաւոր փառաց։ 10Ո՞վ է սա Թագաւոր փառաց, Տէր զօրութեանց. սա ինքն է Թագաւոր փառաց։